Read Paite Chin JEREMIAH 19 Bible Online

JEREMIAH 19 - Paite Chin bible

JEREMIAH 19

¹TOUPA’N hichi in a chi: Kuan unla, belvelmi lei bel valei un; mipite upate leh siampu lak a upate pi inla;

²Belvelmi kongpi lutna chin a Ben Hinnom guam ah hoh inla, huai ah na kiang a thu k’on hilh ding na phuang ding.

³Hichi in na chi ding hi: Judah kumpipate leh Jerusalem a tengte aw, TOUPA thu za un: Israel Pathian, sepaihte TOUPA’N hichi in a chi: Ngai dih ua, hiai mun ah a za peuhmah bil am khop hial a thil hoihlou ka hontun ding hi.

⁴Mite’n a honpai san ua, hiai mun a hihnin un, amau leh a pate uh leh Judah Kumpipate’n leng a theih ngei nai hetlouh uh, pathian dangte kiang ah gimlim a hal ziak uleh hiai mun mi hoih sisan a a dimsak ziak un leh Baal kiang a haltum thillat ding a a tate uh a halna ding ua Baal mun sangte a lamkhiak ziak un;

⁵Huai zaw ka thupiak ahi kei a, gen leng ka gen sam kei a, ka lungsim ah leng a om ngeikei hi.

⁶Huaiziak in, ngai dih, nite a hongtung ding, TOUPA thupawt in a chi: huai nite chiang in hiai mun Tophet chih ahita kei ding a, Ben Hinnom guam chih ahi sam kei ding; kithahna guam chih ahi zawta ding.

⁷Huan, hiai mun ah Judah leh Jerusalem thil tupte ka vuak suaksak ding a; amau pen namsau in a melmate uh ma ah leh a hinna uh lak tummite khut ah ka puksak ding; a luangte uh tung a leng vasate leh lei a gamsate an ding in ka pe ding.

⁸Huchi in, hiai khopi lamdang sak ding leh enghou ding in ka bawl ding a, a vialpai peuh in siatna a tuahte ziak in lamdang a sa ding ua, a enghou lai ding uhi.

⁹A tanute uleh a tapate uh sa ka nesak ding a; a melmate uh leh a hinna uh lak tummite’n a um ua a mangbat sak hun chiang un kuapeuh in a invengte uh sa a ne ding uh.

¹⁰Huan, na paipihte mitmuh in bel na hihtam ding a, a kiang uah huchi in na chi ding.

¹¹Sepaihte TOUPA’N hichi in a chi: Hichimah bang in hiai mite leh hiai khua ka hihtam ding; belvelmi bel min a kitamsak a, bawlhoih nawn vual ahi lou bang in; Tophet ah a vui ding ua, vuina ding mun dang a omlouh ziak in.

¹²Huchi hial in hiai mun ka bawl ding, chih TOUPA thupawt ahi; hichimah bang in hiai khua Tophet bang a bawl hial in, asung a tengte tung ah leng ka hih ding:

¹³Jerusalem innte leh Judah kumpipate innte, inn chiteng mahmah a tung a vanlam thilte kiang a gimlim halkhitna tengteng leh pathian dangte kiang a dawn ding thillat butkhiaknasa tengtengte Tophet mun bang hial a hihnit ahi ding hi.

¹⁴Huan, Jeremiah bel, TOUPA’N thugen ding a a sawlna mun Tophet a kipan in a hongpai a; TOUPA inn um sung ah ading a, mipi tengteng kiang ah hichi in a chi hi:

¹⁵Israelte Pathian, sepaihte TOUPA’N hichi in a chi: Ngai dih ua, thil hoihlou ka gen tengteng hiai khopi leh a khaw dang tengteng ah k’on tungsak ding hi: ka thu ngaikhe lou ding a a lungtang uh a khauhsak ziak un.