Read Paite Chin JEREMIAH 14 Bible Online

JEREMIAH 14 - Paite Chin bible

JEREMIAH 14

¹Khokheng tungtang a Jeremiah kiang a TOUPA thu hongtung:

²Judah in a sun a, a kulh kongpite a ngui; lei ah puan vom khu in a kun ua, Jerusalem kah ging a tungkah.

³A mi lalte’n a sikhate uh tui a tawisak ua, tuichin a zuan ua, tui a mu kei uhi, Tuibel uh hawm in a kik ua; a beidong ua, gen ding a theikei ua, a lu uh a khuh uhi.

⁴Lei lah a khang a, gam pum a vuahtui a omlouh ziak in, leiletmite a lungdong ua, a lu uh a khuh ua.

⁵Ahi, zukpiin leng pawn ah nou a nei a, a taisan ve, lou hing a omlouh ziak in.

⁶Gam sabiltungte mualvum ah ading ua, sehal bang in huihkhua ngai in a nak huhu ua; nekding loupa omlouh ziak in a mit uh a mial dundun hi.

⁷Ka thulimlouhna un honhek mahleh na min ziak in aw TOUPA hong kuan in; ka puknate ulah a tamta ngal a, na tung mahmah ah thil ka na hih khial uhi.

⁸Aw nang Israelte lamet, mangbat lai a hondampa, bangdia hiai gam a mikhual bangzen a zan khat giak a zin banglel a om na hia?

⁹Bangdia mi lungke gawp bang phet leh pasalpha hondam thei khollou bang lel a om na hia? Himahleh nang zaw, aw TOUPA, ka lak uah na omlai a, na min ka pu ua, hon paisan ken.

¹⁰TOUPA’N hiai mite tungtang ah hichi in a chi: Vakmang a ut nak ua, a kalsuan uh a kidek kei uh; huchi in TOUPA’N amau a pom kei a, a thulimlouhna uh a theigigeta ding a, a khelhna uh a gawt ding hi.

¹¹TOUPA’N ka kiang ah, Hiai mite hoihna ding ngetsak ken.

¹²An ngawl mahle uh a kikou uh ka ngaikhe kei ding a, haltum leh buh leh bal thillat lan mahle uh ka dawng kei ding; namsau, kial, hipi in amau ka hihmang zaw ding, a chi hi.

¹³Ken, Eh, TOUPA Pathian, ngai dih, a kiang uah zawlneite’n, Namsau na tuak kei ding ua, kial leng na thuak kei ding uh, hiai mun ah muan mahmahna k’on pezaw ding hi, a chi sek ngal ua, ka chi hi.

¹⁴Huan, TOUPA’N ka kiang ah, zawlneite’n ka min a zuaugen zel eive ua leh; amau ka sawl kei a, thu ka khak kei a, ka houpih sam kei hi. Thil a muh khollouhte uh, aisan bangmah a pangloute leh a lungsim dohate uh honhilh eive ua, a chi hi.

¹⁵Huaiziak in TOUPA’N hichi in a chi: Ka sawl khol louh a ka minlou a, hiai gam ah kial leh namsau a tung kei ding, chi a genmi huai zawlneite namsau leh kial in a mangthang ding uh.

¹⁶Huan, a thugenna uh nam leng kial leh namsau ziak in Jerusalem kongzing ah paihkhiak ahi ding ua, a tanute uh a tapate utoh, vuimi himhim a neikei ding uh. A thulimlouhna uh amau tung ah ka sung dek ngal a.

¹⁷Huan, a kiang ua hiai thu na gen ding ahi; Sun leh zan in ka khitui luang hen, hul himhim kei hen, ka mi, ka tanu nungak siangthou in nakpi a liamna a tuak hi, khutkhak na mahmah hi.

¹⁸Ka gam pawt leh, maizen, namsau a thahte! Khopi a a lut leh, maizen, kialpi misi! gamchih ah zawlneite, siampute a vakvai chiat ua, a dan mahmah a theikei uh, chi in.

¹⁹Judah paikhe siang na hi hiam? Zion kih na hi maw? Kou dia hihdamna omlou bikbek a bangdia hon thuaksak na hia? Muanna ka zong ua, hoihna bangmah a hongtung kei; hihdamna hun ding leng, ngai dih kha phanna lel.

²⁰Aw TOUPA, ka thulimlouhdan uh ka kitheihmohbawl kei uhi, ka pipute uh ginatlouhna toh, na tung ah ka hihkhialta uhi.

²¹Na min ziak in hon musit ken, na mangtutphah thupi minse sak kenla, ka kiang ua na thukhun theigige in hihse ken.

²²Namdang pathiante lak ah vuah zusak thei a om uhia? Ahihleh, van in vuahpi a tungsak thei hia? Aw TOUPA ka Pathian uh, huai pen nang na hi kei maw? Hiai thil tengteng na hih ahi a, ka lamet uh nang na hi.