Read Paite Chin JEREMIAH 11 Bible Online

JEREMIAH 11 - Paite Chin bible

JEREMIAH 11

¹Jeremiah kiang a TOUPA thu hongtung:

²Hiai thukhunte ngaikhia unla, Judah mite leh Jerusalem a tengte kiang ah gen un.

³Nang a kiang uah, TOUPA Israel Pathian in hichi in a chi: Hiai thukhun thute ngaikhe loumi hamse thuak in om hen:

⁴Huai bel na pipute uh, Aigupta gam, sik haltuina a kipan a ka pikhiak ni a, ka pau kamsuak mang unla, thu ka honpiak tengteng hih un, chi a ka thupiak tak ahi: huchi in ka mite na hi ding ua, kei na Pathian uh ka hi ding:

⁵Na pipute uh kiang a khuaizu leh nawitu a luang gam kichiam a piak ka chiamtak ka tangtun theihna ding in tuni a a om bang in, hichi in a chi a. Huan, ken, “Amen, Aw TOUPA” chi’n ka dawng hi.

⁶Huchi in TOUPA’N ka kiang ah: Judah khopite ah leh Jerusalem kholakte ah hiai thu tengteng puang inla, Hiai thukhunte ngaikhia unla, zui un.

⁷Na pipute un Aigupta gam a kipan ka pikhiak ni a kipan a tutan in ka paukam suak mang un, chi in ka theisak sek hi.

⁸Himahleh a mang kei ua, bil a doh sam kei ua, michih, amau lungtang gilou bangzel in a omzaw uh. Huaiziak in hiai thukhun thu, hih ding a thu ka piak, a hih louh tengteng uh a tung uah k’on tungsakta ahi, a chi a.

⁹Huan, TOUPA’N ka kiang ah: Judah mite leh Jerusalem a tengte lak ah phialgukna a om.

¹⁰A pipute uh, ka thu ngaikhe nuamloute thulimlouhna lam ah a kilehhei nawn ua; pathian dangte na sem ding in a kuan ua: Israel inkawte leh Judah inkawte’n a pipute uh kiang a ka thukhun bawl pen a hihseta uh.

¹¹Huaiziak in TOUPA’N hichi in a chi: Ngai dih ua, a tung uah thil hoihlou, a pelh het louh ding uh k’on tungsak ding; a honsam ding ua, himahleh ka dawng kei ding.

¹²Huan, Judah khopite leh Jerusalem a tengte’n pathian, a kiang ua gimlim a hal seknate uh a sam ding ua, himahleh a buai hun chiang un huaite’n amau a humbit hetkei ding hi.

¹³Aw Judah, na pathiante na khopi zah ahi ngal ua: thil zumhuai tak, Baal kiang a gimlim halna ding maitam hial leng Jerusalem kongzing zah in na ding sakta hi.

¹⁴Huaiziak in hiaite thumsak kenla, amau ading in ngetna hiam aw hiam suah sam ken; a buai hun chiang ua a honsap uh leh ka ngaikhe kei ding hi.

¹⁵Thil kihhuai hih kawm in, ka deih mahmah in ka inn ah tantuam bang ahia a neih? Thu kichiamte leh sa tan in na siatna ding uh a hon pelsak thei ding ahia? Na suang thei ua hia?

¹⁶TOUPA’N na min ding in olive sing hing, gah hoih kilawmpi, a honchi a, lum hon hon in a tung ah mei a toh a, a hiangte leng a kitan khinta.

¹⁷Sepaihte TOUPA, nang hon phutpa’n, Israel inkawte leh Judah inkawte khelhna, Baal kiang a gimlim lan a, hon hehsak thil uh, amau adia a sepkhiak tung ua thil hoihlou ding thu na tung ah a phuang kheta hi.

¹⁸TOUPA’N hon theisak a, ka theita: huchi in nang mahmah in a thilhihte uh n’on kawkmuhta.

¹⁹“Kei bel belamnou nunnem tak, goh ding a pi bang ka hi, sing pen a gah toh, hihsia ni e, mihing gam a kipan amah zaw i hihmang vengveng ding uh, a min mawngmawng theih a hih louhna ding in, chi a ka tung a a thil sawm uh ka na thei hetkei.”

²⁰Himahleh, aw sepaihte TOUPA, diktak a vaihawmpa, sunggil lam leh lungtang entelpa, a tung ua na phulak hon musak in, ka tungthu lah na kiang ah k’on kemsak hi” chi in.

²¹Huaiziak in sepaihte TOUPA’N Anathoth mi, na hinna zongpa, “Ka khut ua na sih louhna ding in TOUPA min in thu gen ken” chi mite tungtang ah hichi in a chi:

²²Ngai un, amau ka gawt ding a, tangvalte namsau in a si ding ua, a tanute uh, a tapate uh kial in a si ding uh;

²³A si val a omkei ding uh: Anathoth mite tung ah thil hoihlou ka tun dek ngal a, a gawtna kum ding mahmah uh.