Read Paite Chin JEREMIAH 18 Bible Online

JEREMIAH 18 - Paite Chin bible

JEREMIAH 18

¹TOUPA a kipan a Jeremiah kiang a thu hongtung a:

²“Thou inla, belvelmi inn ah hohsuk inla, huai ah ka thute ka hon theisak ding” a chi hi.

³Huchi in belvelmi inn ah ka hohsukta a, a belbawlna khawl ah nna a sem hi.

⁴Tung a bel a bawl lai a hong hoih kei leh belvelmi’n hoih a sak bang in bel dang din a bawl nawn zel hi.

⁵Huchi in TOUPA thu ka kiang ah a hongtung nawn a:

⁶Aw Israel inkawte aw, hiai belvelmi hih bang in nou ka honhih theikei a hia? chih TOUPA thupawt ahi. Ngai dih ua, “Belvelmi khut a tung banglel in ka khut ah na om uhi, aw Israel inkawte aw.”

⁷Chiklai in leng nam hiam gam hiam tungtang thu ah, k’on dokkhe ding, k’on phel ding a, k’on hihse ding, chi in na gen mah leng,

⁸Huai nam in a tungthu ka gen ziak a a thil hoihlou hih a lehngatsan leh a tung a thil hoihlou hih ka tup ka kikhelsak ding.

⁹Huan, chiklai in leng nam hiam gam tungtang thu ah, k’on bawl ding a, k’on dingsak ding a, chi in na gen zong hileng,

¹⁰Ka paukam suak ngaikhe lou a ka mitmuh a thil hoihlou ahihleh amah ading in thil hoih hih ka tup ka kikhelsak sam ding.

¹¹Huaiziak in Judah mite leh Jerusalem a tengte kiang ah, TOUPA’N hichi in a chi: Ngai dih ua, na tung uah thil hoihlou ka ngaihtuah a, nou k’on sawmlai na hi uh, michih in a omdan hoihlou uh lehngatsan uhenla, na omdan uleh na thilhihte uh bawlpha un, vachi peuhmah in.

¹²Himahleh amau zaw, “Kilawm kei e! Koumau phasak bangbang in ka om ding ua, michih koumau lungtang gilou genhak bangzel in ka om ding uh” a chi sek uhi.

¹³Huaiziak in TOUPA’N hichi in a chi: Namdangte dong him dih ua, hichibang mahmah kuan a thei a? Nungak siangthou Israel in thil lauhuai mahmah a hihta.

¹⁴Lebanon vuk in a mualvum a nuse ngei ahia? Gamla a kipan a tui vot hongluang sukte a kangtat ngei ahia?

¹⁵Ka mite’n a hon mangngilh ua, bangmah lou phet kiang ah gimlim a hal ua, huaite’n a tuma lam lampi ua kipan a ki suisak a, lampipen hilou lamkhem lam a zui uh;

¹⁶A gam uh hih siatgawp ahi dia, tangtawn a enghou ding; kivialleh min lamdangsa in a lu uh a sing ding ua.

¹⁷Suahlam huihpi bang in melma ma ah ka thehzak ding, a vangtah ni un ka mel hilou, ka dek ka musak ding hi.

¹⁸Huan, amau, Kisa un, Jeremiah i sawm ding uh, siampu a kipan dan a dai kei ding a, mi pil a kipan thudot a dai sam kei ding, zawlnei a kipan thu a dai kei ding hi. Kisa un, i gense gawp ding ua, a thu i limsak kei ding, a chi uhi.

¹⁹Hon limsak inla, aw TOUPA kei hon ngetna thu limsak in.

²⁰Gilou thil hoih a dit hi ngei hia? Amau lah ka kha ading in kawkhuk a tou ngal ua. Amau a kipan a na hehna heimang ding leh amau adia thil hoih gen ding a na ma a ka din sek theigige in.

²¹Huchi in a tate uh kialpi kiang ah pekhia inla, namsau hatna kiang ah pia in; huan a zite uh taneilou in, meithai uhen; a pasalte uh hipi in si uhenla, a tangvalte uh leng kidouna ah namsau si uhen.

²²Simmite a kiang uh na tunsak guih lai in a inn ua kipan kap husa thangkhia hen: kei ading in kawkhuk a tou ngal ua, ka khe awkna ding in thang a kam uhi.

²³Himahleh nang, aw TOUPA kei honthat ding a a hon sawmna tengteng uh na thei hi; a thulimlouhna uh ngaidam kenla, na mitmuh in a khelhna uh thaimang sam ken: Na ma ah kipuk uhenla, na heh ni’n amaute soisa in.