Read Paite Chin JEREMIAH 34 Bible Online

JEREMIAH 34 - Paite Chin bible

JEREMIAH 34

¹Babulon kumpipa Nebukadnezzarte, a sepaih hon tengteng, amah thunuai a lei a vaihawmna gam tengteng leh mipi tengteng in Jerusalem leh a khopi tengteng a sual lai ua TOUPA kiang a kipan a Jeremiah kiang a thu hongtung:

²“Israel Pathian, TOUPA’N hichi in a chi: Judah kumpipa Zedekiah vahoupih in, hichi in a chi: Ngai in, hiai khopi Babulon kumpipa khut ah ka pe ding a, mei in a hal ding:

³A khut a kipan na suakta hetkei ding: mat na hi ding a, a khut ah honpe ding ua, na mit ngei in Babulon kumpipa na mu ding a, paukam ngei in na kihoupih ding ua, Babulon gam ah na hoh ding hi.

⁴Himahleh, aw Judah kumpipa, Zedekiah, TOUPA thu ngaikhe zel dih: na tungtang thu ah TOUPA’N hichi in a chi hi:

⁵Namsau in na si kei ding a, muangtak in ahi na sih ding: na ma a kumpipa masa, na pipute gimlim a halsak bang un, nang leng a hon halsak ding uh: a honsun ding ua, "Ehe heh, ka pu," chi in. Thu ka khahta hi, chih TOUPA thupawt ahi” chi in.

⁶Zawlnei Jeremiah in hiai thu tengteng Jerusalem a Judah kumpipa Zedekiah kiang ah a gen a;

⁷Babulon kumpipa sepaih honte’n Jerusalem leh Judah khopi omlai tengteng, Lakish leh Azekah a sual lai un: Judah khopi lak a kulh neite hiaite kia ahita uhi.

⁸Kumpipa Zedekiah in Jerusalem a om mipi tengteng kiang ah, michih in a sikhanu toh a sikhapate uh, Hebru nu hiam Hebru pa hiam a hih uleh, a khah ding uh ahi:

⁹A unaupa Hebru mi nasep sak in kuamah a om ding uh ahi kei, chi a noplenna thu a phuan a, thukhun a bawl nung a TOUPA kiang a kipan Jeremiah kiang a thu hongtung:

¹⁰Michih in nasemnu hiam nasempa hiam a khah ding ahi, amau nna sepsakin kuamah a om ding uh ahi kei, chih thukhun pommi heutu tengteng leh mipi tengteng in thukhun a mang ua, a khahta uhi.

¹¹Himahleh huai nung in a kihei ua, a nasemnu uh leh a nasempa uh a khahsate uh a kaikik ua, a thunuai uah nasemmi ding in a koih nawn uh:

¹²Huaiziak in Jeremiah kiang ah TOUPA thu a hongtung nawn hi; TOUPA Israel Pathian in hichi in a chi:

¹³Aigupta gam, saltanna inn a kipan ka pikhiak ni’n na pipute uh kiang ah thukhun ka bawl a:

¹⁴Michih in a unaupa, Hebru mi, a kiang a zuaksa, kum guk a na nasemsa a kum sagihna tawp in a khah ding ahi, chi in: na pipute un bel a hon ngaikhe kei ua, a bil uh a doh sam kei uh.

¹⁵Tuin noute’n, na hong kihei ua, michih in a invengpa kiang a noplenna thu phuang in ka mitmuh in thil dik n’on hihta ua: Ka min tam inn ah ka ma ah thukhun na hong kibawlta ua;

¹⁶Himahleh na kihei nawn ua, ka min na hihbuah un a ut bang tak ua na khahsa nung uh, na sikhanu leh na sikhapa uh na pi kiknawn ua, na thunuai uah nasemmi ding bang sikhanute ding bang in na koih nawn uh.

¹⁷Huaiziak in TOUPA’N hichi in a chi: Michih amah unau leh amah invengte kiang a noplenna thu phuang ding in ka thu na ngaikhe kei ua; ngai un, ken na kiang uah noplenna thu ka phuang hi, chih TOUPA thupawt ahi; namsaute, hipite, kialte in ahi ding; lei a kumpigamte tengteng lak ah vik lenlen ding in k’on bawl ding hi.

¹⁸Huan, ka thukhun bohsiate, ka ma a bawngnou atphel kikal a paisuak hial a thuchiam a tangtung sakloumi.

¹⁹Judah heutute leh Jerusalem heutute, michilgehte, siampute, mipi tengteng, bawngnou atphel kikal a paite;

²⁰A melmate uleh a hinna zongmite khut ah ka pe ding a; huchi in, a luangte uh tung a leng vasate leh lei a gamsate an ding lel ahi ding.

²¹Huan, Judah kumpipa Zedekiah leh a lawite a melmate uleh a hinna zongmite leh Babulon kumpipa sepaih hon, nou hon paisansate khut ah ka pe ding hi.

²²Ngai un, hiai khopi a hong kiknawn ding in thu ka pe ding a, chih TOUPA thupawt ahi, huchi in a sual ding ua, a la ding ua, mei in a hal ding uh: luahmi omlou in Judah khopite ka hihgam vek ding hi, chi in.