Read Paite Chin JEREMIAH 21 Bible Online

JEREMIAH 21 - Paite Chin bible

JEREMIAH 21

¹Kumpipa Zedekiah in Jeremiah kiang a Malkijah tapa Pashur leh siampu Maaseiah tapa Zephaniah a sawl lai a Jeremiah kiang a TOUPA a kipan a thu a hongtung hi:

²“Babulon kumpipa Nebukadnezzar in a hondou a, TOUPA’N a thilhih thupitak a hihsek bang in a honhuh nuam in, a kiknawn sak mai kha diam chih TOUPA hon dotsak dihve” chi in.

³Huan Jeremiah in a kiang uah, Zedekiah kiang ah hichibang in vagen un: Israelte Pathian, TOUPA’N hichi in a chi:

⁴Ngai in, Babulon kumpipa leh Kaldai mi, kulh pua a nang honumpa na douna galvan zat ka kiksak ding ahi; hiai khopi sung ah amau ka pikhawm ding.

⁵Keimahmah in leng heh leh lungkimlou mahmah leh thangpaitak in banzak in ban thahat zang in nang ka hondou ding.

⁶Hiai khua a teng mihingte leh gante ka that ding a, hipi in a si ding uh.

⁷Huai nung in, TOUPA thupawt in a chi, kumpipa Zedekiah leh a nungzuite leh midang hiai khua a hi leh namsau leh kial a siloute, Babulon kumpipa leh a melmate uh khut leh amau that tummite khut ah ka pe ding. Namsau hiam in a that ding a, a hehpih hetkei ding a, a hawi hetkei ding, a lainat sam kei ding.

⁸Huan hiai mipite kiang ah huchi in vagen in: TOUPA’N hichi in a chi: Ngai un, sihna lampi leh hinna lampi k’on koihsak hi.

⁹Hiai khopi sung a om namsau in hiam kial in hiam hi in hiam a si ding uh; Kaldai mite nou hon umpa kiang a pawt a kipiate bel a hing ding uh, a hinna uh kidouna kipahman ahi ding hi.

¹⁰Hiai khopi hoihna ding hilou, a siatna ding ka tum bilbel ahi: Babulon kumpipa khut a piak ahi ding a, aman mei in a hal ding, chih TOUPA thupawt ahi.

¹¹Judah kumpipa inkawte tungtang thu ah; TOUPA thu ngaikhia un,

¹²Aw David inkawte aw! TOUPA’N hichi in a chi: Zingsang in vai diktak in hawm unla, simmohmi khut a kipan loh thuakmi hunkhia unla, huchilou in zaw ka hehna mei bang in a pawt ding a, kuamah phelh vual louh ding in a kang dia, na thil hihgiloute uh ziak in.

¹³Ngai dih ua, guam zang a tengte aw, nou guam zang suangpi a teng a, Kuate ahia i omna ua honglut ding? chite aw, nou ka honlang ding hi. TOUPA thupawt in a chi.

¹⁴Na thilhih uh gah bangzel in k’on gawt ding a, a gam gammang ah mei ka khah ding a, a kim tengteng a kangmang ding, TOUPA thupawt in a chi.