Read Paite Chin LEVITIKAS 4 Bible Online

LEVITIKAS 4 - Paite Chin bible

LEVITIKAS 4

¹Huan, TOUPA’N Mosi a houpih a,

²Israel suante houpih inla, a kiang uah: TOUPA’N thil hihlouh ding a thu a piakte, a bangpeuh leng mi’n na hihkhial kha in, a bangpeuh leng na hihta leh,

³Thaunilh siampu in thil a hihkhelh a mipite tung a mawhpaihna a tunsak leh a thilhih khelhsa thoihna ding in TOUPA kiang ah bawng tuai gensiatbei, khelh thoihna ding in lan hen.

⁴Bawng pen Kihoupihna puanin kongpi bul ah TOUPA ma ah a honkai dia, bawng lu tung ah a khut a koih dia, TOUPA ma ah huai bawng a gou ding ahi.

⁵Thaunilh siampu in bawng sisan bangzah hiam a la dia, Kihoupihna puanin ah a hontawi ding hi.

⁶Siampu in sisan ah a khut a diah dia, a khenkhat TOUPA ma ah, Mun Siangthou puanzak bul ah sagihvei a theh ding ahi.

⁷Siampu in TOUPA ma ah Kihoupihna puanin a gimlim tak maitam kite ah huai sisan bangzah hiam a tat ding ahi. Bawng sisan tengteng Kihoupihna puanin kongpi kiang a haltum thillat maitam bul ah a sungkhe ding ahi.

⁸Khelh thoihna bawng thau tengteng, a sungkua thau leh a gilbom teng leng a lavek dia;

⁹a kal nihte leh a phuk chin a om, a tuam thau leh a sin tuam a lam, a kal nihte nangawn toh a suah ding ahi.

¹⁰Lemna thillat kithoihna bawngpa a kipan a lak bang in, siampu in haltum thillat maitam ah a hal ding ahi.

¹¹Bawng vunte, a sa tengtengte, a lu toh, a khete toh, a sungkuate, a ekte,

¹²a bawng pumpi toh giahphual pawlam mun siang ah, vut paihna ah a paipih dia, sing tung ah a hal ding, vut paihna a hal ding ahi.

¹³Israel mipi tengteng in a hihkhelh khak ua, mipi mitmuh a sel a hih a, TOUPA’N hihlouh ding a thu a piakte, a bang mahmah a hih ua,

¹⁴siamlouh a tan ua, a thil gilou hih uh theihkhiak ahihleh, mipi in khelhthoihna ding in bawngtuai a lan ding ua, Kihoupihna puanin kong ah a honkai ding uhi.

¹⁵Mite upate’n TOUPA ma ah bawng lu tung ah a khut uh a koih ding ua; huai bawng Toupa ma a goh ding ahi.

¹⁶Thaunilh siampu in Kihoupihna puanin ah bawng sisan bangzah hiam a hontawi ding hi.

¹⁷Siampu in huai sisan ah a khutzung a diah dia, puanzak bul ah TOUPA ma ah sagihvei a theh ding hi.

¹⁸Sisan pen Kihoupihna puanin a TOUPA ma ah maitam ki ah tamlou a tat dia, sisan tengteng Kihoupihna puanin kongpi kiang a haltum thillat maitam bul ah asung khe ding ahi.

¹⁹A thau tengteng a la vek dia, maitam ah a hal ding.

²⁰Huchibang in bawng pen a hih dia; khelh thoihna bawng a hih bang geih in hiai leng a hih ding ahi. Huchi in siampu in kilemna a bawl ding a, ngaihdam ahi ding uhi.

²¹Huai Bawng giahphual pua ah a paipih dia, bawng masa a hal bang in a hal ding hi. Hiai mipi adia khelh thoihna ahi.

²²Vaihawmtu in thil a hihkhelh a, TOUPA a Pathian in hihlouh dia thu a piakte a banghiam a hihkhak a, siamlouh a tan a,

²³a thil gilou hih a theih leh a thillat ding in kelpa gensiatbei a honkai ding ahi.

²⁴Kel lu tung ah a khut a koih dia, TOUPA ma ah haltum thillat a goh zel na uah a gou ding hi. Hiai khelh thoihna ahi.

²⁵Siampu in khelh thoihna sisan a khutzung in tamlou a la dia, haltum thillat maitam kite ah a tat dia, haltum thillat maitam bul ah a sisan a sungkhe ding hi.

²⁶A thau tengteng, lemna thillat kithoihna thau a hal bang in maitam ah a hal ding ahi. Huchi in a khelhna tungthu ah siampu in kilemna a bawlsak dia, ngaihdam ahi ding hi.

²⁷Vantang lak a mi, a kuamahmah in TOUPA’N hihlouh dia thu a piakte a bangmah hihkhial in, siamlouh na tang leh,

²⁸a thil gilou hih a theih leh a thillat ding in kelnu gensiatbei, a thilhih khelhsa khelh thoihna ding in a honkai ding hi.

²⁹Khelh thoihna lu tung ah a khut a koih dia, haltum thillatna mun ah khelh thoihna a gou ding hi.

³⁰Siampu in a sisan, a khutzung in tamlou a la dia, haltum thillat maitam kite ah a tat dia, a sisan tengteng maitam bul ah a sungkhe ding hi.

³¹A thau tengteng lemna thillat kithoihna thau a lak bang in a lavek ding hi. Siampu in TOUPA adia gimlim ding in maitam ah a hal ding ahi. Huchi in siampu in kilemna a bawlsak dia, ngaihdam ahi ding hi.

³²Khelh thoihna dia a thillat ding belamnou a hontawi leh, a nu, gensiatbei a hontawi ding ahi.

³³Khelh thoihna lu tung ah a khut a koih dia, haltum thillat a gohna uah khelhna thoihna ding in a gou ding hi.

³⁴Siampu in khelh thoihna sisan a khutzung in tamlou a la dia, haltum thillat maitam kite ah a tat dia, sisan tengteng maitam bul ah asung khe ding hi.

³⁵A thau tengteng, belamnou thau, lemna thillat kithoihna a lak bang in a lavek ding a, siampu in TOUPA adia mei a thillat bang in maitam ah a hal ding ahi. Huchi in, siampu in a thil hihkhelhsa tungthu ah a kilemna a bawlsak dia, ngaihdam ahi ding hi.