Read Paite Chin JEREMIAH 20 Bible Online

JEREMIAH 20 - Paite Chin bible

JEREMIAH 20

¹Huan Immer tapa, TOUPA inn a heutupa pen, siampu Pashur in Jeremiah in huai thute a gen chih a naza hi.

²Huchi in Pashur in zawlnei Jeremiah a khen a, TOUPA inn a Benjamin Kongpi saknung a koltanna ah a tangsak a.

³A zing in Pashur in Jeremiah a khahkhia a, huan Jeremiah in a kiang ah, TOUPA’N na min ding in Pashur a chi kei hi, Magermissabib a honchi zaw hi.

⁴TOUPA’N lah hichi in a chi ngal a: Ngai in, nang ading leh na lawmte tengteng ading in kihtak in k’on bawl ding: amau a melmate uh namsau in a puk ding ua, nang zaw na mit in na en lel ding. Judahte tengteng Babulon kumpipa khut ah ka pe vek ding: aman Babulon ah sal in a pi ding a, namsau in a that ding hi.

⁵Huaiban ah, khopi hauhna tengteng, a sepkhiak tengteng, a thil manpha tengteng leh Judah kumpipate gou tengteng a melmate uh khut ah ka pe ding a, amau a lok ding ua, a man ding ua, Babulon ah a pi ding uh.

⁶Huan, nang Pashur, na insung a om tengtengte toh sal ah na tang ding ua; Babulon ah na pai tei ding; huai ah na si ding a, huai ah vui in na om ding a, nang leh na lawm zuauthu na hilhsekte tengteng toh, a chi hi.

⁷Aw TOUPA, nang n’on khem a, khem a om keita ve, nang zaw kei sang in na hat a, n’on zou a; nitum in nuihsat ka hita, mi kuapeuh in a hon nuihsan uhi.

⁸Thu ka gen peuhmah chiang in, ka kikou khia a, hiamgamna leh siatna, chi in ka kikou; TOUPA thu bel kei ading in, nitum a dem leh muhsit lohna kia ahi.

⁹Amah ka kan kei ding a, a min in leng thu ka gen n’on sam kei ding, chi mah leng, ka guh sung a mei kang ki khumkhin bang mai in ka lungtang sung ah a om a, ka pai kinken zou kei a, ka pha zou mahmah kei hi.

¹⁰Mi tampi a guk phun uh ka za: kil chih ah lauhuai a om, hek unla, i hek khawm ding uh, chi in. Ka lawmte ka puk ding tang gigete’n, Khem in a om dia, i zou ding, a tung ah phu i la ding, a chi uhi.

¹¹Himahleh TOUPA mihangsan kihtakhuai mahmah bang in ka kiang ah a om a, a hon simmohte a puk ding ua, honzou kei ding uh. Zahlaktak in a om ding ua, a lohchin sinlouh ziak un. Tangtawn a a minsiatna uh mangngilh in a omkei ding.

¹²Aw sepaihte TOUPA, mi diktatte enchianpa, lungtang leh lungsim mu paisuakpa, a tung ua na phulak hon musak dihve, ka tungtang thu k’on kemsakta hi.

¹³TOUPA kiang ah lasa unla, TOUPA phat un; thil gilou hihmite khut a kipan panpih deihte hinna a humbitta hi.

¹⁴Ka piankhiak ni hamse thuak in om hen, ka nun a hon piansak ni vualzawl in om dah hen.

¹⁵Ka pa kiang a, Tapa na neita, chih thu hontun a, hong kipaksakmi tak hamse thuak in om hen.

¹⁶Huai mi, TOUPA’N hehpih hetlou a a sukgawp khuate bang in om hen, zingsang lam in kikou husa za henla, sun a hih chiang in galdou husa;

¹⁷Sul sung a a hon hihlup louh ziak in; huchi hihleh ka nu ka han himai ding hi a, a sul in tangtawn a honpai ding hi ven.

¹⁸Bangdia sul a kipan hongpawt chitchiat ka hia, semgim leh lungkham a om ding a zahlak mawngmawng a ka damsung nite zang ding in?