Read Paite Chin JEREMIAH 12 Bible Online

JEREMIAH 12 - Paite Chin bible

JEREMIAH 12

¹AwTOUPA, na kiang a ka phun in leng, nang zaw na dik nilouhlouh a; himahleh ka vuina thu pen ka gen ding hi. Bangchi’n ahia mi thulimloute lam a lamzan zel uh? Bangchi’n ahia khemhat peuhmah nuamsa a a om nak uh?

²Amau na phut a, ahi, zung a kaita ua, a khang ua, ahi, gah a suahta uhi: a muk un honnaih ua, a sunggil un hon gamlat uhi.

³Aw TOUPA kei bel na honthei a, n’on mu a, nang lam ah ka lungtang na entel sek a, amaute belam goh ding bang mai in kaikhia inla, a gohna ni ding uh sep in.

⁴Gam in bang tan ahia a sun ding a, Anteh louhingte a vuai ding uh? A tengmite thulimlouh ziak in gamsate a mang khin ua, vasate leng; i hun nanung uh a mu kei ding uh a chih ziak un.

⁵Khe a pai mite toh na kitaiteh a, nang a hon bahsak khit uleh bangchi’n sakolte na kitaitehpih thei dia? Muanna gam ah bittak in om lechin leng, Jordan gammang ah bangchi’n na hih ding?

⁶Na unaute, na pa inkuante ngei in, amau nang a honkhemta ngal ua; amau nang hondelh in ngaihtak in a honsam ua, thu hoihtak gen mahle uh taksang himhim ken.

⁷Ka inn leh lou paisan in ka gouluah ding ka pai mangta; ka hinna in a it mahmah nu, a melma kiang ah ka peta hi.

⁸Ka gouluah ding gamnuai humpinelkai bang a hong hita, ka siatna ding in a aw a suah a, huaiziak in ka mudah ahi.

⁹Ka gouluah ding kei ading in sasial ne vasa gial ahi hia? Sasial ne vasate’n a kimvel in a sual ua hia? Gamsa teng va kaikhawm unla, nekbei din honpi un.

¹⁰Belamchingmi tampi in ka grephuan a hihsia ua, ka tan a sikden ua, ka tantuan nuam mahmah mai gamdai gam segawp a suaksakta uh.

¹¹Gamsia in a bawlta ua, a segawp a, ka kiang ah a vui hi, a gam pumpi a segawp a, himahleh kuamah in a donsak kei uhi.

¹²Gamdai a tang giau tengteng ah, hihsemite a hongtungta ua, gam tawp khatlam a kipan leh khatlam pha in TOUPA namsau in lah a nebeita a, muanna nei himhim a omta kei uh.

¹³Buhchi a tuh ua, ling a la ua, a kihihgim gawp ua, punna lah a om tuankei, TOUPA heh mahmah ziak in gah na suahte uh na zumpih ding uh.

¹⁴Ka mi Israel kiang a gouluah ding a ka piak khoihsemi, ka inveng giloute tengteng tungtang ah TOUPA’N hichibang in a chi: Ngai un, a gam ua kipan ka botkhe ding a, a lak ua kipan Judah inkawte ka phawikhe ding.

¹⁵Huan, hichi ahi ding a, ka bohkhiak nung in amau ka hehpih nawn ding a, michih gouluah ding leh michih amah gam mah ah ka honpi ding.

¹⁶Huan, hichi ahi ding a, Baal kiang a ka mite kichiam a sinsak mah bang un, ka min a, TOUPA a hin a a hin sung, chi a kichiam a kisin ua, ka mite omdan ngentel tak a a sin uleh ka mite lak ah ka dingkhe sak ding.

¹⁷Himahleh a ngaihkhiak kei ua leh huai nam a boh in ka botkhe ding a, ka hihse ding, chih TOUPA thupawt ahi.