Read Paite Chin JEREMIAH 35 Bible Online

JEREMIAH 35 - Paite Chin bible

JEREMIAH 35

¹Judah kumpipa Josiah tapa Jehoiakim vaihawmlai a TOUPA kiang a kipan a Jeremiah kiang a thu hongtung in:

²Rekab inkawte kiang ah hoh in va houpih inla, TOUPA in a dantan khat ah pilut inla, uain dawn ding pia in, a chi a.

³Huan, Habazziniah tapa, Jeremiah tapa, Jaazaniah leh a unaute, a tapa tengteng Rekab inkawte tengteng toh ka pi a;

⁴Pathian mi Igdali tapa Hanan tate dantan, TOUPA inn ah ka pilut a; huai dantan bel heutute dantan chin kongpi ngakmi Shallum tapa Maaseiah dantan tung a om ahi:

⁵Huchi in, Rekab suante pate ma ah belhbute, noute uain dim ka tung a, a kiang uah, “Uain dawn un” ka chi hi.

⁶Amau bel, “Uain ka dawn kei hial ding uh; kou hon suangpa Rekab tapa Jonadab in, Noumau leh na suante un leng tangtawn a uain na dawn ding uh ahi kei;

⁷inn na lam un haichi na tuh un, grephuan leng na bawl un na nei ding uh ahi sam kei hi: na damsung nite un puanin a na ten zawk ding uh ahi, na omna gam ua na damsawt theihna ding un, chi in thu a honpia hi.

⁸Huchi in kou hon suangpa Rekab tapa Jonadab in paukam a thu hon thukhah tengteng, ka damsung ua kou leh ka zite uh, ka tapate uleh ka tanute un uain dawn louh ding un,

⁹Ka tenna inn uh lam louh ding, grephuan hiam lou hiam haichi hiam neih louh ding tan in ka zui uhi:

¹⁰Puaninte ah ka teng zaw ua, kou hon suangpa Jonadab thupiak tengteng mang in ka zui vek uhi.

¹¹Huan, hichi ahia, Babulon kumpipa Nebukadnezzar in gam a hongsual lai in kou, Kisa un, Kaldai sepaih honte leh Suria sepaih honte lau ziak in Jerusalem ah i hoh ding uh, ka chi ua, huchi in Jerusalem ah ka tengta uhi” a chi uhi.

¹²Huan, TOUPA thu Jeremiah kiang ah a hongtung nawn a:

¹³Israel Pathian sepaihte TOUPA’N hichi in a chi: Judah gam a mite leh Jerusalem a mi tengte kiang ah vagen inla, “Ka thute ngaikhe ding in sinsakna na sang kei ding uh maw? chih TOUPA thupawt ahi.

¹⁴Rekab tapa Jonadab thu, a tapate kiang a a piak, uain dawn louh ding pen a zui ua, tunitan in bangmah a dawn kei ua, amau suangpa thupiak a zui mahmah uh hi: ken bel phalvak a thou in na kiang uah thu ka gen a, n’on ngaikhe kei uh.

¹⁵Ka nasem zawlneite phalvak a thou in na kiang uah ka sawl a, michih na omdan gilou ua kipan hongkik vek unla, na thilhihte uh bawlhoih unla, pathian dangte zaw a na uh sem ding in zuikei unla; nou leh na pipute uh kiang a gam ka piak ah na teng ding uh chi in; himahleh na bil uh na doh kei ua, n’on ngaikhe sam kei uh.

¹⁶Rekab tapa Jonadab suante’n amau suangpa thupiak a zui ua, hiai mite’n zaw a hon ngaikhe kei uh;

¹⁷Huaiziak TOUPA Israel Pathian sepaihte Pathian in hichi in a chi: Ngai un, Judah leh Jerusalem a tengte tung ah thil hoihlou a tung ua hongtung ding ka gen khiaksate k’on tun ding: a kiang uah thu ka gen a, a ngaikhe kei ua, amau ka sam a, a hon dawng sam kei uh” chi in.

¹⁸Huchi in, Jeremiah in Rekab suante kiang ah: Sepaihte TOUPA Israel Pathian in hichi in a chi: Na pa Jonadab thupiak na zui ua, a thupawt tengteng bang a na hih ziak un;

¹⁹Rekab tapa Jonadab in tangtawn in ka ma ading ding mi a tasam ngeikei ding, chi in sepaihte TOUPA Israel Pathian in a chi hi.