Read Paite Chin JEREMIAH 31 Bible Online

JEREMIAH 31 - Paite Chin bible

JEREMIAH 31

¹Huai hun chiang in kei Israel inkuante Pathian ka hi ding a, amau leng ka mite ahi ding uh, chih TOUPA thupawt ahi.

²TOUPA’N hichi in a chi: Namsau thah valte, gamdai gam a ka khawl tawldamsak lai in hehpihna a mu ua, Israel mahmah ka tawldamsak lai in.

³Nidang a ka kiang a TOUPA hong kilang in, hichi in a chi: Ahi, it tawplou in ka hon it a, huaiziak in lainatna in ka hon kai hi.

⁴K’on ding thaksak ding, aw: nungak siangthou Israel, din kipsak na honghi ding a, na khuangte toh kizem in na om nawn ding a, nuamsak lai lamna munte ah na tel ding hi.

⁵Grephuante Samaria tangdung tawn in na bawl ding a, a tengmite’n a ching ding ua, a gahte a ne ding uhi.

⁶Ephraim tanggamte ah, chingmite kikou ni a tung ding hi. Thou un, Zion ah i hoh ding uh, TOUPA i Pathian uh kiang ah, chi in.

⁷TOUPA’N hichi in a chi hi, Jakob ading in nuam in lasa unla, nam thupipen ading in kikou khia un, phuang unla, pahtawi unla, TOUPA Israel omsun, na mite hondam in, chi un.

⁸Ngai un, mal gam a kipan in ka honpi ding, kawlmong tawp a kipan ka kaikhawm ding, mittaw, khebai, numei naupaite, nauvei lelte toh, mipi thupitak a hongtung khawm ding uh.

⁹Khitui toh a hongpai ding ua, khamuangtak in ka pi ding, tui luang lamte ah ka vaksak ding a, a kisuih louhna ding uh lamtangte ah; Israel ading in pa ka hi a, Ephraim bel ka ta chil ahi.

¹⁰Aw namte aw, TOUPA thu ngaikhia unla, tui gei gam gamlapi ah phuang unla, Israel dalhsakpa’n a pikhawm nawn ding a, Belamchingpa’n a belamte a kem bang in a kem ding chi in.

¹¹Jakob bel TOUPA’N a tankhia a, a sang a hat apan a hunkheta hi.

¹²Zion vum ah lasa in a hongpai ding ua, TOUPA hoihna ah a kipak ding ua, buhte, uainte, thaute, belam leh ganhon noute tungte ah a kipak ding uh; a hinna uh tui a vak huan bang ahi ding a, tangtawn in a lungkham nawn kei ding uh.

¹³Huan, nungak siangthoute lam in a nuam ding ua, tangvalte leng a tek a khang in a nuam ding ua, a lusunna uh kipahna ka suaksak in ka khamuan ding, a dahna ua pan ka kipaksak ding.

¹⁴Siampute hinna thau in ka taisak ding a, ka hoihna in ka mite leng a tai ding uh, chih TOUPA thupawt ahi.

¹⁵TOUPA’N hichi in a chi: Ramah khua ah husa a za ua, misi ngai a kap huphup, Rakil in a tate a kah a, a tate a om nawnlouh ziak in a khamuan theih kei hi.

¹⁶TOUPA’N hichi in a chi: Kap lou ding in na aw dek inla, na khitui hul hen, na thilhih in kipahman a nei ding chih TOUPA thupawt ahi. Gal gam a kipan in a hong painawn ding uhi.

¹⁷Na hun tawp lam ading in lametna a om a, amau gam ah na tate hong kiknawn ding uh, chih TOUPA thupawt ahi.

¹⁸Ephraim kah leh mauna ka za hi, nang n’on gawt a, bawngtal tuai sawi bang mai in sawi ka hi a, Na kiang ah hon kiksak inla, ka kik ding hi, TOUPA ka Pathian na hi ngal a.

¹⁹N’on kiksak khitnung in ka kisik a, n’on thuzoh nung in ka pheipi ka beng a, ka zum a, ahi, ka tuailai minsiat thuak in ka amhai hi, a chi hi.

²⁰Ephraim bel ka tapa deihtak, ka nau deihtak a hih ziak hia amah ka thunun teng a ka lungtang a a ten chinten nak? Huchi in ka lungtang in amah a lainat sek a, a tung ah zah ka ngai ding, chih TOUPA thupawt ahi.

²¹Lampi chiamtehna kibawl inla, nang ading in lampi kawkmuhna phut in, na vapawtna lam lampi, lampipen lamngei chiamteh chinten in: aw nungak siangthou, Israel, hong kiknawn in, na khopi ngei ah.

²²Aw, nang tanu nungtawn, bang tan ahia na vial vakvak ding? TOUPA’N lei ah thil thak a bawl ta a, numei in pasal a hum zawta hi.

²³Israel Pathian, sepaihte TOUPA’N hichi in a chi: A saltanna ua kipan ka pikik hun chiang in Judah gam leh a khopite ah hichibang paukam a zang nawn ding uh: Aw, diktatna tenna mun, Aw tang siangthou, TOUPA’N hon vualzawl hen, chih.

²⁴Huai ah Judahte leh a khopi ua mi tengteng a teng khawm ding ua, louneimite leh ganvulmite toh.

²⁵Mi bahte ka taisakta a, mi lungkham peuhmahte leng ka hihhalhta hi.

²⁶Huchi in ka honghalh a, ka nga vialvial a, mang hoihtak a na hi.

²⁷Ngai dih, nite a hongtung ding hi, Israel inkawte leh Judah inkawte ah mihing chi leh gan chi ka tuh ding, chih TOUPA thupawt ahi.

²⁸Huan, hichi ahi ding a, amau botkhia a, hihzan leh paikhia a, hihmang a, hihgim ding a ka tan bang in amau ding hoihsak ding leh tungding ding in ka enkhe nawn ding, chih TOUPA thupawt ahi.

²⁹Huai nite in, Pate’n grep thuk a ne ua, a tate uh ha a zau a, a chinawn ngeikei ding uh.

³⁰Michih in amau gitlouhna a sihpih zaw ding ua, grep thuk ne peuhmah ha a zau ding hi.

³¹Ngai dih, nite a hongtung ding, chih TOUPA thupawt ahi: huai nite ah Israel inkawte leh Judah inkawte kiang ah thukhun thak ka bawl ding.

³²A pipute uh Aigupta gam a kipan a pikhe ding a a khut uh ka let ni a ka thukhun bang hilou in, amau dia heute ka hih in leng ka thukhun a boh sia ua, chih TOUPA thupawt ahi.

³³Huaini khit chiang a Israel inkawte kiang a ka thukhun ding bel hiai ahi, chih TOUPA thupawt ahi: a sunggil uah ka thupiak ka koih ding a, a lungtang uah ka gelh lai ding a, kei a Pathian uh ka hi ding a, amau ka mite ahi ding uh;

³⁴Kuamah in, TOUPA thei in, chi in amau invengte leh amau unau a hilh kei ding ua; a neupen a kipan in a lianpen tan in avek un a hon theichiat ding uh, chih TOUPA thupawt ahi: a bohsiatna uh ka ngaidam ding a, a khelhna uh leng ka theigige kei ding hi, chi in.

³⁵Hichi in TOUPA, sun vaksak ding a ni pepa, kha leh aksite adia dante sehsak a, zan vaksak ding a pepa, tui kihotte ging honhon ding a tuipi tokthoupa’n a chi ahi: a min sepaihte TOUPA ahi.

³⁶Hiai dansehte ka ma a kipan a man leh Israel suante ka ma a kipan in nam hih a tawp den sam ding uh, chih TOUPA thupawt ahi.

³⁷TOUPA’N hichi in a chi: Tunglam van tehtheih a hih a, lei kingaknate zonkhiak theih ahihleh Israel suante a thilhihsate uh ziak in ka paimang sam ding, chih TOUPA thupawt ahi.

³⁸Ngai in, nite a hongtung lellel hi, Hananel inn sung a kipan in kulh ning kongpi tan in TOUPA adin khopi lamkhiak ahi, chih TOUPA thupawt ahi.

³⁹A tehna khau bel Gareb tang tan in tangtak in a pai zinzen ding a, Goath lam ah a kawi ding hi.

⁴⁰Misi luang leh vut paihna guam pumpi leh gamlak tengteng, Kidron luiguam tan in, suahlam pang Sakol Kongpi ning tan TOUPA ding a tan ding ahi; huai bel chikchiang mah a hihzak leh phelsiat ahi nawn kei ding hi.