Read Paite Chin LEVITIKAS 3 Bible Online

LEVITIKAS 3 - Paite Chin bible

LEVITIKAS 3

¹Huan a thillat, lemna thillat kithoihna a hih a, bawnghon lak a a lat leh, TOUPA ma ah gensiatbei a lan ding ahi.

²A thillat lu tung ah a khut a koih dia, Kihoupihna puanin kongpi bul ah a gou ding. Aron tapa siampute’n maitam a sisan in a kimvel in a theh ding uhi.

³Lemna thillat kithoihna, TOUPA adia mei a thillat a lan dia, a sungkua, thau leh a gilbom tengteng leh,

⁴a kal nihte leh a tuam thau a phuk chin a om leh a sin tuam lam, a kalte toh kigawm in a suah ding ahi.

⁵Aron tapate’n maitam ah mei a sing om tung a haltum thillat tung ah a hal ding uhi. Hiai TOUPA adia gimlim tak, mei a thillat ahi.

⁶Lemna thillat kithoihna a TOUPA adia a thillat belamhon lak a te ahihleh, a nu leng hita hen aw, a pa leng hita leh, gensiatbei a lan ding ahi.

⁷A thillat a, belamnou a lat leh TOUPA ma ah a lan ding ahi.

⁸A thillat lu tung ah a khut a koih ding a, Kihoupihna puanin kongpi ah a gou ding. Aron tapate’n maitam a sisan in a kimvel in a theh ding uhi.

⁹Lemna thillat kithoihnate, TOUPA adia mei a thillat a lan ding ahi. A thaute, a mei thau mahmah a tawnin, a kawngguh tan in a lavek ding a; a sungkua thaute, a gilbom tengtengte,

¹⁰a kal nihte leh a phuk chin a om, a tuam thau leh a sin tuam a lap, a kalte nangawn toh a suah ding ahi.

¹¹siampu in huai maitam ah a hal dia; hiai TOUPA adia mei a thillat nekding ansiah ahi.

¹²A thillat kel ahihleh TOUPA ma ah a lan ding ahi.

¹³A lu tung ah a khut a koih ding a, Kihoupihna puanin kong ah a gou ding. Aron tapate’n maitam a sisan in a kimvel in a theh ding uhi.

¹⁴A thillat pen a lan dia, TOUPA adia mei a thillat tak, a sungkua thau leh a gilbom tengteng leh,

¹⁵a kal nihte leh a phuk chin a om, a tuam thau leh a sin tuam lam, a kalte toh nangawn in a suah ding ahi.

¹⁶Hiai siampu in maitam ah a hal ding ahi. Gimlim dia mei a thillat nekding ansiah ahi a; a thau tengteng TOUPA a tuam ahi.

¹⁷Sathau hiam, sisan hiam na ne ding uh ahi kei, chih na suante uh ading in a banban in na tenna phot uah tangtawn a thuseh ahi ding, a chi hi.