Read Paite Chin JEREMIAH 32 Bible Online

JEREMIAH 32 - Paite Chin bible

JEREMIAH 32

¹Judah Kumpipa Zedekiah kum sawmna, huai bel Nebukadnezzar kum sawmlehgiatna Jeremiah kiang a TOUPA thu hongtung:

²Huai in Babulon kumpipa sepaih hon in Jerusalem a um ua; Zawlnei Jeremiah Judah kumpipa inn ngakmi huangsung ah a tang ahi.

³Judah kumpipa Zedekiah in, “Bangdia, TOUPA’N hichi in a chi: Ngai in, hiai khopi Babulon kumpipa khut ah ka pe ding a a la ding:

⁴Judah kumpipa Zedekiah leng Kaldai mite khut a kipan a pawt kei ding, Babulon kumpipa khut a matsak in a omzaw ding a, kimaituah in a kihoupih ding ua, a mit ngei in a mel a mu ding;

⁵Zedekiah bel Babulon gam ah a pi ding a, amah ka veh mateng huai ah a om nilouh ding: Kaldaite dou mahle uchin na lohching kei ding uh, chih TOUPA thupawt ahi, chih gen na hia?” chi in a tangsak ahi.

⁶Huan, Jeremiah in, TOUPA thu ka kiang ah a hongtung a:

⁷Ngai in, na pangak Shallum tapa Hanamel in Anathoth khua a ka lou nang ading in lei in: “Goukhawm thei na hih ziak in n’on leisak ding ahi chi in na kiang ah a hongpai ding” chi in.

⁸Huchi in ka pangak tapa Hanamel in, “Anathoth khua a ka lou hon leisak tanla, goukhawm thei na hih ziak in na tat ding ahi, nang ading in lei mai in” a chi a. Huchi in hiai TOUPA thu ahi chih ka theita hi.

⁹Huan, ka pangak tapa Hanamel Anathoth khua a lou ka leita a, dangka ka buksak a, a dangkasik sekel sawmsagih tak ahi.

¹⁰Huchi in, lai ka gelh a, ka hilh a, theihpihmi ka sam a, dangka pen bukna ah ka khai a.

¹¹Kileina lai kilei dan leh a omdan gelhna bilh leh bilh louhte ka la a.

¹²Huan, ka pangak tapa Hanamel mitmuh in leh theihpihmi leina a min tuang teite mitmuh in leh ngakmi huangsung a Judah tu tengteng ma ah Mahseiah tapa Neriah tapa Baruk ka pia hi.

¹³Baruk bel a ma uah thu ka pia a, Israel Pathian sepaihte TOUPA’N hichi in a chi:

¹⁴Hiai lai, leina lai, bilh louhte la inla, leibel ah koih inla, a om sawt theihna ding in,

¹⁵Israel Pathian sepaihte TOUPA’N hichi in a chi ngal a: hiai gam ah innte, loute, grephuante mite’n a honlei nawn ding uh, chi in.

¹⁶Huan, Neriah tapa Baruk kiang ah leina lai ka piak nung in TOUPA kiang ah ka thum hi:

¹⁷Aw TOUPA Pathian, ngai in, na thilhihtheihna thupi leh na khutzak in lei leh van na bawl a;

¹⁸Nang adin thilhih haksa lua a om hetkei hi: sang tampite kiang a hehpihna musak sekpa leh pate thulimlouhna a nung ua a tate uh tung a thukpa: Pathian thupi leh thilhihthei: a min sepaihte TOUPA:

¹⁹Thilgel siam tak, thilhihtheitak, mihing tate omdan tengteng mu chianpa:

²⁰Michih a omdan uleh a thilhih uh bang a thukpa: Aigupta gam a chiamtehnate leh thillamdang hihpa, tuni tan a Israel leh midang lak a hih zelpa, tuni bang mahmah a min kibawlpa,

²¹Na mi Israelte, Aigupta gam a kipan chiamtehnate, thil lamdangte, khut hat leh ban zak leh thil mulkimhuai thupitak a pipa,

²²Hiai khuaizu leh nawitu a luang gam a pipute uh kiang a kichiam a piakchiam a pepa:

²³A honglut ua, a luah vek ua, himahleh na paukam a taksang kei ua, na dan a zuikei uhi; hih ding a na piakte a hih kei ua, huaiziak in hiai thil hoihlou tengteng a tung uah na tungsak hi.

²⁴En dih, khopi lakna ding leivupte a hong omta ve: namsaute, kialte, hipite ziak in khopi leng a simmi Kaldaite khut ah piak ahita: na gensa a hongtungta: en dih, na muta hi.

²⁵Ahi a lah, Aw TOUPA Pathian, nang ka kiang ah, “Na sum in lou lei inla, thutheimite sam in: khopi bel Kaldaite khut a piak ahita” na chi, a chi hi.

²⁶Huan TOUPA thu Jeremiah kiang ah a hongtung hi:

²⁷Ngai in, kei TOUPA sa nei tengteng Pathian ka hi, kei ading in haksa lua a om ahia? chi in.

²⁸Huaiziak in TOUPA’N hichi in a chi: Ngai in hiai khopi Kaldaite khut ah leh Babulon kumpipa Nebukadnezzar khut ah ka pe ding a, a la ding:

²⁹Huchi in, hiai khopi simmi Kaldaite a hongpai ding ua, hiai khopi a hal ding ua, a kang ding, hon hehsak ding a Baal kiang a gimlim latna, pathian dangte kiang a dawn ding lat butkhiakna inn tung nei inn tengteng toh.

³⁰Israel tate leh Judah tate’n a tuailai chik ua kipan in ka mitmuh in thil hoihlou ngen a hih uhi: Israel tate’n a khut nasepte un a hon hehsak phet uhi, chih TOUPA thupawt ahi.

³¹Hiai a khopi a lam tung ua kipan tutan in hon hehsaktu leh hon thangpaisaktu ahi nilouh ngal a: ka ma a kipan a ka hihman vengveng na ding in: Israel tate leh Judah tate hon hehsak ding a a thil hoihlou hih sate uh tengteng ziak in,

³²Amau, a kumpipate uh, a heutute uh, a siampute uh, a zawlneite uh, Judah mite Jerusalem luahmite tengteng toh.

³³Kei lam hong ngalou in a deksah uh a honngat ua, tawlnga lou hial in sinsakta mah leng, sinsakna lasawn ding in a ngeingaih kei uhi.

³⁴Ka min tuanna inn hih thanghuai ding in a kihhuainate uh a koih zaw uhi.

³⁵Ben Hinnom guam a Baal biakna mun sangte a lamkhia ua, a tanute uh, a tapate uh Molech kiang a mei a a paihna ding un, Judahte thil gilou hihsak ding a hiai kihhuai a hih uh ka thupiak ahi hetkei hi, ka lungsim ah leng a lut ngeikei hi.

³⁶Huaiziak in tuin zaw TOUPA Israel Pathian in, “Hiai khopi, namsau, kial leh hipi in Babulon kumpipa khut ah piak ahita na chih nak uh thu ah hichi in a chi”:

³⁷Ngai dih, ka hehna, ka lung hihlouhna, ka thangpaihna thupi mahmahte a amau ka delh manna gam teng a kipan ka pikhawm ding a, hiai mun ah ka hontun ding a, bittak in ka omsakta ding.

³⁸Huchi in, ka mite ahi ding ua, kei a Pathian uh ka hi ding.

³⁹Tangtawn a a honlau den theihna ding un lungtang kibang leh omdan kibang ka bawlsak ding: amau leh a nung ua a tate uh hoihna ding in.

⁴⁰A kiang uah tangtawn thukhun ka bawl ding a, amau lehngatsan lou in, a hon launa ka hih gige ding; a hon tuamsan louhna ding un a lungtangte uah honlauna uh ka koih ding.

⁴¹Ahi, a hoihna uh hih ka kipahlam ahi ding a, ka lungtang tengteng in hiai gam ah ka phut ngeingei ding.

⁴²TOUPA’N hichi in a chi ahi: Hiai mite tung a thil hoihlou thupi mahmah ka tut bangtak in amau kiang a thil hoih ka chiam tengtengte ka tungsak ngeingei ding.

⁴³Gam segawp, Kaldaite khut a piaksa, mi leh sa om nawn lou, na chih gam uah loute a kilei nawn ding uhi.

⁴⁴Benjamin gamte ah, Jerusalem khopi kim munte ah, Judah gam khopite leh simlam khopite ah mite’n dangka in lou a lei ding ua, leina lai a gelh ding ua, a bilh ding ua, theihpihmite a sam ding uhi: a omdan uh ka hei ding hi, chih TOUPA thupawt ahi.