Read Paite Chin JEREMIAH 10 Bible Online

JEREMIAH 10 - Paite Chin bible

JEREMIAH 10

¹Aw, Israel inkawte aw, na kiang ua TOUPA thugen ngaikhia un,

²TOUPA’N hichi in a chi: Namte omdan ching kei unla, van a chiamtehnate ziak in leng lunglau sam kei un; namte huaite ah a lunglau nak uhi.

³Mite dante bangmahlou ahi ngal a, Gamnuai ah sing a phuk ua, heipi a mi khutsiam khut in a sep ahi.

⁴Dangkasik leh dangkaeng in a zem ua, a tat louhna ding in sikkilhna leh sek in a kilh uh.

⁵Leipi a vasa lau ding milim bang ahi ua, a pau theikei uh. Amau a pai theihlouh ziak un, puak suan a kiphamoh sek uh; amaute lau kei un, thilsia a hih theikei ua, thil hoih leng a hih thei sam kei uh.

⁶Aw TOUPA, nang bang kuamah a omkei ua, na thupi a, na min hatna in a thang lian hi.

⁷Aw namte kumpipa, kuan ahia hon kihta lou ding? Huai lah na tuakzou him ngal a. Namte mi pil tengteng lakte ah, a gam himhim lak uah leng, nang bang mahmah a omkei uh.

⁸Amau khawksak neilou mihai ahi ua, manna bei sing milimte sinsak ahi uhi.

⁹Tarsis a kipan dangkasik sek a honla ua, Uphaz a kipan dangkaeng, mi khutsiam bawl, dangkaeng sekmi khutsuak, puansilh dumpuang leh sandup, mi khutsiam khutsuak vek ahi uhi.

¹⁰TOUPA bel Pathian tak ahi, Pathian hing tangtawn Kumpipa ahi, a heh in lei a ling a, namte’n a hehna a nangzou kei uh.

¹¹A kiang ua hichibang a na chih ding uh ahi: Pathian, lei leh van bawl hiloupi lei a kipan a mangthang ding ua, van nuai a kipan a mang vek ding uh.

¹²A thilhihtheihna in lei a bawl a, a pilna in khovel a tungdinga, a lemtheihna in van a kaipalh hi.

¹³A aw a suah leh, van ah tui a ging honhon a, kawlmong a kipan meipi a kahtousak a, vuah zukna ding in khua a phesak a, a goubawm a kipan huih a nungsak hi.

¹⁴Michih a mawl ua, theihna a neikei uh, dangkaeng sekmiin a limsek a zumpih a, a milim sun lah zuau lel ahi a, amau ah hinna leng a omkei hi.

¹⁵Bangmahlou ahi ua, khemna nasep lel, a gawt hun chiang un a mang ding uh.

¹⁶Jakob tantuan bel hichibang ahi kei, thil tengteng bul ahi ngal a; Israel a gouluah nam ahia, a min sepaihte TOUPA ahi.

¹⁷Aw nang, um a om lellel in, na puanthuah lei a kipan la khawm in,

¹⁸TOUPA’N hichi in a chi ahi: Ngai un, tuin gam a tengte ka singkhe ding, a phawktham un ka hihgenthei ding.

¹⁹Ka natna ziak in ka tung a gik hi, ka liamna a na a, himahleh, Hiai hial haksatna ahi, ka thuak mai ding ahi, ka chi.

²⁰Ka puanin a seta, ka khau tengteng a kitat vek a, ka kiang a kipan ka tate a pawt ua, a om nawn kei uh: Ka puanin zak ding a omta kei uh, ka puanzak tungding dingte.

²¹Belamchingmite a mawl ua, TOUPA a thudot dan a theikei uh; huaiziak in a lamzang kei ua, a belamhonte uh a dalhzak khinta.

²²Ngai un, mallam apan husa a hongtung, buaina thupi mahmah, Judah khopite hihgawp in, sehal tenna ding a suaksak ding in.

²³Aw TOUPA, mihing omdan bel, amah thu lel ahi kei chih ka theita hi: mihing a kalsuan amah kipi hilou hi.

²⁴Aw TOUPA, hon thunun inla, a hunlel in, heh lou in, huchilou in zaw n’on hihmang kha ding hi.

²⁵Pautuam mi, nang thei ngeiloute tung leh, na min lou ngeiloute tung ah na hehna bungkhia in; Jakob a nekhin ua, ahi, a nekhin ua, a nemang ua, a tenna gam a hihsia uhi.