Read Paite Chin JEREMIAH 4 Bible Online

JEREMIAH 4 - Paite Chin bible

JEREMIAH 4

¹Aw Israel, na hongkik leh, ka kiang ngei ah n’ongkik ding ahi, chih TOUPA thupawt ahi. Na kihhuainate ka mitmuh louh a na koihmang a, chihtaktak a, thugel diktak zang a diktattak a;

²TOUPA a hin laiteng, chi a na kichiam leh, namte amah ah nuamsa a kichi ding ua, amah a suangta ding uh;

³Judah mite leh Jerusalem kiang ah TOUPA Pathian in hichi in a chi hi: Na lei sit uh let unla, lingte lak ah chi theh kei un.

⁴Nou Judah gam a mi leh Jerusalem a tengte aw, TOUPA ading in na zek uh sum unla, na lungtang zek uh sum un, huchilou in zaw na thil gilou hihte uh ziak in, ka hehna mei bang in a pawtkhe ding a, kuamah phelh theihlouh in a kang kha ding hi.

⁵Judah gam ah hilh unla, Jerusalem ah phuang un, Gam pumpi ah pengkul mut unla, ngaihtak in kikou un. Hong kikhawm unla, kulhnei khopite ah i lut ding uh, chi un;

⁶Zion lam ah puanzak khai unla, bitna zong in tai unla, zekai kei un, mallam apan thil hoihlou k’on tungsak ding, nakpi a siatna.

⁷Gammang nuai ningkitel a kipan in humpinelkai a pawt hi, namte hihse ding; a mun a kipan a pawtta, a hongpai lellel hi, na gam hihse ding leh na khopite tengmi neilou khop a sugawp ding in.

⁸Huaiziak in saiip puan teng unla, kap un, mau vongvong un; i lak ua kipan in TOUPA hehna thupi lah a kikai khe ngal kei a.

⁹Huai ni chiang in hichi a honghi ding, chih TOUPA thupawt ahi: kumpipa lungtang a lungke khin ding a, heutute lungtang leng; siampute’n gen ding a theikei ding ua, zawlneite’n lamdang a sa ding uh.

¹⁰Huan ken, Ah, TOUPA Pathian, hiai mite leh Jerusalem nakpitak a khem nei ve, Muanna na nei ding uh, na chi a, namsau in hinna a sun zawta hi, ka chi hi.

¹¹Huai hun chiang in hiai mite leh Jerusalem kiang ah, “Gamdai tang giau velvul a kipan huih sa, Ka tanu, ka mite zapsiang ding hilou; siangsak ding hi sam lou;

¹²Huih hat lua, ka thu in a hongtung ding ahi: tuin leng a tungthu uh ngaihtuahpa kei ka hi” chih ahi ding.

¹³Ngai dih, a hong paitou ding, meipi bang in, a kangtalai pingpei bangmaite; a sakolte muvanlai sang in a hatzaw uh, i tung gik na e! Buluh a om i hive ua.

¹⁴Aw Jerusalem, thulimlouhna a kipan na lungtang silsiang inla, hotdam a na om theihna ding in; bang tan ahia na ngaihtuahna gilou na pai ding?

¹⁵Dan gam a kipan aw a hong pawtkhia a, Ephraim tang a kipan in thil hoihlou a phuang hi.

¹⁶Namte hilh unla, Jerusalem ah phuang un, ngai dih, gam gamlapi a kipan sualmite a hongtung uh, Judah khopite tung ah a aw uh a suah uhi.

¹⁷Louma vengmite bang mai in a kimvel in a um ua, ka tung a a hel ziak un chih TOUPA thupawt ahi.

¹⁸Na omdan leh na thilhihte’n, hiaite na tung ah a tun ahi, hiai na siatna ding ahi, a na mahmah a na lungtang sun eive.

¹⁹“Ka lung a na, ka lung a na, ka lungtang mahmah a na, ka sung ah ka lungtang a buaita a, ka om maimai theikei, aw ka hinna, pengkul ging, kidouna husa ka zak ziak in.

²⁰Siatna tung ah siatna a tungta, gam pumpi loh in a omta, ka puaninte a hihse guih ua, ka puanzakte leng mitphiat kal lou in.

²¹Bang tan ahia kidouna puanzak ka muh ding a, pengkul ging ka zak ding?

²²Ka mite a hai mahmah ua lah a thei ngal kei ua, naupang haitak, theihna neilou bang mai ahi ua, thil gilou hih a siam ua, thil hoih hihdan a siam kei uh.

²³Leitung ka et leh, ngai dih, segawp leh vuak in a om a; vante’n vakna a neikei uh.

²⁴Tangte ka et leh, ngai in, a ling uh, mual tengteng leng a tang zualzual uh.

²⁵Ka et leh, ngai in, mihing a omkei ua, tungleng vasate a leng mangkhinta uh.

²⁶Ka et leh, ngai in, louma hoihte gamdai a suakkhin a, khopite leng a chim khin, TOUPA leh a heh mahmahna ah.

²⁷TOUPA’N hichi in a chi hi: Gam pumpi a segawp ding, himahleh ka hihtawp tawntung kei ding.

²⁸Huaiziak in lei in a sun ding a, tunglam vante leng a mial ding: thu ka genta a, ka tumta hi, ka kisik kei a, ka lunghei kei hi.

²⁹Sakol tung a tuang leh thalpeu zangmite husa ah, khopi pumpi a taikek ua, gammang ah a lut ua, khaw chih a nusia ua, luahmi khat lel leng omlou in.

³⁰Huan nang, loh a na om hun chiang in bangchi’n na hihdia? Puan sanau a kizem in, kivatna dangkaeng a kivan in, na mitte nuh mahle chin, na kihih lawm thawn ahi, na tangvalte’n a hon simmawh ding ua, na hinna lak a tum uhi.

³¹Numei nauvei kikou husa ka za, tachil neinu thuaklai, Zion tanu nakging, a khutte zak a, Ka tung gik hina mai e! tualthatmite ma ah ka hinna a bah khinta” chi in.