Read Paite Chin JEREMIAH 24 Bible Online

JEREMIAH 24 - Paite Chin bible

JEREMIAH 24

¹TOUPA’N a hon ensak a, ngai dih, theipi bawm nih TOUPA biakin ma ah a kitung a, Babulon kumpipa Nebukadnezzar in Judahte kumpipa Jekoniah, Jehoiakim tapa leh Judah heutute, mi khutsiamte leh siksekmite toh Jerusalem a kipan a Babulon sal dia a pi nung in.

²Bawm khat ah theipi hoihtak, theipi min masa bang tak, a om a; bawm dang ah bel theipi hoihlou, nektak louh khop a sia a om hi.

³TOUPA’N ka kiang ah, “Bang ahia na muh, Jeremiah?” a chi a. Ken, “Theipi, theipi hoih, hoih mahmah; leh a hoihlou, nektak louh khop a sia” ka chi hi.

⁴Huan, TOUPA thu ka kiang ah a hongtung:

⁵TOUPA Israelte Pathian in hichi in a chi: Judah saltangte, Kaldaite gam a a thahna ding ua ka sawlkhiakte, hiai theipi hoih bang in ka en ding hi.

⁶A hoihna ding un a tung uah ka mit ka tusak ding a, hiai gam ah ka pikik nawn ding: amau ka dingsak ding a, ka phel kei ding; ka suan ding a, ka bot kei ding.

⁷Huchi in, TOUPA ka hi chih n’on theihna ding in lungtang k’on pe ding a: ka mite ahi ding ua, a Pathian uh ka hi ding: a lungtang tengteng utoh ka kiang ah a hongkik ding uhi.

⁸TOUPA’N hichi in a chi: Theipi sia, nektak louh khop a sia bang in Judah kumpipa Zedekiah leh a heutute uh leh Jerusalem a nituang hiai gam a omlaite leh Aigupta gam a tengte, ka lehngatsan ding hi:

⁹Haksatak a leitung gam teng lak ah sep leng ding in, ka delhmangnate gensiat leh tehpih leh tai leh hamsiat khum hi ding in ka tawpsan ding.

¹⁰Amau leh a pate uh kiang a ka piak gam a kipan valh khit a hih pha un a lak uah namsau, kial leh hi, ka sawl ding hi.