Read Paite Chin JEREMIAH 1 Bible Online

JEREMIAH 1 - Paite Chin bible

JEREMIAH 1

¹Benjamin gam a Anathoth khua a siampute lak a mi Hilkiah tapa Jeremiah thute;

²Judah Kumpipa, Ammon tapa Josiah hunlai, a vaihawm kum sawmlehthumna ah a kiang ah TOUPA thu a hongtung hi.

³Judah kumpipa, Josiah tapa Jehoiakim vaihawmlai in leng a hongtung a; Judah kumpipa Josiah tapa Zedekiah kum sawm leh kum khatna tawp, Jerusalem sal a pi kha ngana tan in.

⁴TOUPA thu ka kiang ah a hongtung a;

⁵“Gil sung a k’on bawl ma in k’on thei a, sul a kipan a na pawtkhiak ma in leng k’on koihtuam a, namte kiang a zawlnei din k’on sepkhin” chi in.

⁶Huan ken, “E, Toupa Pathian, ngai dih, thu ka gen siam kei, ka naupang ngal a” ka chi hi.

⁷TOUPA’N ka kiang ah hichi in a chi a: “Ka naupang, chi ken, k’on sawlna peuhmah kiang ah na hoh ding a, k’on thupiak peuhmah na gen ding ahi.

⁸Amau ziak in lau kenla, nang hon honkhe ding in na kiang ah ka om hi” chi in.

⁹Huchi in TOUPA’N a honsawk a, ka kam a khoih a, TOUPA’N ka kiang ah,

¹⁰“Ngai in, na kam ah ka thute ka koihta, en dih, namte leh kumpipa gamte tung ah, botkhe ding, phel ding, hihse ding, paikhe ding, bawlhoih ding leh ding khesak ding in tuni in k’on koih na hi,” a chi hi.

¹¹Huailou leng TOUPA thu ka kiang ah a hongtung a, “Jeremiah, bang na mu?” a chi hi. Ken, “Vaisuaklu sing hiang ka mu” ka chi hi.

¹²Huchi in TOUPA’N ka kiang ah, “Na mu kha mahmah ve: ka thu tangtun ding in ka kigalging gige ahi” a chi hi.

¹³Huan TOUPA thu a nihveina din ka kiang ah a hongtung nawn a “Bang na mu a?” chi in. Ken bel, “Bel sou bolhbolh, a gong mallam nga ka mu” ka chi hi.

¹⁴Huchi in TOUPA’N ka kiang ah hichi in a chi a: Gam a tengte tung ah mallam a kipan thil hoihlou a hongtung ding.

¹⁵Ngai dih, mallam kumpipa gam nam tengteng ka sam ding; chih TOUPA thupawt ahi; a hongpai ding ua, Jerusalem kongpi lutna ah, a kimvel kulh bang tengteng chin ah leh Judah khopi teng ah a mangtutphah uh a tung chiat ding uh.

¹⁶Hon paisan ua, pathian dangte kiang ah gimlim a hal ua: amau khutsuak mah a bia ua; hiai a thulimlouhna teng tungtang ua ka thugelte ka phuang ding hi.

¹⁷Huaiziak in puan teng inla, thou inla, k’on thupiak teng a kiang uah vagen in; a ma uah lunglel kenla, huchilou in zaw a ma uah k’on lunglel sak ding hi.

¹⁸Ngai in, tuni in nang, a gam pumpite, Judah kumpipate, a heutute, a siampute leh a gam mipite dou in khopi kulh a um leh sik khuam leh dalsik khuam in k’on bawl ahi.

¹⁹A honsual ding ua, himahleh a hon zou kei ding uh: hon honkhe ding in na kiang ah ka om hi, chih TOUPA thupawt ahi.