Read Paite Chin JEREMIAH 37 Bible Online

JEREMIAH 37 - Paite Chin bible

JEREMIAH 37

¹Huan, Josiah tapa Zedekiah, Babulon kumpipa Nebukadnezzar in, Judah gam kumpipa ding a a bawl Jehoiakim tapa Koniah sik in vai a hawmta a.

²Himahleh amah leh a nasem mite leh a gam a mite’n TOUPA thu zawlnei Jeremiah kam a gen a ngaikhe kei uh.

³Huan, kumpipa Zedekiah in Shelemiah tapa Jehukal leh Maaseiah tapa siampu Zephaniah bel zawlnei Jeremiah kiang ah, “TOUPA ka Pathian kiang ah hon thumsak in” chi ding in a sawl hi.

⁴Jeremiah bel mipite lak ah a utut in a vakthei lai a: tanna inn ah lah a koih ngal kei ua.

⁵Pharo sepaih honte Aigupta a kipan a hong pawtkheta ua: huchi in Kaldaite Jerusalem um mite’n a tanchin a zak un Jerusalem a tawpsanta uhi.

⁶Huchi in, TOUPA thu zawlnei Jeremiah kiang ah a hongtung a,

⁷TOUPA Israel Pathian in hichi in a chi: Judah kumpipa hondong ding a nou honsawl kiang ah, ngai in, Pharo sepaih hon, nou hon panpih ding a hongpaite amau gam Aigupta ah a kiknawn ding uh.

⁸Kaldaite a hongding ua, hiai khopi a sual dingua, a la dingua, meiin a halding uh.

⁹“Kaldaite’n a hon paisan ngei ding uh” chi in, nou kikhem kei un, a hon pai sankei ding uhi.

¹⁰Nou honsual Kaldai sepaihte bawl ek mahle uchin, a lak ua miliam omsunte kia in leng amau puanin a kipan in hong thouin hiai khopi mei in a hal thouthou ding uh, chi in na gen ding ahi, chi in.

¹¹Huan, hichi ahi a, Pharo sepaih honte lau ziak a Kaldai sepaih honte’n Jerusalem a paisan lai un,

¹²Jeremiah in mite lak a a tantuan la ding in Benjamin gam a lut ding in Jerusalem a pawtsan hi.

¹³Benjamin kongpi a tun in ngakmi heutu Hananiah tapa Shelemiah tapa a min Irijah a na om a; huai in “Kaldaite kiang a kipia na hi” chi in zawlnei Jeremiah a na man hi.

¹⁴Jeremiah in, “Zuau ahi; Kaldaite kiang ah ka kipe kei” a chi a: himahleh a ngaikhe kei a, huchi in Irijah in Jeremiah a na man a, heutute kiang ah a pia hi.

¹⁵Huan heutute Jeremiah tung ah a heh mahmah ua, a sat ua, Laigelhmi Jonathan inn ah a khum uhi; huai tan in dia a zat him uh ahi.

¹⁶Huchi in, Jeremiah leinuai kawkhuk ah a lut a, ni tampi tak a om nung in kumpipa Zedekiah in a samkhia hi.

¹⁷Huan, kumpipa’n a inn ah a guk in a kiang ah “TOUPA kiang a kipan thu banghiam bek a om hia?” chi in a dong hi. Jeremiah in, “Om e” a chi hi. A kiang ah, “Babulon kumpipa khut ah matsak in na om ding” a chilai hi.

¹⁸Jeremiah in kumpipa Zedekiah kiang ah, “Nang hiam na nasemmi hiam hiai mite tung ah bang thil ahia ka hihkhelh a n’on matsak?

¹⁹Nang kiang a ‘Babulon kumpipa nang leh hiai gam dou ding in a hongpai kei ding, chi a thu genmi na zawlneite koi a om ahita ua?’

²⁰Aw, ka pu, kumpipa ngaikhia in, k’on ngen ahi, ka ngetna na sang in, ka hon ngen hi; Laigelhmi Jonathan inn ah hon kiksak nawn ken, huai ah ka si kha ding hi” a chi hi.

²¹Huchi in, kumpipa Zedekiah in thu a pia a, Jeremiah bel ngakmi huangsung ah a tangsak a, tanghou bawlmite kongzing a kipan niteng in tanghou beu khat, khopi a tanghou a omlai siah a pia ua, huchibang in Jeremiah bel ngakmi huangsung ah a om nilouh hi.