Read Paite Chin JEREMIAH 33 Bible Online

JEREMIAH 33 - Paite Chin bible

JEREMIAH 33

¹Huan, Jeremiah kiang ah, ngakmi huangsung a a omlai in, a nihveina ding in TOUPA thu a hongtung nawn hi.

²Lei bawlpa TOUPA, kip ding a bawlpa TOUPA’N, TOUPA a min ahi, chi in a chi:

³Honsam lechin, k’on dawng ding a, thil thupi leh thil kisel na theih ngeilouh ka hon ensak ding.

⁴Israel Pathian TOUPA’N hiai khopi innte leh Judah kumpipa innte, namsau leh leivupte lak a venna bawl ding a a phelsiat uh tungtang thu ah hichi in a chi:

⁵Kaldaite sual ding in amau a hong kuan ua, ka hehna leh thangpaihna a ka thah luangte in a dimsak zaw ding uh, a gitlouhna tengteng ziak un hiai khopi lak ah ka mel ka na sel hi.

⁶Ngai in, damna leh hihdamna ka hontun ding a, k’on damsak ding: muanna leh bitna kiptak k’on musak ding.

⁷Judah omdan leh Israel omdan ka hei ding a, a tung a ka dinsak bang in ka dingsak nawn ding.

⁸Huan, a thulimlouhna uh, ka tung a a thilhih khelhna lak ua kipan ka sawpsiang ding a, a thulimlouhna uh, ka tung a a thil hihkhelhna uleh ka tung a a tatleknate tengteng uh ka ngaidam ding.

⁹Huchi in, hiai khopi lei a nam tengteng, amau adia ka hihhoih tengteng mumite ma ah kei ding in nuamna, pahtawina leh thupina ahi ding a: hoihna muanna a tung ua ka tut tengteng ziak in lau in a ling ding uhi.

¹⁰TOUPA’N hichi in a chi: Hiai mun, Judah khopi a mi leh sa om nawn lou a segawp, Jerusalem kholak a mi leh sa leh tengmi omlou a kigawpsa, a chih uah.

¹¹“Sepaihte TOUPA kiang ah kipahthu gen un. TOUPA lah a hoih ngal a: a chitna lah tangtawn in a om ding hi, chi mite aw leh Toupa inn a kipahna kithoihna hontawi lasa mite aw leh mou awte mouneipa awte a honza nawn ding uh.” A tung a a om bang in gam ka omsak ding," chih TOUPA thupawt ahi.

¹²Sepaihte TOUPA’N hichi in a chi: Hiai mun, mi leh sa omlou khop a segawpsa leh a khopi tengteng ah, belamchingmi a belamhon uh kualsakmite tenna mun a hongom nawn ding.

¹³Tang gam khopi ah, phai gam khopi ah, simlam khopi ah, Benjamin gam ah, Jerusalem kim munte ah, Judah khopi ah, amau sim mi khut nuai ah belamte a pai zungzung ding uh, chih TOUPA thupawt ahi.

¹⁴Ngai in, nite a hongtung lellel hi, chih Toupa thupawt ahi, Israel inkawte tungtang ah leh Judah inkawte tungtang a thu hoihtak ka na genpen ka tangtung sak ding.

¹⁵Huai nite leh huai hun chiang in diktatna Hiang David kiang ah ka khangkhe sak ding, huai gam ah diktak leh diktattak in vai a hawm ding.

¹⁶Huai nite in Judah humbit in a om ding, Jerusalem bittak in a om ding: huan, a min put ding hiai ahi ding, “TOUPA i diktatna” chih.

¹⁷Toupa’n hichi in a chi ahi: David in Israel inkawte mangtutphah a tu ding mi a tasam ngeikei ding:

¹⁸Siampu Levi chite’n leng ka ma a haltum na lan ding leh buh leh bal thil lan ding leh kithoih zel ding in mi a tasam sam kei ding.

¹⁹Huan, TOUPA thu Jeremiah kiang ah a hongtung a: TOUPA’N hichi in a chi:

²⁰Ka sun seh leh ka zan seh thu na phel theih ua, sun leh zan a hun tak ua omlou ding a na hih theih uleh:

²¹Ka nasempa David kiang a ka thukhun leng a mangtutphah a tu ding tapa a neihlouhna ding a hihsiat ahi phet ding hi: Levi chite, siampute, ka nasem mite kiang a leng.

²²Van a omte sim senglouh leh tuipi a piaunel sim senglouh bang mai in ka nasempa David suan leh Levi chi kei n’on sepsak mite ka pungsak ding.

²³TOUPA thu Jeremiah kiang ah a hongtung:

²⁴“Inkuan nih TOUPA’N a telte a paimangta” chi a hiai mite’n a gen uh na ngaihtuah ngei ka hia? A mitmuh ua namchih tham a hihlouhna ding un hichibang in ka mite a musit uhi.

²⁵TOUPA’N hichi in a chi: ka sun leh zan thu seh a om den louh a, lei leh van omdante ka seh louh ahihleh,

²⁶Jakob suante leh ka nasempa David suante ka paimang ding, Abraham, Isak leh Jakob suante tung ah vaihawmmi a suan a kipan ka lakei ding: a omdante uh ka kiheisak in a tung uah hehpihna nei ding ka hi ngal a.