Read Paite Chin LEVITIKAS 7 Bible Online

LEVITIKAS 7 - Paite Chin bible

LEVITIKAS 7

¹Huchi mah bang in hiai tatlek thoih dan ding ahi. Thil siangthou pen ahi.

²Haltum thillat a gohzelna ua tatlek kithoihna leng goh ding ahi a; a sisan a maitam theh kimvel ding ahi.

³A thau tengteng a lat ding ahi. A mei thautakte, a sungkua thaute,

⁴a kal nihte leh a boh thau, a phuk kiang a thau leh a sin tuam lap, a kalte nangawn in a suahkhe ding ahi.

⁵Siampu in TOUPA adia mei a thillat ding in maitam tung ah a hal ding ahi. Hiai tatlek thoihna ahi.

⁶Pasal siampu tengteng in a ne ding ua; Mun Siangthou a nekding ahi. Hiai thil siangthou pen ahi.

⁷Tatlek thoihna pen khelh thoihna mah bang ahi a, dan khat ahi. Kilepna bawltu siampu in huai a tang ding hi.

⁸Siampu, kuapeuh haltum thillat latsaktu siampu ngei in haltum thillat dia a lat vun a pum tan ding ahi.

⁹A kanna a kan tangbuang thillat peuhmah, sikbel a kan leh kuang a kan tengteng a lantu siampu a tuam ding ahi.

¹⁰Tangbuang thillat tengteng sathau a mek leng, a gaw leng a dang mah bang in Aron tapa tengteng a kihawm dialdial ding uh ahi.

¹¹Hiai pen mi’n TOUPA kiang a, a lat ding, lemna thillat a kithoih dan ding ahi.

¹²Kipahthu genna dia a lat leh kipahthu genna kithoihna ding in sathau a zut, silngou sohlouh tanghou leh sathau a zut silngou sohlouh tanghou pa didekte leh sathau a mek tangbuang nel mahmah kidiah suak a lat tel ding ahi.

¹³Kipahthu genna dia lemna thillat kithoihna ah tanghou silngou soh a lat tel ding ahi.

¹⁴Huai a thillat teng a TOUPA adia vei thillat ading in khat chiat a lan dia; lemna thillat sisan a thehtu siampu a tuam ding ahi.

¹⁵Kipahthu genna dia a lemna thillat kithoihna sa pen thillat a lat ni mah a nekgaih ding ahi. A zingchiang tan a bangmah a sit ding ahi kei.

¹⁶Himahleh a thillat kithoihna pen thuchiam hiam, amah ut thu a thillat hiam ahihleh kithoihna a lat ni mah a nekding ahi a; nekbang a zing chia nekding ahi.

¹⁷Himahleh kithoihna sa, a ni thum ni tan a om lailai leh hal ding ahi.

¹⁸A lemna thillat kithoihna sa ni thum ni tan a a nek uleh, pom sak ahi kei dia, a lantu leng a lan a sim ahi kei ding. Thil kihhuai ahi dia, kuapeuh a ne in a thulimlouhna mawh uh a paw ding hi.

¹⁹Thil sianglou himhim toh kisukha sa nekding ahi kei, hal ding ahi. Sa siang peuhmah nekding ahi.

²⁰Himahleh lemna thillat kithoihna sa, TOUPA a tuam, sianglou ne mi a chipihte lak apan satkhiat ding ahi.

²¹Kuapeuh in thil sianglou himhim, misianglou hiam, gan sianglou hiam, thil kihhuai sianglou himhim a khoih a, lemna thillat kithoihna sa, TOUPA a tuam a nek leh huai mi a chipihte lak apan satkhiat ding ahi, chi’n Aron leh a tapate houpih in, a chi hi.

²²TOUPA’N Mosi a houpih a:

²³Bawng hiam, belam hiam, kel hiam thau na ne ding uh ahi kei.

²⁴Amah sih a si thau leh sa balzan thau thil dang adia zat ding ahi. Na ne himhim ding uh ahi kei.

²⁵Kuapeuh, TOUPA adia mi’n mei thillat a lat uh sathau ne mi, a chipihte lak apan satkhiat ding ahi.

²⁶Na tenna peuh uah sisan himhim, vasa hiam, gamsa hiam sisan hiam na ne ding uh ahi kei.

²⁷Kuapeuh hita leh, sisan ne himhim a chipihte lak apan satkhiat ding ahi, chi’n Israel suante houpih in, a chi hi.

²⁸TOUPA’N Mosi a houpih a:

²⁹TOUPA kiang a lemna thillat kithoihna lan peuhmah in, TOUPA adia a thillat, a lemna thillat kithoihna apan a honglat ding ahi.

³⁰TOUPA adia mei a thillat amah khut mahmah in a hontawi ding a; a thau leh a awm a honla ding ahi, a awm pen TOUPA ma a vei thillat ding a vei a hih theihna ding in.

³¹Siampu in maitam ah a thau a hal dia, a awm bel Aron leh a tapate a tuam ding ahi.

³²A liang taklam pen kilemna thillat kithoihna apan vei thillat dia siampu na piak ding uh ahi.

³³Aron tapate lak a lemna thillat sisan leh thau lantu kuapeuh in a tantuan ding in a liang taklam a tang ding ahi.

³⁴A awm leh a liang a veilel pen uh Israel suante a lemna thillat kithoihna apan ka la tuam a, Israel suante tangtawn dan ding in siampu Aron leh a tapate ka pia ahi, chi’n Israel suante kiang ah gen in, a chi hi.

³⁵Hiai ahi, siampu nasem dia TOUPA kiang a lat a hih nungsiah TOUPA adia mei a thillat apan Aron tantuan leh a tapate tantuan ding.

³⁶Amau thau a nilh ni a Israel suante’n a piak ding ua TOUPA’N thu a piak. Hiai tangtawn a a suan hongom zel dingte tan a a hih dan ding uh ahi.

³⁷Hiai ahi haltum thillat, tangbuang thillat, khelh thoihna leh tatlek kithoihna dan.

³⁸Sinai gamdai a Israel suante’n thillat TOUPA kiang a a lat ding ua thu a piak ni a Sinai tang a TOUPA’N Mosi thu a piak ahi.