Read Paite Chin JEREMIAH 22 Bible Online

JEREMIAH 22 - Paite Chin bible

JEREMIAH 22

¹TOUPA’N hichi in a chi: Judah kumpipa inn ah hohsuk inla, hiai thu vagen in.

²Aw Judah kumpipa, David tutphah tung a tu, nang leh na nungzuite leh na mi hiai kongkhak a lutte toh, TOUPA thu ngaikhia unla, chi in:

³TOUPA’N hichi in a chi: Diktak leh hoihtak in vai hawm unla; simmohmi khut a kipan loh thuakmi hunkhia unla; mikhualte, pa neiloute leh meithai tung ah diklouhna hiam hiamgamna hiam ching kei un; hiai mun ah mi hoih sisan leng suah sam kei un,

⁴Hiai thu zui ngei hile uchin zaw, David tutphah tung a kumpipate kangtalaite leh sakolte tung a tuang in, amaute, a nungzuite uh leh a mite uh hiai na inn kongkhakte uah a lut ngeingei ding uhi.

⁵Himahleh hiai thute na ngaihkhiak kei uleh, hiai in a segawp ding a, chi in, kei leh kei kilou in ka kichiam ahi, chih TOUPA thupawt ahi.

⁶TOUPA’N Judah kumpipa inkuan tungtang thu hichibang in a gen hi: Nangzaw kei ading in Gilead bang, Lebanon mualvum bang na hi: Himahleh gamdai ka hon suaksak ding, luahmi omlou khopi bang mai in.

⁷Nang hihmang dingte, galvan neichiatin, ka bawlkhol ding a; na sidar sing telte a phuk ding ua, mei ah a khul ding uh.

⁸Huan, namdang tampite’n hiai khopi a pal paisuak ding ua, michih in amau invengte kiang ah TOUPA’N hiai khopi thupi mahmah bangdia hichitak a hih hi ding ahia eita? a chi ding uh.

⁹A Pathian uh TOUPA thukhun a lehngatsan ua pathian dangte a biak ua, a na a sep ziak uh ahi, chi in a dawng ding uh.

¹⁰Misi kah kei unla, sun sam kei un; paimangmi bel nakpi mahmah in kah un, a hong kiknawn kei ding a, a pianna gam a muh nawn louh ding ziak in.

¹¹Judah kumpipa Shallum, Josiah sik a vaihawmpa, hiai mun a kipan paikheta tungtang thu bel TOUPA’N hichi in a chi: Hiai ah a hongkik nawnta kei ding.

¹²Sal a a pi na mun uah, huai mah ah a si ding a, hiai gam a mu nawnta kei ding.

¹³Diktatlouhna a inn lam a, diklouhna a dantan tungnungte bawlmi, a thawn a amah invengte tha zang, loh pe nuamlou mite tung a gik hi;

¹⁴Inn thupi mahmah ka kilam ding a, dantan tungnung zapite nei inn, tohlette ka hong ding a, sidar sing in ka thuap suak ding a, zesan ka nuh ding, chi mi tung mah.

¹⁵Sidar sing a vuallehpai na khen ziak in, kumpipa kisa na hi maw! na pa’n a ne in a dawn a, diktak in vai a hawm kei maw? Huai amah ding in a hoih ahi.

¹⁶Mi genthei leh tasamte vaihawm sak a, huai a hoih ahi. Hiai tak n’on theihdan ding ahi maw? chih TOUPA thupawt ahi.

¹⁷Himahleh na huaihamte ading in, mi hoih sisan suahna ding, nuaisiahna ding leh hiamgamna ding lel in na mit leh na lungsim na pu ahi.

¹⁸Huaiziak in Judahte kumpipa Jehoiakim, Josiah tapa tungthu bel TOUPA’N hichi in a gen a: Aw ka unaupa, chi in hiam, Aw ka sanggampa, chi in hiam amah a kah kei ding ua, Aw toupa, chi in hiam, Aw thupipen, chi in hiam amah a sun sam kei ding uh.

¹⁹Jerusalem kulh pawlam a lotkhiak a, paih in, sabiltung vui in a vui ding uh.

²⁰Lebanon ah paitou inla, kikou in, Bashan ah na aw suah inla, Abarim apan in kikou in, na itte tengteng a mangthangta ua.

²¹Na lohchin in na kiang ah thu ka gen a, nang lah ka ngaikhe kei ding, na chi a, ka kamsuak ngaihkhiak louh na tuailai kipan in hiai na omdan ahi.

²²Na belampute tengteng uh huih in a kivak ding ua, na mi itte sal in a tang ding ua, nang leng gitlouhna tengteng ziak in zahlaktak leh mangbangtak in na om ngei ding hi.

²³Aw Lebanon tang a teng, sidar sing lak a buseptu na tung a natna a tun a na hong hehpihhuai ding dan mai zaw! numei nauvei na bang mai in.

²⁴A hin a ka hin sung, chih TOUPA thupawt ahi; Judah kumpipa Koniah, Jehoiakim tapa bel ka khut taklam a sawnna zungbuh himah lechin, huai a kipan ka honbot ngeingei ding.

²⁵Thah ding a nang hon zawngmi khut ah, Babulon kumpipa Nebukadnezzar khut ah leh Kaldaite khut ah ngeingei nang k’on pe ding hi.

²⁶Na pianna hilou gamdang ah nang leh na nu nang honsuang k’on paikhe ding a, huai ah na si ding uh.

²⁷A lungsim ua kiknawn a ut mahmahna gam uah a kiknawn kei ding uh.

²⁸Hiai Koniah pen bel kitam gawp, simmohhuai ahi ka hia? Bel asung a lungkimna omlouhna ahi kei maw? Bangdia amah leh a suante paihkhiak a gam a theih ngeilouh ua paihkhiak a a om uh?

²⁹Aw, gam, gam, gam, TOUPA thu ngai in,

³⁰TOUPA’N hichi in a chi, Hiai mi ta neilou, a damsung a lohchinglou ding mi ahi, a suante kuamah lohching a, David tutphah tung a tu ding leh Judah gam a vaihawm nawn ding a omkei ding uh, chi in gelh in.