Read Paite Chin JEREMIAH 38 Bible Online

JEREMIAH 38 - Paite Chin bible

JEREMIAH 38

¹Huan, Mattan tapa Sephatiah leh Pashur tapa Gedaliah leh Shelemiah tapa Jukal leh Malkiah tapa Pashurte’n, mipi tengteng kiang ah Jeremiah in,

²TOUPA’N hichi in a chi: hiai khopi a om nilouhte zaw namsau, kial leh hipi in a si ding ua, Kaldaite kiang a kipia bel a hing ding ua, a hinna a ki humbit ding a a hing ding, chi in.

³TOUPA’N hichi in a chi: hiai khopi Babulon kumpipa sepaih honte khut ah piak ahi ngei ding a, a la ding, chi a a gen a ngaikhia uhi.

⁴Huchi in, heutute’n kumpipa kiang ah, “Hiai mi hihlup hi hen, k’on ngen uh; aman a kiang ua hiai thute gen in hiai khopi a galkapmi omlaite leh mipi tengteng tha a hatkei sak a: hiai mi’n hiai mipite hoihna a zong kei a, a siatna a zong zaw hi” a chi uhi.

⁵Huan, kumpipa Zedekiah in, “Ngai un, amah na khut ua om ahi: kumpipa na deihlouh lam uh hihthei ahi sam a” a chi hi.

⁶Huchi in, Jeremiah a pi ua, ngakmi huangsung a om kumpipa tapa Malkiah lei nuai khuk ah a pailut ua; Jeremiah bel khau in a khe suk ua, huai lei nuai khuk ah buannawi kia loungal tui a omkei a: Jeremiah bel buannawi ah a kia hi.

⁷Huan, Ethiopia mi, michilgeh kumpipa inn a om sek Ebed-melek in Jeremiah lei nuai khuk ah a koih uh chih a naza a; huchih lai in kumpipa bel Benjamin kongpi ah a tu a;

⁸Ebed-melek bel kumpipa inn a kipan a pawt a, kumpipa kiang ah.

⁹“Ka pu, kumpipa, hiai mite’n zawlnei Jeremiah lei khuk a a na paihkhiak uh thil gilou thupi mahmah hih ahi uh, gilkial ziak in a omna mun ah simai ding a kei maw; khopi ah tanghou a om nawn kei a,” a chi a.

¹⁰Huan, kumpipa’n Ethiopia mi Ebed-melek thu a pia a, “Hiai a kipan in mi sawmthum pi inla, lei nuai kawkhuk a kipan in a sih ma in zawlnei Jeremiah va lakhia un” chi in.

¹¹Huchi in Ebed-melek in mite a pi a, kumpipa dangka inn nuai ah a lut ua, puanak lui paihte leh puansilh siate a lakhia ua, lei nuai khuk ah Jeremiah kiang ah khau in a khaikhe suk uh.

¹²Huan, Ethiopia mi Ebed-melek in Jeremiah kiang ah, “Hiai puanak luite leh puansilh siate na lenuai ah khau in gakkhum in” a chi hi. Huan, Jeremiah in huchibang in a hih hi.

¹³Huan, Jeremiah bel lei nuai khuk a kipan khau in a kaikhia ua: Jeremiah bel ngakmi huangsung ah a om nilouh ta hi.

¹⁴Huan, kumpipa Zedekiah in Jeremiah a sam a, TOUPA inn a lutna thumna ah a kiang ah a pilut a: huan, kumpipa’n Jeremiah kiang ah, “Thil ka hondong ding; ka lak ah bangmah im ken” a chi hi.

¹⁵Jeremiah in Zedekiah kiang ah, “Honhilh leng n’on that mahmah kei dia hia? Thu hon hanthawn leng hon ngaikhe lou ding chin a” a chi hi.

¹⁶Huan kumpipa Zedekiah in Jeremiah kiang ah, “TOUPA hiai ka hinna bawlpa a hin a a hin sungteng k’on hihlum kei hial ding, na hinna zong mite khut ah leng nang ka honpe sam kei ding” chi in a sim in a kichiam hi.

¹⁷Huchi in Jeremiah in Zedekiah kiang ah, “TOUPA, sepaihte Pathian, Israel Pathian in hichi in a chi, ‘Babulon kumpipa heutute kiang ah na kipiak leh na hinna na bitsak ding a, hiai khopi leng a kang kei ding, nang leh na inkawte leng na hing ding uh.’

¹⁸Babulon kumpipa heutute kiang a na kipiak kei lebel hiai khopi Kaldai khut a piak ahi ding a, a hal ding ua, a khut ua kipan na suakta hetkei ding a chi” a chi hi.

¹⁹Huan kumpipa Zedekiah in Jeremiah kiang ah, “Kaldai mite kiang a kipia Judahte khut ah a hon mansak in nuihzat in a honbawl kha ding uh ka lau ahi” a chi hi.

²⁰Jeremiah in bel, “A hon mansak kei ding uh; na kiang a ka gen TOUPA aw mang mai in. Huchi in nang adin a hoih ding a hin leng na hing ding.

²¹Kipiak na utkei lebel hiai TOUPA’N hon thu kawkmuh ahi:

²²“Ngai in, Judah kumpipa inn a numei omlaite tengteng Babulon kumpipa heutute kiang ah pi in a om ding ua, huai numeite’n, Na lawm hoih hoihte’n a honkhem ua, a honzouta ua, na khe buannawi a a tumtak in a hon lehngatsan ua” a chi ding uhi.

²³Na zite, na tanute Kaldai mite kiang ah a pivek ding ua, a khut ua kipan na suakta kei ding a, Babulon kumpipa khut a mat in na omzaw ding a, nang ziak in hiai khopi a kang ding” a chi hi.

²⁴Huan Zedekiah in Jeremiah kiang ah, “Hiai thute kuamah in theikei uhen, huchi in na si kei ding.

²⁵Himahleh heutute’n ka hon houpih a zak ua, na kiang a a hong ua, na kiang a, Kumpipa kiang a na gen honhilh in; ka lak uah bangmah im kenla, k’on that kei ding uh; na kiang a kumpipa thugente leng, a chih uleh,

²⁶Nang a kiang uah, Jonathan inn a hon kiksak lou a, huai a vasi lou ding in kumpipa kiang ah ngetna ka pelut lel ahi, na chi ding hi” a chi hi.

²⁷Heutu tengteng in Jeremiah kiang a a hongpai un, a dongta ngei ua, kumpipa’n thu a piak tengteng bang in amau a hilh hi. Huchi in a kihoupih un a tawp ua; a thu theih phak ahi kei hi.

²⁸Huchi in Jeremiah bel Jerusalem lak ni tan in ngakmi huangsung ah a om nilouh hi.