Read Paite Chin LEVITIKAS 9 Bible Online

LEVITIKAS 9 - Paite Chin bible

LEVITIKAS 9

¹Huan, hichi ahi a, a ni giat ni’n Mosi in Aron leh a tapate leh Israel upate a sam hi.

²Aron kiang ah, “Khelh thoihna ding in bawngnoupa leh haltum thillat ding in belampa gensiatbei tuaktuak kai inla, TOUPA ma ah lan in, a chi hi.

³Israel suante kiang ah, ‘khelh thoihna ding in kelpa, haltum thillat ding in bawngnou leh belamnou kum khat a upa tuaktuak gensiatbei tuak

⁴leh bawngpa leh belampa, sathau a mek tangbuang thillat toh TOUPA ma a lemna thillat a lat ding in honkai un.’ Tuni in na kiang uah TOUPA a hong kilang ding hi, chi in hilh in” a chi hi.

⁵Mosi in thu a piak bang in Kihoupihna puanin kong ah a honkai ua; mi tengteng in a va naih ua, TOUPA ma ah a va ding uhi.

⁶Mosi in, “Hiai ahi na hih ding ua TOUPA thu a honpiak, TOUPA thupina na lak uah a hong kilang ding” a chi hi.

⁷Mosi in Aron kiang ah, “Maitam honnaih inla, na khelh thoihna leh na haltum thillat lan inla, nang ading leh mipite ading in kilemna bawl in. Mipite thillat pen lan inla, amau ading in kilemna bawl in, TOUPA thupiak bang in” a chi hi.

⁸Aron in maitam a vanaih a, amah a tuam khelh thoihna bawngnou a gou hi.

⁹Aron tapate’n a kiang ah sisan a hontawi ua, huai sisan ah a khutzung a diah a, maitam kite ah a tat a, sisan pen maitam bul ah asung hi.

¹⁰Himahleh, khelh thoihna thau, a kalte leh a sin tuampen lapte maitam tung ah a hal a, TOUPA’N Mosi thu a piak bang in.

¹¹A sa leh a vun giahphual pua ah a hal hi.

¹²Haltum thillat pen a gou a; Aron tapate’n a sisan a pia ua, aman maitam kimvel in a theh hi.

¹³Haltum thillat sabakte leh a lu a pia ua, aman maitam ah a na hal hi.

¹⁴A sungkuate leh a khete a sil a, maitam ah haltum thillat tung ah a hal hi.

¹⁵Mipite thillat pen a lan a, mipite khelh thoihna kel a kai a, a gou a, a ma amah bang in khelh thoihna ding in a lan hi.

¹⁶Haltum thillat a lan a, a dan bang in a lan hi.

¹⁷Tangbuang thillat a lan a, huai apan pham khat a la a, zingsang a haltum thillat chihlouh leng maitam ah a hallai hi.

¹⁸Mipite a tuam dia lemna thillat kithoihna bawngpa leh belampa leng a gou a, Aron tapate’n a sisan a pia ua, maitam a kimvel in a theh hi.

¹⁹Bawngpa thau leh belampa thau, a mei thau, a gilbomte, a kalte, a sin tuampen a lapte leng a pia uhi.

²⁰A thau pen a awmte tung ah a koih a, aman a thau pen maitam ah a hal hi.

²¹A awm leh a liang taklam pen Aron in TOUPA ma ah vei thillat ding in a vei hi; Mosi thupiak bang in.

²²Aron in mipi lam ah a ban a zak a, avek un vual a zawl hi. Khelh thoihna, haltum thillat leh lemna thillat a latzoh in a hong paisuk hi.

²³Mosi leh Aron Kihoupihna puanin ah a valut ua, a hong pawtkhe nawn ua, mipite a vualzawl uhi. TOUPA thupina mi tengteng kiang ah a hong kilang hi.

²⁴TOUPA ma apan mei a hong pawtkhia a, haltum thillat leh thaute maitam ah a kangtumta hi. Mipi tengteng in huai a muh un a kikou zuazua ua, leisi in a khupboh uhi.