Read Paite Chin JEREMIAH 15 Bible Online

JEREMIAH 15 - Paite Chin bible

JEREMIAH 15

¹Huan, TOUPA’N ka kiang ah hichi in a chi a: Mosi leh Samuel ka ma ah hongding mahle uh, ka lungsim hiai mite lam a nga tuankei ding. Ka muh phak louh ah delhkhia inla, paimang uhen!

²Huan, koi ah ka pai ding ua chi a nang a hondot uleh hichi in a kiang uah na chi ding hi: TOUPA’N hichi in a chi: Sihna tuam sihna ah; namsau tuam namsau ah; kial tuam kial ah, saltanna tuam saltanna ah.

³Thil li ka sehsak ding, chih TOUPA thupawt ahi: that ding in namsau, keizan ding in ui, nekhin leh hihmang ding in tung a leng vasa leh gam sahangte.

⁴Judah kumpipa Hezekiah tapa Manasseh in Jerusalem a a thilhih ziak in lei kumpipa gam tengteng lak a vial sepsep ding in ka bawl ding.

⁵Kuan a hon hehpih dia aw Jerusalem? Kuan hon lungkhampih dia? Na omdan dong ding in kua a lampial dia oi?

⁶Nang n’on paikhia a, na nungtawn tawn a, chih TOUPA thupawt ahi. Huchi in kisik ka chimtak a, na tung ah ka khut ka lik a, k’on hihmang hi.

⁷Gam pumpi a kulh kongpite ah kizapna in amau ka zap a, ta bei in ka bawl a, ka mite ka hihmang a; a omdan uh a kihei san louh ziak un.

⁸Tuipi piaunel sang a tam in a meithaite uh ka pungsak ding a, suntanglai in tangvalte siatna ding in a tung uah lokmi ka tungsak a, mangbatna leh thil mulkimhuai ka tungsak guih hi.

⁹Sagih suangnu a bahgawp a; a kha a khahta; sun a hih lai in a ni a keta, zahlak in a lungbuai a: huan a omlaite a melmate khut ah namsau thah ding in ka pe ding, chih TOUPA thupawt ahi.

¹⁰Nu ei, gam pumpi a kituahlouhna mi leh kikalhna mi a n’on na suan ka tung gik hina tele! Ka leitawi sak kei a, mite’n leng a hon leitawi sak kei uh; himahleh avek un hamsia a honloh uhi.

¹¹TOUPA’N, chihtak ngial in thil hoih ading in ka hon hihkip ding; chihtak ngial in siatna ni leh haksatna ni’n melma na kiang ah khut ka dohsak ding, a chi hi.

¹²Min sik, mallam a sik leh ngen a kitansak thei ding ahia?

¹³Na khelhna tengteng ziak in na sum lah pai lah na gou thilte manbei in gallak ding in ka pe ding, na gam tawn in.

¹⁴Na theih ngeilouh gam ah na melmate na k’on semsak ding. Ka heh ziak a na tung a mei ampha ding a kuangkheta hi, a chi hi.

¹⁵Nang man na thei hi, aw TOUPA; hon theigige inla, hongveh in, hon simmohte tung ah phuba hon laksak in. Na dohzohna ken manthat loh keileng; nang ziak a minsiat thuak ka hi chih thei in.

¹⁶Na thute hihlat ahia, ka ne a, na thute kei ading in kipahna leh ka lungtang nopna ahi; aw TOUPA, sepaihte Pathian, na min lah ka puta ngal ua.

¹⁷Nopbawl mite lak ah ka tel kei a, ka kipahpih sam kei; nang khut ziak in ka tu tuam a, lungkimlouhna in n’on dimsak hi.

¹⁸Bangdia ka natna dai theilou a, ka liamna dam theilou ahi, hihdam utlou bang mai a? Ka tung ah guam khemhat tui kang sekte bang na hi ding ahia?

¹⁹Huchi in TOUPA’N hichi in a chi: Na kihei leh a ngei k’on bangsak ding, ka ma ah na ding nawn ding. Thil ginalou a kipan thil manpha ngen na genkhiak leh keimah kam bang na hi ding. Amau nang lam hong nga uhenla, nang bel amau lam na nga ding ahi kei.

²⁰Hiai mite lak a zaw ngen kulh bang in k’on bawl ding a, a honsual ding ua, himahleh a honzou kei ding uh, nang hon hondam ding leh honkhe ding in na kiang ah ka om ngal a, chih TOUPA thupawt ahi.

²¹Migiloute khut a kipan k’on honkhe ding a, mi lauhuaite khut a kipan k’on pawtkhe sak ding.