Read Paite Chin JEREMIAH 16 Bible Online

JEREMIAH 16 - Paite Chin bible

JEREMIAH 16

¹TOUPA thu ka kiang ah a hongtung a:

²Zi na nei ding ahi kei a, hiai mun ah tanu tapate leng na nei ding ahi sam kei, chi in.

³Tanu tapa hiai mun a piangte leh hiai gam a nu leh pa amaute suangte tungtang TOUPA’N hichi in a chi:

⁴Hipiin a si ding ua, kuamah vuilouh leh kuamah sun louh in a om ding uh; leitung ekvut banglel ahi ding uh. Namsaute, kialte in a mangthang ding ua, a luang uh tungleng vasate leh gamsate an ahi ding hi.

⁵TOUPA’N hichi in a chi hi: Lusunna inn ah lut kenla, sun ding in hoh kenla, amau kah ken; hiai mite lak a kipan ka lungmuanna ka hawkta ngal a, chitna leh lainatnate toh, chih TOUPA thupawt ahi.

⁶Hiai gam ah mi lian leh mi neute a si ding ua; vui ahi kei ding ua; kuamah in a sun kei ding ua, a ki at un a kimet giau loh kei ding uh.

⁷Lusunmite a misi ngaih uh lungmuan ding in kuamah in nek ding a lui kei ding ua, a nu uh hiam a pa uh hiam ziak in leng nepna nou dawn ding kuamah in a tun kei ding uhi.

⁸Huan, ne leh dawn ding in a lak ua tu ding in Ankuangluina inn ah na lut ding ahi kei.

⁹Sepaihte TOUPA, Israel Pathian in hichi in a chi ngal a: Ngai dih ua, na mitmuh un, na damsung un mou awte, mouneipa awte, nuamsakna husate, kipahna gingte hiai mun ah ka daisak ding.

¹⁰Hiai thu tengteng hiai mite kiang a na hilh hun chiang in amau, Bangziak in ahia TOUPA’N ka tung ua hichitak a thil hoihlou a hon genkhiak? Bang ahia ka thulimlouhna uh? TOUPA ka Pathian uh tung a ka thilhih khelh bang ahia? a hon chih uleh,

¹¹Hichi in na chi ding hi: Na pipute un a hon paisan ziak uh ahi, pathian dangte a delh ua, a na uh a sem ua, a bia ua, a hon paisan ua, ka dan a zuikei ua;

¹²Huan noute’n na pipute uh sang a leklua in na hih ua, ngai un, michih in noumau lungtang gilou paupeng na zui ua, Kei n’on ngaikhe kei ua;

¹³Huaiziak in ka gam a kipan noute leh na pipute un leng na theih ngeilouh uh gam ah ka hon delhkhe ding, huai ah sun leh zan in pathian dangte nna na sem ding ua, k’on hehpih dek ngal kei a, chih TOUPA thupawt ahi.

¹⁴Huchi in, ngai dih ua, nite a hongtung dek hi, TOUPA thupawt in a chi; “Israel tate Aigupta gam a kipan a pikhepa a hin a a hin sung, chita lou in,

¹⁵Mallam gam leh a delhzakna gam tengteng a kipan a Israel tate pikhepa TOUPA a hin a a hin sung, a chi zawta ding uh.” A pipute uh kiang a ka piak, amau gam mahmah ah lah ka pikik nawn ding hi.

¹⁶Ngamanmi tampi ka thukhak ding a, amau a man ding ua; huaikhit in gamvakmi tampi ka thukhak ding a, tang chiteng leh mual chiteng a kipan amaute a beng khe ding ua, suangpi hengkal a leng.

¹⁷A omdan tengteng uah lah ka mit a tu nilouh ngal a; kei a kipan sel in a omkei ua, a thulimlouhna uh leng ka mit a kipan sel in a omsam kei hi.

¹⁸Huchi in a thil kihhuai luangte ua ka gam a hihnit ua leh a kihhuaina ua ka goutan gam a dimsak ziak un a thulimlouhna uh leh a khelhna uh a zahnih in ka thuk ding, chih TOUPA thupawt ahi.

¹⁹Aw TOUPA, ka hatna leh ka kulhpi, mangbat ni a ka kihumbitna, kawlmong a kipan in namte a hongpai ding ua, Ka pipute un zuau, thil ginalou, punna nei hilou kia loungal bangmah gouluah in a neikei uh.

²⁰Min pathiante a kibawlsak thei ua hia? Huaite pathian ahi sam ua, a chi ding uh.

²¹Huaiziak in, ngai dih ua, tutung in amau ka theisak peuhmah ding; ka khut leh ka thilhihtheihna ka theisak ding, ka min TOUPA ahi chih a thei ding uh.