Read Paite Chin JEREMIAH 30 Bible Online

JEREMIAH 30 - Paite Chin bible

JEREMIAH 30

¹Jeremiah kiang ah TOUPA a kipan thu hongtung a:

²TOUPA Israel Pathian in hichi in a chi: Na kiang a thu ka gen tengteng laibu ah gelh in, chi in.

³Ngai in, Israel leh Judah, ka mite omdan ka kikhelsakna ding nite a hongtung lellel hi; gam, a pipute uh kiang a ka piak ah ka pikik nawn ding a, a luahta ding uh, chih TOUPA thupawt ahi, chi in TOUPA’N a chi.

⁴Huan, Judah leh Israel tungtang thu a TOUPA thugen hiaite ahi.

⁵TOUPA’N hichi in a chi ahi: Lauthawngna husa ka za ua, launa kikou husa, muanna hilou in.

⁶Dong vialvial unla, en vialvial dih ua, pasal in nau a vei ngei uhia? Bangdia numei nauvei bang zen a, pasal a tai uh a dep chiat ua, a melte uh a hong molh khit?

⁷Maizen aw! Huai ni thupi hina mai e, a kibatpih mahmah a omkei, Jakob mangbat ni ahi mah ngut hi, himahleh hotkhiak in a om ding.

⁸Huai ni’n hichi ahi ding a, a hakkol puak ka hihtan ding a, a khau leng ka kitatsak ding: pautuam mite’n amah nasempa ding in a zang ngei nawn kei ding uh.

⁹TOUPA a Pathian uh leh a kumpipa uh ding a ka tunding ding David na a sem zaw ding uhi.

¹⁰Huaiziak in, aw ka nasempa Jakob, Lau het ken aw, Israel lunglel hetken, chih TOUPA thupawt ahi. Ngai in, gamlapi a kipan in ka hong hunkhe ding a, a saltanna ua kipan na suante ngei, huan Jakob a kiknawn ding a, kuamah in a lausak ngei nawn kei ding uh.

¹¹Nang honhun ding in na kiang ah ka om gige ngal a, k’on dalhsakna nam tengteng, ka beisak ding a, nang bel beisak lou in: a hunlel in k’on gawt ding a, gawtlouh in na pawt hetkei ding, chih TOUPA thupawt ahi.

¹²TOUPA’N hichi in a chi ngal a, Na liamna hihdam theih ahi kei a, na meima a thupi hi.

¹³Nang hon panpih ding a omkei ua, na damna ding damdawi a omsam kei hi.

¹⁴Nang honitte’n a hon mangngilhta ua, hon limsakta kei uhi: melma liamna in k’on liamsak a, dawmlou in k’on gawt hi, na thulimlouhna a thupi a, na thilhih giloute a pun ziak in.

¹⁵Bangdia na liamziak a kap na hia? Na liamna hihdam theih ahi kei, na thulimlouhna a thupi a, na thilhih khelhte a pun ziak in, hiai thilte na tung a hih ka hi.

¹⁶Himahleh nang hon negaite, nekgaih in a om ding ua, na melmate michih, sal dia pi in a om ding uh, nang honlokte loh in a om ding ua, gallak a honlate gallak in ka la ding hi.

¹⁷K’on damsak nawn ding a, na liamnate ka hihdam ding; TOUPA thupawt in a chi; Delhkhiak, a honchi ua, Kuamah limsaklouh Zion ahi, a honchih ziak un.

¹⁸TOUPA’N hichi in a chi, Ngai in, Jakob puanin saltangte ka lehhei ding a, a tenna munte ka hehpih ding a, a khopi a omna mual ngei ah lam ahi ding a, a kumpipa in a omdan ngei in ading nawn ding.

¹⁹Kipahthugenna leh nuamsakna husa, huaite apan a hong pawtkhe ding a, Mite ka pungsak ding a, a tawm kei ding uh, amau ka hihthupi ding a, a neu kei ding uh.

²⁰A tate uh leng nidanglai bang in a om ding ua, ka ma ah a pungkhawm un a kip ding ua; amaute nuaisiahmite peuhmah ka gawt ding hi.

²¹A heutupa uh amau mi mah ahi ding a, a vaihawmpa uh amau lak a hongpawt mah ahi ding; a honnaih ding a, amah ka bawl dia, aman a honnaih ding; kua ahia amah thu a honnaih ngam ding, chih TOUPA thupawt ahi.

²²Huan ka mite na hi ding ua, kei na Pathian uh ka hi ding.

²³Ngai un, TOUPA huihpi, a hehna huihpi hat mahmah a pawtkheta a: migiloute lu a nuai ek ding hi.

²⁴A lungtang tupnate a tangtun a a hih khit masiah, TOUPA hehna lauhuai mahmah a kikhel kei ding: ni nanungte ah n’on theisiam ding uhi.