Read Paite Chin JEREMIAH 23 Bible Online

JEREMIAH 23 - Paite Chin bible

JEREMIAH 23

¹A Gam tatna mun a belam hih mangthang a dalhzaksak belamchingmite a tung uh a gik hi, chih TOUPA thupawt ahi.

²Huaiziak in TOUPA Israelte Pathian in ka mite chingpa belamchingmite tungtang thu ah hichi in a chi: Ka ganhonte na dalhsak ua, na delhmang ua, na veh kei uh, ngai un, na thilhih uh gilou ziak in nou k’ong veh ding, chih TOUPA thupawt ahi.

³Huan, ka ganhon omsunte ka delhzakna gam tengteng a kipan ka pikhawm nawn ding a, a huangsung uah ka hawlkhawm ding a, gah nuam mahmah ahi ding ua, a pung ding uh.

⁴Amau limsak ding amau ading in belamchingmi ka koih ding a, a lau nawnta kei ding ua, a kuamah a mang nawn kei ding uh, chih TOUPA thupawt ahi.

⁵Ngai dih ua, David adin Hiang diktat ka suahsak hun ding a hongtung dekta hi, chih TOUPA thupawt ahi; amah kumpipa in a tu ding a, piltak in a gamta ding a, gam pumpi ah dikna leh diktatna a tangtung sak ding.

⁶A hun sung in Judah hotdam ahi ding a, Israel bittak in a om ding. Huai a min ding a a sak ding uh hiai ahi, “TOUPA i diktatna uh ahi” chih.

⁷Huchi in, ngai dih ua, a hun a tung sinta, TOUPA thupawt in a chi. Israel mite “Aigupta gam a kipan a hon pikhepa TOUPA a hin a a hin sung, chi nawnlou in.

⁸Mallam gam leh a delhzakna gam tengteng a kipan Israel inkawte suante pikhia a, pikik nawnpa TOUPA a hin a a hin sung, a chi zawta ding uhi.” Huchi in, amau gam ngei ah a teng ding uh.

⁹Zawlneite tungtang thu pen, ka sung ah ka lungtang a puakkham hi, ka guh teng a ling a, zukham bang mai ka hi, zu in a zelh zoh mi bang mai in, TOUPA ziak leh a thu siangthou ziak in.

¹⁰Gam angkawm in a dim a, hamsia ziak in gam in a sun a, gamdai louhing munte a keu khinta; a lampi uh a gilou a, a hatna uh a dik kei hi.

¹¹Zawlneite leh siampute’n Pathian khawk a sa kei ua, ka inn sung mahmah ah leng a khelhna uh ka mu.

¹²Huaiziak in amau ading in a paina lampi uh, zan khomial lampi nal bang ahi ding a, huai ah delh in a om ding ua a tolhpuk ding ua, a tung uah thil hoihlou ka tungsak ding a, amau gawtna hun, TOUPA thupawt in a chi.

¹³Samaria zawlneite tung ah kihhuai ka mu, Baal lou in thu a gen ua, Israelte a pi mang uhi.

¹⁴Jerusalem a zawlneite tung ah thil mulkimhuai ka mu, ang a kawm ua, zuau in a gamta ua, thil gilou hihte khut a hatsak ua, kuamah in a gitlouh uh kisik a tuplouh loh uhi; kei ding in Sodom khua a mite bang a honghi vek ua, a khaw sung a mite tengteng leng Gomorrah khua a mite bang hial.

¹⁵Huaiziak in zawlnei hon tungtang thu ah sepaihte TOUPA’N hichi in a chi: Ngai dih ua, gamsai in ka vak ding a, thil kha ka dawnsak ding a; Jerusalem a zawlneite kiang a kipan in gam pumpi ah Pathian poisaklouhna lah a pawtta ngal a.

¹⁶Sepaihte TOUPA’N hichi in a chi: Zawlnei na kiang ua thugente thu ngaikhe kei un; bangmahlou a hon sinsak ua. TOUPA kam a kipan hilou amau lungsim geltawmte a gen uhi.

¹⁷TOUPA thu musitmite kiang ah, Nang ding in a hoih ding, a chi vial ua; amau deihlam engtat a hih teiteimite kiang ah, Thil hoihlou bangmah na tung ah a hongtung kei ding, a chi uh.

¹⁸TOUPA thugelna ah kua a pang ngei a, a thu sang a thei ding kua a om? Ahihleh a thu pen kuan ahia limsak a ngaikhia om?

¹⁹Ngai dih ua, TOUPA huihpi, hehna a pawtta, ahi, pingpei huihpi; migiloute lutang a nuai ding.

²⁰TOUPA hehna a mawk kik kei ding, a lungsim a a tup chinten a tangtungsak a, a hih khit phot masiah; ni nanung lam ah n’on theichian ding uh.

²¹Zawlneite bel ka sawl louhpi in a tai ua, a kiang ua thu ka gen louh in leng thu a gen uh.

²²Ka thugelna a om tei hile uzaw, ka thu ka mite kiang a phuang ding hi ve un, a thilhih diklou ua kipan lehngatsak ding hi ve un.

²³Gamlapi a om Pathian hilou in, Pathian nai gige ka hi hia? chih TOUPA thupawt ahi.

²⁴Mun kisel ah ka muhtheih louh dia bu theimi a om ua hia? chih TOUPA thupawt ahi. Lei leh van ah ka dim ahi kei maw? chih TOUPA thupawt ahi.

²⁵“Mang ka nei, mang ka nei, chi a ka min a zuaugen zawlneite thugen ka zata hi.”

²⁶Zawlnei zuau gente, amau lungtang kikhem tawm a thu sekmite lungtang ah hiai bang tan ahia a om ding?

²⁷Amau bel a invengte uh kiang ah a mang uh a hilh ua ka mite ka min mangngilh sak a tum ua, a pate un Baal ziak a ka min a mangngilh khit bang un,

²⁸Zawlnei mangnei in a mang gen hen, ka thu neimi in ka thutak diktak in gen hen. Buhpawl leh buhtang in kibatna bang a nei ua? chih TOUPA thupawt ahi.

²⁹Ka thu mei bang ahi kei maw, sek suang seknenna bang? chih TOUPA thupawt ahi.

³⁰Huaiziak in, ngai un, zawlnei hon, ka thu kiguksak tuah sekte ka dou ahi, chih “TOUPA thupawt” ahi.

³¹Ngai dih ua, zawlnei amah dangnal sak a, TOUPA’N a chi, chisekte ka dou ahi, chih TOUPA thupawt ahi.

³²Ngai dih ua, mang zuau leltak gen a, hilh a, a zuau thute uh leh a kiotsakna thu ginaloute uh ziak a ka mite pimang zawlneite ka dou ahi, TOUPA thupawt in a chi; ka sawl ngal kei a, thu lah ka pe kei a, hiai mipite a lohtak sak kei ding uh, chih TOUPA thupawt ahi.

³³Hiai mipite lak a mi kuahiam, zawlnei kuahiam in, siampu kuahiam in, “TOUPA puakgik bang ahia?” chi a a hondot leh hichi in na dawng ding hi, “Noumau mah puakgik pen na hi uh, k’on paimang ding” chih TOUPA thupawt ahi.

³⁴Zawlnei hiam, siampu hiam, mi kuahiam, TOUPA puakgik, chi a om uleh, huai mi leh a inkawte ka gawt ding.

³⁵Huchi in mi kuapeuh in a invengpa kiang ah leh kuapeuh in a unaupa kiang ah, TOUPA’N bangchi’n a dawng a. TOUPA’N bang a gen a? chi in na kidong ding uh.

³⁶TOUPA puakgik na loukha nawn kei ding ua, mi kuapeuh amah mah thugen a puakgik ahi ding hi. Pathian hing, sepaihte TOUPA, i Pathian thu ulah na lehbulh khinta ngal ua.

³⁷Zawlnei kiang ah, “TOUPA’N bangchi’n nang a hondawng a? TOUPA’N bang ahia a gen?” na chi ding.

³⁸Huan, “TOUPA puakgik, na chih peuhmah uleh, TOUPA’N hichi in a chi: TOUPA puakgik na chi ding uh ahi kei,” chi a ka honsawl a, TOUPA puakgik chi a thu na gen ziak in;

³⁹Huchi in, ngai un, “K’on mangngilh keuhkeuh ding a, noute leh hiai khopi na kiang uleh na pate uh kiang a ka na piaksa toh k’on paimang ding hi.

⁴⁰Huan, tangtawn demsiatna leh zahlak nilouhna mangngilh vuallouh na tung uah kontun ding hi.