Read Paite Chin JEREMIAH 25 Bible Online

JEREMIAH 25 - Paite Chin bible

JEREMIAH 25

¹Judahte kumpipa, Jehoiakim, Josiah tapa kum lina a Judah mite tengteng tungtang a Jeremiah kiang a thu hongtung: Huai hun bel Babulon kumpipa Nebukadnezzar kum khatna ahi a,

²Huai thu zawlnei Jeremiah in Judah mi tengteng leh Jerusalem a om tengtengte kiang a a gen ahi.

³Kum sawmnih leh thum sung, Judahte kumpipa Josiah, Ammon tapa kum sawmlehthumna a kipan a tutan in, TOUPA thu a hongtung zel a, phalvak a thou in na kiang uah ka gengen a, himahleh na ngaikhe kei uh.

⁴TOUPA’N na kiang uah a nasemmi zawlneite tengteng a sawl a, phalvak a thou in a sawl a, himahleh na ngaikhe kei ua, thei ding in na bil uh na doh sam kei uh;

⁵Huai, zawlneite’n, “Michih noumau lampi gilou a kipan hongkik unla, TOUPA’N na kiang ua leh na pate uh kiang a nidanglai a kipan tangtawn a ding a nou a honpiak gam ah teng un:

⁶Pathian dangte kiang ah a na uh sem ding leh amau be ding leh na khut nasep ua ka lungkimlou sak ding in hohkei un; huchi in, k’on hihna kei ding hi, a chi uh.

⁷Himahleh nou ding a hoihlou ding a na khut nasep ua hon hehsak ding in n’on ngaikhe kei uh” TOUPA’N a chi hi.

⁸Huaiziak in sepaihte TOUPA’N hichi in a chi: Ka thu na ngaihkhiak louh ziak un, ngai dih ua,

⁹Mallam nam tengteng ka thukhak ding a, TOUPA thupawt in a chi. Ka nasempa Babulon kumpipa Nebukadnezzar leng ka thukhak ding a, amaute hiai gam leh asung a omte leh hiai kim a nam om tengteng sual ding in ka honpi ding a; ka hihmang sipsip ding a, lamdangsak ding leh enghou ding leh segawp nilouh ding in ka bawl ding.

¹⁰Huan a kiang ua kipan nuamsakna husa leh kipahna husate, mouneipa aw leh mou awte, buhgawi husa ging leh khawnvak vakte ka lamang ding.

¹¹Hiai avek in a se ding a, lamdangsak ahi ding; hiai namte’n Babulon kumpipa na kum sawmsagih a sem ding uh.

¹²Huan, kum sawmsagih a man hun chiang in Babulon kumpipa leh huai nam, Kaldaite gam, a gitlouhna uh ziak in ka gawt ding a; tangtawn in ka segawp sak ding, chih TOUPA thupawt ahi.

¹³Huai gam tung ah ka thu a tung ua ka gen tengteng, Jeremiah in namte tung a a gen, hiai laibu a gelhsa tengteng ka tungsak ding hi.

¹⁴Nam tuamtuam leh kumpipa thupi takte’n amaute in nna a kisep un, amau mahmah in leng amau nna a hon sepsak ding uhi.

¹⁵TOUPA Israelte Pathian in ka kiang ah hichi in a chi: Ka khut a hiai hehna uain nou la inla, k’on sawlna ding nam teng dawnsak in.

¹⁶A dawn ding ua, a hoi dongdong ding ua, a hai ding ua, a kiang ua ka sawl ding namsau ziak in chi in.

¹⁷Huchi in, TOUPA khut a nou ka la a, TOUPA’N hon sawlna nam teng ka dawnsak hi:

¹⁸Huai bel hiaite ahi uhi: Jerusalem leh Judah khopite, huai kumpipate leh heutute, siatgawpnate, lamdangsakte, enghou dingte, hamsiatte tang ding in, tua a omdan bang uh:

¹⁹Aigupta kumpipa Pharo leh a sikhate, a heutute leh a mi tengtengte;

²⁰Milak a hel tengteng; Uz gam a kumpipa teng; Philistia gam a kumpipa tengteng, Askelon leh Gaza leh Ekron leh Ashdod a omsunte kumpipate;

²¹Edom leh Moab leh Ammon suante;

²²Tura kumpipa tengteng leh Sidon kumpipate leh tuipi gei kumpipate;

²³Dedan leh Tema leh Buz leh a bak sam uh mette tengteng;

²⁴Arabia kumpipa tengteng, Gamdai a teng nam kihelte kumpipate;

²⁵Zimri kumpipa tengteng; Elam kumpipa tengteng; Media kumpipa tengteng;

²⁶Mallam kumpipa tengteng, a gamla leh a nai a mi a kizom zel in; leitung a kumpi om tengteng in a dawn khit chiang in Seshak kumpipa’n a dawn ding hi.

²⁷Huan, a kiang uah sepaihte TOUPA, Israelte Pathian in hichi in a chi: Dawn unla, kham unla, lau unla, kipuk unla thou nawn kei un, namsau na lak ua ka sawl ding ziak in, chi in.

²⁸Huan, na khut a nou pen dawn ding a a lak nop kei uleh huchi in na chi ding: sepaihte TOUPA’N hichi in a chi: Na dawn ngeingei ding uh; hiai,

²⁹Ka min tam khopi ah thil hoihlou ka hih pan a, noute gawtlouh hial in na om ding umaw? Gawtlouh in na omkei ding ua; lei a teng tengteng tung ah namsau ka kan ding, chih sepaihte TOUPA thupawt ahi.

³⁰Huaiziak in a tung ah hiaite gen inla, a kiang uah huchi in chi in: TOUPA mun sang a kipan in a thum ding, a tenna siangthou a kipan a aw a suah ding, a huang tung ah nakpi’n a thum ding; grep sukmite bang in a kikou ding, lei luahte teng tung ah.

³¹Lei tawppha in husa a thangkik ding a, TOUPA’N namte a lang a, sa tengteng tung ah vai a hawm ding, mi thuginalou zaw namsau kiang ah a pe ding, TOUPA thupawt in a chi.

³²Sepaihte TOUPA’N hichi in a chi: Ngai in, thil hoihlou in namchih a honnuai ding hi, huihpi hat mahmah lei mun tawp a kipan in a hong kuan ding hi.

³³Huai ni chia TOUPA thahte’n lei tawp a kipan in lei tawppha in a khak ding ua; sun louh leh khop louh leh vui louh in a om ding ua; leitung a eklei lel ahi ding uh.

³⁴Belamchingmite aw kikou tuaituai unla, kap un, nou belamhon lak a makaite aw, kitung buatbuat un, thah a na om ni uleh na dalhzak nite uh a hongtung petmahta hi. Bel deihhuai bang in na puk ding uh.

³⁵Belamching mite’n taimangna lampi a neikei ding ua, belamhon lak a makaite’n leng pelhna lampi a neikei ding uh.

³⁶Belamchingmite kah husa, belamhon lak a makaite mau ging toh, TOUPA’N a tatna mun uh a suksiat lel ziak in.

³⁷Huang muanhuaite daihsak sipsip in a omta ua, TOUPA heh mahmah ziak in.

³⁸A bukna pawtsanta, humpinelkai bang in, nuaisiahna namsau lauhuai ziak leh, a heh mahmah ziak in a gam uh a sekhinta hi.