Read Paite Chin JEREMIAH 3 Bible Online

JEREMIAH 3 - Paite Chin bible

JEREMIAH 3

¹Min zi ma henla, a zi in paisan in pasal dang nei leh, aman a na nei nawn diam? A gam in nitloh hial lou ding hia? chih a om. Nang bel tangval tampi kiang ah na hukmang in, huchipi in ka kiang ah na hongkik nawn ding maw? chih TOUPA thupawt ahi.

²Tang giau viauvuau lam ah na mitte lengtou sak inla, en in, a hon luppih louhna mun koi ah? Gamdai a Arabia mi bang mai in amau ngak in lampi gei te ah na tu nilouh sek, na hukna leh na thulimlouhnate in gam na hihnin khinta hi.

³Huaiziak in vuah zuksak ahi kei a, vuah nanung leng a zu sam kei; mihuk talpuak in na pua, na zum hetkei hi.

⁴Ka pa, ka tuailai a honpipa na hi, chi in, tua kipan in na sam kei ding maw?

⁵Na heh tawntung ding ahia? A thangpaihna a omden ding ahia? Ngai in, huchibang in na pau ngei a, himahleh a gilou thei bangpen in thil na hih hi.

⁶Huai lou leng Josiah vaihawm lai in TOUPA’N ka kiang ah hichi in a chi a: Nungkin hat Israel thilhih na mu hia? Tang sang chih a kuantoua, singbawk chih nuaite a a hukna thil a hihte?

⁷Huan ken bel hiai thil tengteng a hihnung in ka kiang ah a hongkik nawn ding, ka chi a; himahleh a hongkik tuankei; huchi in, a sanggamnu, khemhat Judah in a mu samta hi.

⁸Aman nungkin hat Israel a angkawm ziak a ka mak a, makna lai ka piak a muh in leng a sanggamnu, khemhat Judah in a lau tuankei, huchih naksang in a vahoh a, hukna thil a va hihteita hi.

⁹Huan a huk mawkmawk zenhouh ziak in gam a hihnin khinta a; singbul, suangbul kiang ah ang a kawmta hi.

¹⁰Huchipi in leng a sanggamnu, khemhat Judah lungtangtaka ka kiang a hongkik lou in a zuaulel in a hongkik a, chih TOUPA thupawt ahi.

¹¹Huan TOUPA’N ka kiang ah hichi in a chi a: Nungkin hat Israel in a sanggamnu, khemhat Judah sang in diktat zaw in a kihih lang a.

¹²Kuan inla, hiai thu mallam ah vaphuang in; Nungkin hat Israel hongkik in, chih TOUPA thupawt ahi; Heh melpu in k’on enkei ding a, zahngaithei tak ka hi ngal a, chih TOUPA thupawt ahi, ka heh tawntung kei ding hi.

¹³TOUPA na Pathian tung a na helnate, singbawk nuai a pautuam mite kiang a na kiphal gaihnate, ka paukam suak na manlouhnate a na thulimlouhna ah thupha tawi in, chih TOUPA thupawt ahi.

¹⁴Aw nungkin hat tate aw, hongkik un, chih TOUPA thupawt ahi. Nou hon honpa ka hi ngal a, na lak ua kipan khopi a mi khat, inkuan a mi nih ka honla ding a, Zion ah ka honpi ding hi.

¹⁵Ka lungtuak lamtak belamchingte k’on pe ding a, amau theihna leh theihsiamnate in nou a honvak ding uh.

¹⁶Huchi in na hongtam ua, gam a na hongpun chiang un, huai ni chiang in amau, TOUPA thukhun bawm, a chi ngei nawn kei ding uh; a lungsim uah a lut kei ding a, theih leng a theigige sam kei ding uh; a khelah nawn kei ding ua, a bawl nawn kei ding uh.

¹⁷Huai nung in Jerusalem bel TOUPA mangtutphah a chi ding ua, huai ah nam tengteng TOUPA min in Jerusalem ah a hong paikhawm ding uh: a lungtang gilou khauhna uh bang in a paita kei ding uh.

¹⁸Huai ni chiang in Judah inkawte Israel inkawte toh a omkhawm ding ua, mallam gam a kipan in, na pipute uh kiang a gouluah ding a ka piak gam ah, a hong pawtkhe ding uh.

¹⁹Ken bel, Nam tampite lak a gouluah ding hoih pen, gam nuam tak honpia in, tate lak a honkoih ka utdan! Ka pa, chi a n’on sap a, n’on zuihna a kipan na pial mang kei ding chih ka na um hi.

²⁰Zi khemhat pasal angkawm san bang in, Aw Israel inkawte aw, honkhem neita ve ua, chih TOUPA thupawt ahi.

²¹Tang giau velvul tung ah husa a om hi, Israel tate kap leh thil ngen husa, TOUPA Pathian a mangngilh ua, a omdan uh a hihgawp ziak un.

²²A nungkin hat tate aw, hongkik unla, na nungkin seknate uh ka hihdam ding hi: en dih, na kiang ah ka hongpai uhi, nang TOUPA ka Pathian uh na hi.

²³Tangte a hotdamna lamet a thawn ahi, tang tung a husa chiak vengvungte; Israel hotdamna zaw TOUPA i Pathian kia ah ahi a om.

²⁴Himahleh huai thil kihhuai mahmah in i tuailai a kipan i pipute’n tha a sukbeina uh a ne beita hi; a belamhonte uh, a ganhonte uh, a tanute uh, a tapate uh tan in.

²⁵Zum in lum ni e, i zahlakna in honkhuh heh; TOUPA i Pathian tung ah thil i hihkhial ua, ei leh i pipute’n i tuailai a kipan tunitan in TOUPA i Pathian paukam i mang kei uhi.