Read Paite Chin JEREMIAH 26 Bible Online

JEREMIAH 26 - Paite Chin bible

JEREMIAH 26

¹Judah kumpipa Josiah tapa Jehoiakim vaihawm pattung in hiai thu TOUPA kiang a kipan a hongtung hi:

²TOUPA’N hichi in a chi: TOUPA inn huangsung ah ding inla, Judah khopi tengteng Pathian be ding a TOUPA inn a hongpaite kiang ah a kiang ua gen ding a thu ka honpiak tengteng khat lel leng im lou in genvek in.

³Michih in a omdan gilou uh paisan in a ngaikhe zenzen mawh ding uhia, a thilhih gilou uh ziak a a tung ua thil hoihlou hih ka tup ka khek theihna ding in.

⁴Nang a kiang uah, TOUPA’N hichi in a chi: n’on ngaihkhiak louh ua, ka dan na ma ua ka koih na zuih louh ua,

⁵Zing pipi a thou a amau ka sawlna kiang ua ka sawl ka nasemmi zawlnei thu na limsak kei uleh;

⁶Hiai inn Siloh bang in ka bawl ding a, leitung a nam tengtengte hamsia thuak ding in ka bawl ding, na chi ding hi.

⁷Huan, siampute, zawlneite leh mipi tengteng in TOUPA inn a Jeremiah in hiai thu a gen a ngaikhia uhi.

⁸Huchi in, hichi ahia, mipi tengteng kiang a gen ding a TOUPA’N a piak teng a gen khit in, siampute, zawlneite leh mipi tengteng in amah a manta ua, “Si peuhmah niteh!”

⁹Bangdia TOUPA min lou a, “Hiai inn Siloh bang ahi ding, hiai khopi luahmi omlou in a segawp ding, chia gen na hia?” a chi ua. Huchi in TOUPA inn a mipi tengteng in Jeremiah a boh lutlut uh.

¹⁰Judah heutute’n hiai thu a zak un, kumpipa inn a kipan in TOUPA inn lutna Toupa inn kongpi thak ah a tu uhi.

¹¹Huchi in, siampute leh zawlneite’n heutute leh mipi tengteng kiang ah, “Hiai mi sitak ahi, khopi siat ding thu, na bil ua na zak bang un a genkhol ngal a” a chi uhi.

¹²Huan, heutute leh mipi tengteng kiang ah Jeremiah in, “Na thu ngaihkhiak khitsate uh bang in hiai inn leh hiai khopi siat ding thu gen ding in TOUPA’N kei a honsawl ahi.

¹³Huaiziak in tuin na omdan uleh na gamtatdan uh bawlhoih unla, TOUPA na Pathian uh thu mang un; huchi in TOUPA’N na tung ua thil hoihlou tungding a phuankhiaksa a kikhelsak thei ding.

¹⁴Kei ka hihleh, na khut ua om ka hi. Dik leh hoih na chih bang un hon bawl un.

¹⁵Na honthah uleh, noumau leh hiai khopi leh khua leh tuite tung ah mi hoih sisan na tungsak ding uh chih thei mai un; a diktak in na bil ua hiai thute gen dia TOUPA’N na kiang ua honsawl ka hi” a chi hi.

¹⁶Huchi in heutute leh mipite’n, siampute leh zawlneite kiang ah, “Hiai mi a sih ding ahi kei, TOUPA i Pathian mun a i kiang ua thu gen ahi” a chi uhi.

¹⁷Huan, huai gam Upa kuate hiam a hong dingua, mipi omkhawmte kiang ah,

¹⁸“Mikah, Moreseth mi’n Judah kumpipa Hezekiah vaihawm lai in thu a gen a, Judah mi tengteng kiang ah, Sepaihte TOUPA’N hichi in a chi: Zion lou bang a leh ahi ding a, Jerusalem thil se omkhawm ahi ding, a inn mual gammang mun sang bang ahi ding” a chi hi.

¹⁹Judah kumpipa Hezekiah leh Judahte tengteng in amah a that uhia? TOUPA lau in TOUPA deihsakna a ngen ua, TOUPA’N a tung ua thil hoihlou tung ding a phuan a kikhelsak ahi kei maw? En zaw i tung ua thil hoihlou tungsak ding i hi ve ua! a chi hi.

²⁰Huan, midang, TOUPA min a thugen Keriath jearim a mi Semaiah tapa Uriah mah leng a om a, Jeremiah thugen tengteng mah bang in hiai gam leh khopi siat ding thu a gen hi.

²¹Kumpipa Jehoiakim leh a mi thupite leh heutute in a zak un kumpipa’n hihlup a tuma; himahleh Uriah in a zak in a lau a, a taimang a, Aigupta gam ah a paita hi.

²²Kumpipa Jehoiakim in Aigupta gam ah mi a sawl a, Akbor tapa Elnathan leh midangte toh;

²³Huchi in, Aigupta gam a kipan in Uriah a pi khia ua, kumpipa Jehoiakim kiang ah a honpi ua, huai in namsau in a that a, a luang vantang han ah a pailut ua, a chi uhi.

²⁴Himahleh Saphan tapa Ahikam in Jeremiah a gum a, huchi in hihlup ding in mipite kiang ah piak ahita kei hi.