Read Paite Chin JEREMIAH 29 Bible Online

JEREMIAH 29 - Paite Chin bible

JEREMIAH 29

¹Zawlnei Jeremiah in Jerusalem a kipan a saltang upate, siampute, zawlneite, midangte, Nebukadnezzar in Jerusalem a kipan a Babulon a a pi khit, a damsunte kiang a a laikhak thu hiai ahi:

²Kumpipa Jekoniahte, kumpinute, michilgehte, Judah leh Jerusalem heutute, mi khutsiamte, siksekmite Jerusalem a paikhiak nung ua;

³Sha-phan tapa, Elasah leh Hilkiah tapa, Gemariahte khut ah a khak hi: huaite bel Judah kumpipa Zedekiah in Babulon gam a Babulon kumpipa Nebukadnezzar kiang a a sawlte ahi uh:

⁴Israel Pathian, sepaihte TOUPA’N saltang tengteng, Jerusalem a kipan Babulon sal dia ka pisaksate kiang ah hichi in a chi:

⁵Inn lam unla, huai ah teng un, huan bawl unla, a gah ne unla, zi nei unla, tanute tapate nei un;

⁶Na tapate uh zi neisak unla, na tanute uh pasal neisak unla, tanu tapa a neih theihna ding un: huai ah hongpung unla, kiam lam nawt kei un:

⁷Sal dia k’on tansakna khopi hoihna ding zong unla, TOUPA kiang ah ngetsak un: amah hoihna ah nou leng hoihna na mu ding uhi.

⁸Israel Pathian, sepaihte TOUPA’N hichi in a chi: Na lak ua zawlneite leh aisansiamte’n honkhem kei uhenla, a mang a mat uh leng ngaikhe sam kei un.

⁹Ka min sial in zuauthu na kiang ah a gen uhi: kei sawl ahi kei ua, chih TOUPA thupawt ahi.

¹⁰TOUPA’N hichi in a chi ngal a, Babulon ading in kum sawmsagih a chin chiang in ka hongveh ding a, na kiang ua ka thuchiam hoihtak ka tungsak ding, hiai mun ah k’on kiknawn sak ding.

¹¹Nou lam a ka lungsim putdan ka kithei hi, na hun nanung tawp ua lametna leh tunung honpe ding in thil hoihlou hilou in hoihna ngaihtuah ka hi.

¹²Huan, n’on kan ding ua, ka kiang ah n’ong thum ding ua, k’on ngaikhe ding hi.

¹³N’on zong ding ua, na lungtang tengteng ua n’on zon hun chiang un n’on mu ding uhi.

¹⁴Huchi in, n’on muh un ka om ding, TOUPA thupawt in a chi, na omdan uh ka kheng ding a, nam tengteng lak a k’on dalhsakna mun a kipan k’on pikhawm nawn ding, chih TOUPA thupawt ahi; sal dia k’on matsakna mun ngei ah k’on tungsak nawn ding hi, chi in.

¹⁵“TOUPA’N Babulon gam ah leng zawlnei hon bawlsak” na chi ua.

¹⁶TOUPA’N David tutphah ah kumpipa tungtang thu leh hiai khopi a teng mipi tengteng, sal dia pi tellouh, na unaute uh tungtang thu ah hichi in a chi hi:

¹⁷Sepaihte TOUPA’N hichi in a chi: Ngai un, a tung uah namsau, kial leh hipi in ka delhzui ding a, theipi hut, a hoihlouh mahmah ziak a nek tuak hetlou bang mai in ka bawl ding.

¹⁸Namsau, kial, hipi in ka delhzui ding a, leitung a lalna gam tengteng lak ah thil mulkimhuaitak in ka bawl ding a, amau ka dalhsakna nam tengteng lak ah hamsethuak din, lamdang sak chiat din, hamsiat khum, selphou leh gensiat hi ding in ka bawl ding hi.

¹⁹Phalvak a thou a ka nasem, zawlnei zang a ka thu na kiang ua ka hontut khawk a sak louh ziak un. TOUPA thupawt in a chi: na ngaikhe nuam ngal kei ua, chih TOUPA thupawt ahi.

²⁰Huaiziak in nou Jerusalem a kipan a Babulon a ka sawl, saltang tengteng aw, TOUPA thu ngaikhia un.

²¹Israel Pathian, sepaihte TOUPA’N Kolaiah tapa, Ahab leh Maaseiahtapa, Zedekiah ka minsial a na kiang ua zuauthu genmite tungtang thu ah hichi in a chi: Ngai un, Babulon kumpipa Nebukadnezzar khut ah ka mansak ding hi; na mitmuh ngei un a that ding:

²²Amau thu ah Babulon gam a Judah saltang tengteng in, “Babulon kumpipa’n mei a a em Zedekiah leh Ahab bang mai in TOUPA’N na tung ah hih hen” chih hamse lohna in a neih loh ding uh.

²³Israel gam ah thil haihuaitak a hih ua, invengte uh zite ang a kawm ua, ka minsial in ka thupiak louh in zuauthu a gen ziak un; kei a theipa leh a theihpihpa ka hi, chih TOUPA thupawt ahi.

²⁴Nehelam mi, Semaiah tungtang thu ah nang hichi a na gen ding ahi.

²⁵Israel Pathian, sepaihte TOUPA’N hichi in a chi a, Jerusalem mipi tengtengte kiang ah nangmah min mahmah in lai na khak hi.

²⁶TOUPA’N siampu Jehoiada sik in siampu di’n nang a honbawl a, TOUPA inn kemmi na hi ua, mihai, zawlnei kichi peuhte kemte, sikkolte na butsak ding ahi.

²⁷Huchi in bangdia Anathoth khua a mi Jeremiah, na kiang ua zawlnei kichi na taihilh louh uh?

²⁸Babulon gam ah i kiang uah, “Saltanna ding a sawt ding a, inn lam unla, hiai ah teng unla, huan bawl unla, a gah ne un, chih thu a honkhak hi” chi in.

²⁹Huan, siampu Zephaniah in huai laikhak zawlnei Jeremiah zak in a sim hi.

³⁰Huchi in, Jeremiah kiang ah TOUPA thu a hongtungta.

³¹Saltangte tengteng kiang ah, Nehelam mi Semaiah tungtang thu ah TOUPA’N huchi in a a chi: Ka sawl hetlouh in Semaiah in na kiang uah thu a gen a, zuauthu nou a hon gingta sak a.

³²Huaiziak in TOUPA’Nhichi in a chi: Ngai un, Nehelam mi Semaiah leh a suante ka gawt ding a, hiai mite lak ah mi khat lel leng a neikei ding, ka mite ding a thil hoih ka hih ding a mu kei ding: TOUPA tung ah helna thu a gen ziak in, chih TOUPA thupawt ahi, chi in khak in a chi hi.