Read Paite Chin JEREMIAH 2 Bible Online

JEREMIAH 2 - Paite Chin bible

JEREMIAH 2

¹TOUPA thu ka kiang ah a hongtung a, hichi in a chi:

²Kuan in, Jerusalem zak in kikou in, TOUPA’N hichi in a chi: Na tuailai a na migitdante, kikham lai a n’on itdante ka theigige hi; gamdai a khohlouh gam a na honzuih dan bang.

³Israel bel TOUPA adia hihsiangthou, a gah pung masa ahi, amah negaimi peuhmah a mawh ding a, a tung uah siatna a hongtung ding, chih TOUPA thupawt ahi.

⁴Aw Jakob inkawte leh Israel inkaw tengteng aw, TOUPA thu ngaikhia un;

⁵TOUPA’N hichi in a chi hi: Na pipute un kei ah diktatlouhna bang ahia a muh uh, kei a kipan gamlapi ah a vakmang ua, bangmahlou a delh ua, a na kiotsak uh?

⁶TOUPA, Aigupta gam a kipan hon pikhia a, gamdai, gamkeu, kawkhuk mun, sihna limliap leh gamkeu mun, kuamah paisuak ngeilouhna, kuamah omlouhna mun a honpi paisuakpa koi ah? a chi sam kei uh.

⁷Gam hoihtak ah, a gah leh hoihna ne ding in, k’on pilut a, himahleh na lut uleh ka gam na hihnin ua, ka goutan thil kihhuai in na bawl uh.

⁸Siampute’n, TOUPA koi ah? a chi kei ua, Dan zangmite’n a honthei sam kei uh, vaihawmmite ka tung ah a hel ua, zawlneite’n Baal min in thu a gen ua, thil phatuamlou dingte a delh uh.

⁹Huchi in k’on lang ding a, na tate uh ta nawnte leng ka lang lailai ding, chih TOUPA thupawt ahi.

¹⁰Kittim tuikulh ah vahoh unla, en un, Kedar ah mi sawl unla, chiktak in ngaihtuah un, hichibang thil a om ngeina hiam theihna ding in.

¹¹Namte’n a pathian uh a kheng uhia, pathian tak hiloupi leng? Ka mite’n bel a thupina uh, thil phatuamlou tak in a khek uh.

¹²Aw vante, lamdang sa unla, hon mulkim sak henla, mau tuaituai un, chih TOUPA thupawt ahi.

¹³Ka mite’n thil nih a hihkhial uhi: kei, hinna tuikhuk a honpai san ua, tuiching theilou ding tuivungte a toukhia uhi.

¹⁴Israel sikha ahi hia? Sikha mawng a piang hia? Bangdia nuaisiah a om ahia?

¹⁵Humpinelkai tuailaite’ ham khum in, a tung ah aw a suah ua, a gam a hihgawp khinta uh, a khopite leng luahmi neilou in a kang siang khin hi.

¹⁶Nophmi leh Tahpanhes mite’n, na luzang a giausak khinta uh.

¹⁷TOUPA na Pathian in lampi a a honpi lai a, na taimangsan ziak in, huai na tung a na tunsak ahi kei maw?

¹⁸Nile tui dawn ding a Aigupta lampi na zuih, nang ding a bang a phatuam a? Luipi tui dawn ding a Assuria lampi na zuih, nang din bang phatuam a?

¹⁹Na thulimlouhna in hon thuaksak ding a, na nungkinna in nang a honsal ding hi; hon launa neilou TOUPA na Pathian na paisan a, thil gilou tak leh kha mahmah ahi na hih, na theikhia inla, mu telta in, chih TOUPA, Sepaihte TOUPA thupawt ahi.

²⁰Nidanglai apan na hakkol hihtan in, na khaute leng na hihtatta hi, Na nna ka sem nawn kei ding, na chi a, tang sangte, singbawk nuai ah, na hih hi.

²¹Chi dik zang in grep hoih mahmah k’on phut a, bangchidan a kikheng a, kei dia grep taklou hongsuakta na hia?

²²Tangal in kisil in sahbon tampi kinuh in, na thulimlouhna ka mitmuh in a dawk hi, chih TOUPA Pathian thupawt ahi.

²³Ka kihihnin sam a, Baalte ka delh sam a, bang achia chi thei na hia, guam kuak a na omdante en inla, na thilhihsate thei in; sangawngsau la huk diang ngongngong na hi vele.

²⁴Gam sabiltung gamdai a om, a huklai a dak uau uau a dik vutvut bang; a utna kuan ahia dalzou ding? A zawngmi kihihgim nuam dah leh, a hun in a mu na ding uh.

²⁵Na khe ah khedap bunlou in om kenla, na dang leng hul kei heh; nang bel, lamet a beita, pautuam mite ka ngai a, amau ka delh ding, na chi hi.

²⁶Guta a phawk ua a zum bang in, Israel inkawte a zumta uh, amau, a kumpipate uh, a heutute uh, a siampute uh, a zawlneite uleng.

²⁷Singbul kiang a, Ka pa na hi, chi a, suangbul kiang a, Kei honsuang na hi, chi mite: masuan lou in a dekkhuk sah uh a honsuan zaw ua, a mangbat hun un bel, Thou inla, hon hondam tanla, a chi ding uh, na pathian, huai na bawlte koi a om ahita ua?

²⁸Amau thou zaw uhenla, na mangbat lai in a hon hondam kha theimoh ding uhia; aw Judah, na pathiante bel na khopite zah mah ahi ve ua oi!

²⁹Bangdia ka tung a vui nak? Na vek un ka tung ah thil na hihkhial ngal ua, chih TOUPA thupawt ahi.

³⁰Na tate uh ka khen a, a phatuam kei, a hoih loh tuankei uh; humpinelkai duhgawl bang mai in, noumau namsau in na zawlneite uh a ne khin uhi.

³¹Aw khangthakte aw, TOUPA thu thei un, Israel adin gamdai gam bang ka hi maw? Mial sah meuhmouh gam ka hi maw? Ka mite’n bangdia, ka pawt kichianta ua, ka hong kiknawn kei ding uh, chi uh ahia?

³²Nungak in a kizephoihnate a mangngilh thei in, mouthak in a kivatna a mangngilh thei ding maw? Ka mite’n ni simsenglouh sung in a hon na mangngilhta uhi.

³³Deihtakmi muh theihna ding in na omdan ngentel na chia! Numei gilou kiang ah leng na omdan na sinsakta ve.

³⁴Na nikte ah leng mi genthei poikhoihloute hinna sisan a lang a: na inn a buluh lai khutmat ahi kei uhi.

³⁵Ka mawh kei a, kei a kipan a hehna lakmang ahi, na chi nawn ngal a, ngai in, Ka gilou kei hi, na chih ziak in, na tungthu ka ngaihtuah ding.

³⁶Na omdan kheng mengmeng a, bangdia vialvak vak na hia? Assuria na zumpih bangmah in, Aigupta leng na zumpih lai ding hi.

³⁷Na khutte lukhuk in a kiang ua pan na pawt khe nawn dia, TOUPA’N lah na muannate a paikheta ngal a, amau ah na lamzang kei ding hi.