Read Paite Chin JEREMIAH 17 Bible Online

JEREMIAH 17 - Paite Chin bible

JEREMIAH 17

¹Judah khelhna sik laigelhna leh suangmantam hiam muk zum a gelh ahi; a lungtang pek ua khuak in a om a, a maitam uahte leng;

²Sing hing bul leh mualpawngte ah a tate un a maitamte uleh a Aserahte uh a theigige ngal ua.

³Aw nang gam a ka tang, gam dung tawn a na khelhna ziak in na sum leh na gou tengteng, na mun sangte toh gallak ding in ka pe ding.

⁴Huai na tantuam ka honpiak na tan ding a, na gam theih ngeihlouh ah na melmate nna k’on semsak ding, ka hehna mei, tangtawn a kang ding lah na mut kuangta ngal ua.

⁵TOUPA’N hichi in a chi: Mihing muang a, mihing ban hatna muang a, TOUPA lehngatsan lungtang neimi hamse thuak in om hen.

⁶Gamdai a loupa keu gaw bang ahi a, thil hoih pawt ding a mu kei ding. Gamdai gamkeu, chi gam, kuamah luah louh ah a teng zaw ding hi.

⁷TOUPA muangmi, a lametpen TOUPA hi bel a nuamsa hi.

⁸Tui kiang a sing phuh, luigei a zungkai, khaw lum hongtung ding khawksa lou, a nahte hing gige, khokhen kum khawksa lou, gah suan kikhelsak tuan lou bang ahi ding hi.

⁹Lungtang bel thil tengteng sang in khemhat pen, hoihlou pumlum ahi a; kuan ahia theithei ding?

¹⁰Kei TOUPA bel michih a omdan bangzel uleh a thilhih gah bangzel a peding a lungsim enkhepa, lungtang enchianpa ka hi.

¹¹Mi, kilawmlou a hong hau bel vengkeng, amah tui loupi keuhsak dia op bang ahi, a damlai in amah a tuansan ding ua, atawp in mihai a hong himai ding.

¹²Ka Mun Siangthou omna bel mangtutphah thupi mahmah, a tung a kipan a tawisang a om ahi.

¹³Aw TOUPA Israel lamet, nang hon paisan mi tengteng a zahlak ding uh; kei hon lehngatsan mite lei a leivui a gelh banglel ahi ding uh, TOUPA hinna tuikhuk pen lah a paisanta ngal ua.

¹⁴Aw TOUPA hon hihdam inla, huchi in ka dam ding a, hon humbit lechin, huchi in ka bit ding, ka phat gige nang na hi.

¹⁵Ngai in, ka kiang ah, TOUPA thu koi ah? Hongtung leh a ke, a chi sek uh.

¹⁶Thil hoihlou tungsak ding ka honphut kei a, siatna ni lah ka deih hetkei chih na thei hi; ka kam a thupawt lah na maima a om ahi hi.

¹⁷Kei ding in kihtakhuai hi kenla, mangbat ni a ka kihumbitna na hi.

¹⁸Hon simmohte zahlak uhenla, kei bel zahlak keileng; amau bel lungzing uhenla, kei bel lungzing keileng; mangbat ni a tung uah tun inla, nakpi’n amau hihmang in.

¹⁹TOUPA’N ka kiang ah hichi in a chi: Kuan inla, Judah kumpipate lutna zel leh pawtna zel, mipite tate kongpi ah leh Jerusalem kongpite tengteng ah vading inla;

²⁰A kiang uah, Nou Judah kumpipate, Judah tengtengte, Jerusalem a teng tengteng hiai kongpi a lut sekte aw, TOUPA thu ngaikhia un.

²¹TOUPA’N hichi in a chi hi: Na hinna uh pilvang mahmah dih ua, khawlniin puak neikei unla, Jerusalem kulh kongpi ah lutpih sam kei un.

²²Huan, khawlniin na inn ua kipan puak na pokhe ding uh ahi kei a, nna na sem ding uh ahi sam kei; na pipute uh kiang a ka thupiak bang in khawlni na tang siangthou zaw ding uhi.

²³Amau zaw a ngaikhe kei ua, bil a doh kei ua; thununna a zak ua a tanlouhna ding un a kigenhaksak zaw uhi.

²⁴TOUPA thupawt in hichi in a chi: Khawksa tak a n’on ngaihkhiak ua, khawlni a hiai khopi a kongpi a thil na puaklut louh ua,

²⁵Nna na seplouh ua khawlni na tan siangthou uleh, hiai khopi kongpi ah leh heutute, David tutphah a tu dingte kangtalaite leh sakolte ah tuang in a honglut ding ua, amau leh a miliante uh Judah leh Jerusalem a tengte toh; huchi in hiai khopi ah mi a teng denta ding uh.

²⁶Judah khopi leh Jerusalem kim a kipan, Benjamin gam a kipan, gamniam gam a kipan, tanggam a kipan leh Sim gam a kipan in a hongpai ding ua, haltum thillat leh kithoihnate buh leh bal thillat leh gimlimte, kipahna kithoihnate TOUPA inn ah a hontawi ding uh.

²⁷Himahleh khawlni tang siangthou ding leh khawlni a puak neih louh leh Jerusalem kulh kongpi a lutpih louh ding thu ah n’on ngaihkhiak kei uleh a kulh kongpite ah mei ka pawtsak ding a, Jerusalem kumpipa innte a kang bei ding a, a mit kei ding hi.