Read Paite Chin LEVITIKAS 5 Bible Online

LEVITIKAS 5 - Paite Chin bible

LEVITIKAS 5

¹Huan, kuapeuh a thilmuh hiam, a thilzak hiam adia theihpih a hih a, kichiamsakmi aw a zak a leng gen nuamlou a, thil a hihkhelh leh a thulimlouhna mawh a paw ding.

²Kuapeuh in thil sianglou himhim, gamsa sianglou luang hiam, gan sianglou luang hiam, a vak thoh ganhing sianglou luang hiam theilou a, a khoihkhak leh, sianglou leh mawhtang ahi ding hi.

³Mihing leng a sianlouhna bang peuh hi hen aw, a sianlouhna thei lou a, a khoih leh a theihkhiak hun in siamlouh a tang ding hi.

⁴Kuapeuh in thil hoihlou hiam, thil hoih hiam hihdia, a kam a theilou a, a kichiam zialzial leh, akoi abang hitaleh, a kichiam zialzialna a theihkhiak hun in siamlouh a tang ding hi.

⁵Hichi ahi ding a, hiai thilte khat a leng siamlouh a tan chiang in a khelhna a phuang ding ahi.

⁶Khelh thoihna ding in belamhon lak ah a nu, belamnou hiam kel hiam, a thil hihkhelhsa man ding in TOUPA kiang a lat ding a khelhna thoihna a hontawi dia; siampu in a khelh tungthu ah kilemna a bawlsak ding ahi.

⁷A neih in belamnou a chin zohkei leh TOUPA kiang a lat ding in a khelhman ding in a khelh thoihna ding in vakhu nih hiam, vapal nou hiam a hontawi ding ahi. Khat, khelh thoihna ding in, a khat pen haltum thillat ding in.

⁸Siampu kiang ah a hontawi dia, aman khelh thoihna ding in a lan masa dia, phelkhap lou in a ngawng ah a lu a hektan ding hi.

⁹Khelh thoihna sisan maitam pang ah tamlou a theh dia, a sisan omlai teng maitam bul ah a tak kangsak ding hi. Hiai khelh thoihna ahi.

¹⁰A khatpen dan dungzui in haltum thillat ding in a lan dia; siampu in a thil hihkhelhsa tungthu ah lemna a bawlsak dia, ngaihdam ahi ding.

¹¹Himahleh vakhu nih hiam, vapal nou nih hiam a neih zohkei leh a khelhman thillat ding leh khelh thoihna ding in tangbuang nel dimdem, ephah mun sawm a khen, mun khat a hontawi ding hi. Sathau a buak ding ahi kei a, a tung ah begaw a koih ding ahi kei; khelh thoihna a hih ziak in.

¹²Siampu kiang ah a hontawi dia, siampu in theihgigena ding in a pham khat a la dia, maitam tung ah TOUPA ading in mei a thillat bang in a hal ding ahi. Hiai tatlek thoihna ahi.

¹³Huai thillaka a bangmah leng a hihkhelhsa tungtang thu ah siampu in kilemna a bawlsak dia, ngaihdam ahi ding. A omlai teng tangbuang thillat bangmah in siampu tantuam ahi ding, a chi hi.

¹⁴TOUPA’N Mosi a houpih a:

¹⁵Kuapeuh in thil a hihkhelh a, TOUPA thil siangthoute tung a a khelhkhak leh, a khelh thoihna, belamhon lak a belampa gensiatbei, Mun Siangthou sekel bang in, dangka sekel bangzah hiam gun a ngaih, tatlek kithoihna ding in TOUPA ading in a honkai ding ahi.

¹⁶Thil siangthou tung a a na hih diklouh khitsa pen adin dia, a mun nga a khen, mun khat a behlap dia, siampu a pe ding ahi. Huchi in siampu in tatlek thoihna belampa in kilemna a bawlsak dia, ngaihdam ahi ding.

¹⁷Kuapeuh in thil a hihkhelh a, hihlouh dia TOUPA’N thu a piakte khatpeuh ahihleh, theikei mahleh siamlouh a tang himhim dia, a thulimlouhna mawh a paw ding ahi.

¹⁸Belamhon lak a belampa gensiatbei, a man kilawm hun, tatlek thoihna ding in siampu kiang ah a honkai ding ahi. Siampu in theiloupi a hihkhelh khak tungthu ah kilemna a bawlsak dia, ngaihdam ahi ding.

¹⁹Hiai tatlek thoihna ahi a; TOUPA ma ah a talek mah hi.