Read Paite Chin JEREMIAH 36 Bible Online

JEREMIAH 36 - Paite Chin bible

JEREMIAH 36

¹Huan, hichi ahia, Judah kumpipa Josiah tapa Jehoiakim vaihawm kum lina ah hiai thu TOUPA kiang a kipan Jeremiah kiang ah a hongtung hi:

²Laibuzial la inla, hiai ah na kiang a thu ka gen tengteng, Israel tungthu, Judah tungthu, nam tengteng tungthu, na kiang a thu ka gen ni a kipan Josiah hunlai a kipan tuni pha a thu gelh in

³Judah inkawte’n a tung ua thil hoihlou hih ka tup tengteng, a ngaikhia un michih in a omdan gilou uh a heithei khamoh kei ding uh, a thulimlouhna uh leh a khelhna uh ka ngaihdam theihna ding in a chi hi.

⁴Huchi in, Jeremiah in Neriah tapa Baruk a sam a, huchi in Baruk in TOUPA thu tengteng, a kiang a a gensa Jeremiah paukam a kipan laibuzial ah a gelh a.

⁵Huan, Jeremiah in Baruk kiang ah, “Khakkhum ka hi a, TOUPA inn ah ka hoh theikei a,

⁶Huaiziak in nang hoh inla, TOUPA thu ka paukam a kipan laibuzial a na gelh anngawl ni’n, TOUPA inn a mipite bil a zak in vasim khia in; a khopi ua kipan a hongpawt Judahte tengteng bil a zak in leng na simkhiak ding ahi.

⁷Michih in a omdan gilou uh a hei un, TOUPA ma a hehpihna a ngetna uh a tun thei zenzen kha ding ua, hiai mite tung a hehna leh thangpaihna TOUPA’N a genkhiak lah a thupi mahmah ngal a” chi in thu a pia hi.

⁸Huchi in Neriah tapa Baruk in zawlnei Jeremiah thupiak tengteng bang in TOUPA inn a TOUPA thu laibu a om a simta hi.

⁹Huan, hichi ahia, Judah kumpipa Josiah tapa Jehoiakim vaihawm kum ngana, kha kua na ah Jerusalem mi tengteng leh Judah khopi a kipan a Jerusalem a hongpai tengteng in anngawl thu a phuangta uh.

¹⁰Huan, Baruk in TOUPA kongpi thak lutna ah, um sung tungnung zaw a Laigelhmi Shaphan tapa Gemariah dantan, TOUPA inn a om ah Jeremiah thu laibu a om, mi tengteng bil a zak in a sim hi.

¹¹Huan, Shaphan tapa Gemariah tapa Mikaiah in laibu a om TOUPA thu tengteng a na zak in,

¹²Kumpipa inn ah a hohsuk a, Laigelhmi dantan ah a lut a, huan, ngai dih, huai ah heutu tengteng a na tu ua, Laigelhmi Elishamte, Semaiah tapa Delaiah, Akbor tapa Elnathan, Shaphan tapa Gemariah, Hananiah tapa Zedekiah leh heutu tengteng.

¹³Huan, Mikaiah in mite bil a zak in Baruk in laibu a sim thu a na zak tengteng a hilh a.

¹⁴Huan, heutu tengteng in Kusi tapa, Shelemiah tapa Nethaniah tapa Jehudi Baruk kiang ah a sawl ua, a kiang ah, “Mite bil a zak a nasim laibu tawi in hong in” chi ding in. Huchi in Neriah tapa Baruk bel laibuzial tawi in a kiang uah a hong hi.

¹⁵A kiang ah, “Tu inla, ka bil ua ka zak ngei un sim dihve leh” a chi ua, huchi in Baruk in a bil ua a zak un a simta.

¹⁶Huan, hichi ahi a, huai thute a zak uleh lau in a ki en chiat ua, Baruk kiang ah, “Hiai thu tengteng kumpipa ka hilh ngeingei ding uh” a chi uhi.

¹⁷Baruk kiang ah, “Hiai thu tengteng na kam a kipan bangchi dan a gelh na hia, honhilh in?” chi in a dong uhi.

¹⁸Baruk in, “Hiai thu tengteng a paukam in a honhilh a, laitui in laibu ah ka gelh mai ahi” chi in a dawng hi.

¹⁹Heutute’n Baruk kiang ah, “Kuan unla, Jeremiah toh bu un; kuamah in na omna uh theikei uhen” a chi uhi.

²⁰Huchi in, huangsung ah kumpipa kiang ah a lut ua; laibuzial bel Laigelhmi Elishama dantan ah a koih ua; a thu tengteng paukam in kumpipa a hilh uh.

²¹Huchi in kumpipa’n laibuzial la ding in Jehudi a sawl a, Laigelhmi Elishama dantan a kipan a la uhi. Huan, Jehudi in kumpipa leh kumpipa kiang a ding heutu tengteng bil a zak in a sim hi.

²²Kha kua na ahia, kumpipa bel a phalbi in ah a tu a, a ma ah meihol thuk ah kuang a om hi.

²³Hichi a honghi a, Jehudi in khep thum hiam khep li hiam a sim in kumpipa in a temta in a at tan a, thuk mei ah a zial bu pum kangmang vek ding in a lawnlutzel hi.

²⁴Kumpipa leh a nasemmi’n hiai thu tengteng ngaikhia mite kuamah a lau kei ua, a puansilh uh leng a botkek sam kei uh.

²⁵Huai phet hilou in Elnathan leh Delaiah leh Gemariahte’n laibuzial hal lou ding in kumpipa kiang ah a ngen ua, himahleh a ngaikhe nuam kei.

²⁶Huan, kumpipa’n kumpipa tapa Jerahmeel leh Azriel tapa Seraiah leh Abdeel tapa Shelemiah Baruk Laigelhmi leh zawlnei Jeremiah man ding in thu a pia: himahleh TOUPA’N amau a sel hi.

²⁷Huan, laibuzial leh Jeremiah kam a kipan Baruk in a gelh tengteng thute kumpipa’n a haltum khit in TOUPA thu Jeremiah kiang ah a hongtung hi.

²⁸Laibuzial dang la inla, laibuzial masa a thu tengteng, Judah kumpipa Jehoiakim in a hal mangsate gelh nawn vek in.

²⁹Judah kumpipa Jehoiakim tungtang thu ah huchi in na chi ding hi: TOUPA’N hichi in a chi: Babulon kumpipa hongpai ding a, hiai gam a hihsia in, hiai mi leh sa a hihmang vek ding, chi a gelhna bangdia huchibang thu gelh, chi in laibu na halta hi:

³⁰Huaiziak in, Judah kumpipa Jehoiakim tungthu ah TOUPA’N hichi in a chi: David tutphah a tuding mi a neikei ding: a luang leng sun nisa ah leh zan vuk nuai ah paihkhiak ahi ding.

³¹A thulimlouhna uh ziak in amah leh a suante leh a nasemmite ka gawt ding: amau leh Jerusalem a tengte leh Judah mite tung ah a tung ua ka phuansa, a ngaihkhiak kei uleh thil hoihlou tengteng ka hontun ding, chi in.

³²Huchi in Jeremiah in laibuzial dang a la a, Neriah tapa Baruk laigelhmi a pia a, aman huai ah Jeremiah kam a kipan laibu gelhsa tengteng, Jehoiakim in mei a a khulmangsa thute a gelh a: huaiban ah a kibatpih thu tampi a behlap lai hi.