Read Paite Chin LEVITIKAS 6 Bible Online

LEVITIKAS 6 - Paite Chin bible

LEVITIKAS 6

¹Huan, TOUPA’N Mosi a houpih a,

²Kuapeuh in thil hihkhial in, TOUPA thu kalh in talekta leh, sum kepsak thu ah hiam, lepthu ah hiam, guktakthu ah hiam a invengte zekhem in, a invengte zuaubawl leh,

³ahihkeileh, vanmangte mu in, khem in, zuau in kichiam leh, hiai thil tengteng a khatpeuh leng a hihkhelh leh,

⁴Hichi ahi ding a, a khialngei a hih a, siamlouh a tan leh a van gukte, khem a a thillakte, a kiang a kepsak sumte, vanmang a topte,

⁵zuau a kichiamna thil bangpeuh leng a ditnawn ding ahi. A kim sipsip in a dinnawn vek dia, a mun nga a khen, mun khat val in a behlap ding. Siamlouh a tanni in a neitu a pe ding ahi.

⁶A tatlek thoihna, belamhon lak a, a man kilawm hun, belampa gensiatbei tatlek thoihna ding in TOUPA ading in siampu kiang ah a honkai ding ahi.

⁷Siampu in TOUPA ma ah kilemna a bawlsak ding a, Siamlouh tanna ding a thil a hih peuhmah tungthu ah, ngaihdam ahi ding a chi hi.

⁸TOUPA’N Mosi a houpih a,

⁹Aron leh a tapate kiang ah, hiai haltum thillat dan ding ahi. Haltum thillat pen maitam tung a, a halna ah zankhua in a zingchiang tan in a om dia; maitam a mei a kuang nilouh ding ahi.

¹⁰Siampu in a puanmalngat puansilh a silh dia, a sa khuhna ding in a puanmalngat khekol a teng dia; maitam a haltum thillat kangvute a la dia, maitam pang ah a koih ding ahi.

¹¹A puansilh siangthou a suah dia, puansilh dang a silh dia, a vute giahphual pua munsiangthou ah a paipih ding ahi.

¹²Maitam tung ah mei kuansak nilouh ahi dia, a mit ding ahi kei. Siampu in zingsang teng in sing a khul dia, haltum thillat a koih hoih dia, huai ah kilemna thillatte thau a hal ding ahi.

¹³Maitam ah mei a kuang gige dia, a mit ding ahi kei hi.

¹⁴Hiai tangbuang thillat dan ding ahi. Aron tapate’n maitam bul ah, TOUPA ma ah a lan ding uh ahi.

¹⁵Aman a pham khat in tangbuang thillat tung a begaw tengteng a lakhe dia, TOUPA adia gimlim tak, theihgigena ding in maitam ah a hal ding hi.

¹⁶A lak bangte Aron leh a tapate’n a ne ding uhi. Huai Mun Siangthou ah silngou sohlouh in a ne ding ua; Kihoupihna puanin kongtual ah a ne ding uh ahi.

¹⁷Silngou toh a kan ding uh ahi kei. Mei a ka thillat a tantuan ding ua ka piak ahi. Huai khelh thoihna leh tatlek thoihna bang a siangthou pen ahi.

¹⁸Aron suan pasal tengteng in a nekding uh ahi. Hiai TOUPA adia haltum thillat tungthu a na suante zel uh tan a tangtawn dan ahi ding. Kuapeuh hiaite khoihpeuh mah a siangthou ding uh, chi’n thu piain, a chi hi.

¹⁹TOUPA’N Mosi a houpih a,

²⁰Thaunilh a, a om ni ua, Aron leh a tapate’n TOUPA kiang a a lat ding uh thillat hiai ahi. Tangbuang thillat dia lat zel ding, tangbuang nel dim dem ephah sawm a khen, mun khat, zingsang in a kim, nitakin a kim.

²¹Sathau in kuangdai sung ah na kang dia, sathau a a kidiah suak khit chiang in na honla lut dia; na balnen dia, tangbuang thillat TOUPA adia gimlim ding in na lan ding ahi.

²²A tapate lak a, a sik a pangmi, thaunilh siampu in a lan dia; tangtawn dan ding in TOUPA adia haltum vek ding ahi.

²³Siampu in tangbuang thillat a lat peuhmah haltum vek ding ahi a, nek hetlouh ding ahi, a chi hi.

²⁴TOUPA’N Mosi a houpih a,

²⁵Hiai khelh thoihna dan ding ahi. Haltum thillat goh zelna ah khelh thoihna leng TOUPA ma a goh ding ahi. Hiai thil siangthou pen ahi.

²⁶Khelh thoihna lantu siampu in a ne dia; Kihoupihna puanin kongtual ah, Mun Siangthou ah a ne ding ahi.

²⁷Kuapeuh huai sa khoih peuhmah a siangthou ding ahi. A sisan pen bang puan peuh a theh ahihleh, a banna peuhmah Mun Siangthou ah na sawp ding ahi.

²⁸A huanna leibel pen sukkhap ding ahi. Sumbel a huan ahihleh bel nawt siang a khuah siang ding ahi.

²⁹Pasal siampu tengteng in huai a ne ding uh ahi. Hiai thil siangthou pen ahi.

³⁰Khelh thoihna sisan, Mun Siangthou a kilemna bawlna dia Kihoupihna puanin a hong kitawi pen nekding ahi kei, mei a haltum ding ahi.