Read Paite Chin LEVITIKAS 8 Bible Online

LEVITIKAS 8 - Paite Chin bible

LEVITIKAS 8

¹Huan, TOUPA’N Mosi a houpih a:

²Aron a tapate toh pi inla, puansilhte, nilhchite sathau, khelh thoihna bawngpate, belampa nihte, tanghou silngou sohlouh bawm khat toh tawi inla,

³Mi tengteng Kihoupihna puanin kongpi kim ah omkhawm sak in, a chi hi.

⁴Mosi in TOUPA’N thu a piak bang in a hih a; mi tengteng Kihoupihna puanin kongpi kim ah a omkhawm uhi.

⁵Mosi in omkhawmte kiang ah, Hiai ahi, TOUPA’N hihdia a hon thupiak pen, a chi hi.

⁶Mosi in Aron leh a tapate a honpi a, tui in amau a sil hi.

⁷Puanak a silhsak a, kawnggakna in a gak a, puanaktual a silh sak a, siampu puanak in a tuam a, siampu puanak gakna siamtak a gat in a gak a, huai in a gakbelh hi.

⁸Awmtuamna a thuah a, awmtuamna ah Urim leh Thummim a koih hi.

⁹Dial a khimsak a, dial tung ah dangkaeng sikpek a bulh a, huai mailam ah Toupa’n Mosi a thupiak bang in siampu lukhu siangthou a kilhbelh hi.

¹⁰Mosi in nilhchi sathau a la a, biakbuk leh asung a thil om tengteng a nilh a, a siangthousak chiat hi.

¹¹Huai mah in sagihvei maitam a theh a, maitam leh a tuium-belsuan tengteng, maiphiatna kuang leh a tunna siangthousak ding in a nilh hi.

¹²Tua sathau Aron lu ah a buak a a siangthouna ding in a nilh hi.

¹³Mosi in Aron tapate a honpi a, puanak sungsilh tualte a silhsak a, kawnggakna in a gak a, TOUPA’N Mosi thu a piak bang in dial a khimsak hi.

¹⁴Khelh thoihna bawngpa a honkai a, Aron leh a tapate’n khelh thoihna ding bawngpa lu tung ah a khut uh a koih uhi.

¹⁵A gou a; Mosi in a sisan a la a, huai maitam adia kilemna bawlna ding in a khutzung in maitam ki ah a kimvel in a tat a, maitam a siang sak a, maitam bul ah sisan asung in a siangthousak hi.

¹⁶A gilbom tengteng, a sin, a lap, a kal nihte leh a thau a la a, maitam tung ah Mosi in a hal hi.

¹⁷Bawngpa pen a vun toh, a sa toh, a ek toh giahphual pua ah a hal hi, TOUPA’N Mosi thu a piak bang in.

¹⁸Haltum thillat belampa pen a lan a, Aron leh a tapate’n belampa lu tung ah a khut uh a koih uhi.

¹⁹A gou a, Mosi in maitam sisan in a kimvel in a theh hi.

²⁰Belampa a sem a, a lu, a semnente leh a thau a hal hi.

²¹A sungkua leh a khete a sil a; belampa pen maitam ah avek in a hal hi. Huai gimlim dia haltum thillat ahi a; TOUPA’N Mosi thu a piak bang in TOUPA adia mei a thillat ahi.

²²Belampa dang, hihtuamna belampa pen a hon lanawn a, Aron leh a tapate’n belampa lu tung ah a khut uh a koih uhi.

²³Mosi in a gou a, a sisan a la a, Aron bil taklam dawn, a khut taklam khutpi leh a khe taklam khepi a nuh hi.

²⁴Mosi in Aron tapate a pi a, a bil taklam dawn, a khut taklam khutpi, a khe taklam khepi a nuh a, maitam sisan in a kimvel in a theh hi.

²⁵A thaute, a mei thau, a gilbom tengteng a sin tuampen a lapte, a kal nih leh a thau leh a liang taklam a la hi:

²⁶TOUPA ma a tanghou silngou sohlouh bawm apan tanghou silngou sohlouh khat leh sathau a mek tanghou pei khat leh tanghou peipa’n khat a la a, thau tung leh a liang taklam tung ah a koih hi.

²⁷Avek in Aron khutpek tung ah leh a tapate khutpek tung ah a koih a, TOUPA ma a vei thillat ding in a vei hi.

²⁸Mosi in a khut apan a la a, haltum thillat tung ah maitam ah a hal hi. Huai gimlim dia a hihtuamna ahi. TOUPA adia mei a thillat ahi.

²⁹Mosi in a awm a la a, TOUPA ma a vei thillat in a vei a; hihtuamna belampa Mosi tantuam ahi, TOUPA’N Mosi thu a piak bang in.

³⁰Mosi in nilhchi sathau apan tamlou leh maitam a sisan tamlou a la a, huai in Aron leh a puansilhte a theh a; a tapate leh a tapate puansilhte leng a theh hi. Aron leh a puansilh a hih siangthou a, a tapate leh a tapate puansilhte leng a hih siangthou hi.

³¹Mosi in Aron leh a tapate kiang ah, “Kihoupihna puanin kongpi bul ah sa huan unla, Aron leh a tapate’n a nekding uh ahi, chi a thu ka piak bang in, huai ah hihtuamna bawm a tanghou toh ne uhen.

³²Sa leh tanghou nekbangte na hal ding uh ahi.

³³Na kihihtuamna ni uh a chin masiah Kihoupihna puanin kongpi pawtsan lou in ni sagih na om ding uh ahi. Ni sagih sung nou hon hihtuam ding ahi ngal a.

³⁴Tuni a a hihsa bang in, nou adia kilemna hon bawlsak ding in TOUPA’N thu a peta hi.

³⁵Huaiziak in Kihoupihna puanin kongpi bul ah ni sagih, sun leh zan in na om nilouh ding ua, na sihlouhna ding ua TOUPA thupiak na zuih ding uh ahi, huchibang ding a thupiak ahi” a chi hi.

³⁶Huchi in TOUPA’N Mosi zang a a hih ding ua thu a piak tengteng Aron leh a tapate’n a hih uhi.