Read Paite Chin JEREMIAH 40 Bible Online

JEREMIAH 40 - Paite Chin bible

JEREMIAH 40

¹Judah leh Jerusalem sal tengteng, Babulon sal a a pite uh lak a Jeremiah khainiang lenkawm a a pilai a ngakmi a pawtsak nung a TOUPA a kipan Jeremiah kiang a thu hongtung:

²Ngakmi heutu in Jeremiah a pia, a kiang ah, “TOUPA i Pathian in hiai mun a thil hoihlou tungding a na phuangkhin hi.

³TOUPA’N a hon tungsakta ngei a, a gen bangbang in ahita hi; TOUPA tung ah thil na hihkhial ua, a paukam na manlouh ziak un hiai thil na tung uah a hongtung ahi.

⁴Tuin, ngai in, tuni in na khut a khainiang but k’on phelsak ahi. Babulon a ka kiang a hong na ut leh hong inla, na ut kei leh hong dahmai in; en dih, gam tengteng na ma ah a om hi, hoh pha nasak leh hoih na sak bang in pai in.

⁵A kik ma in aman, Judah khopite tung a ukpi dia Babulon kumpipa’n a bawl Shaphan tapa, Ahikam tapa Gedaliah kiang ah kik inla, mite lak ah a kiang ah om in, ahihkeileh hoh pha na saksakna ah hohmai in” a chi hi.

⁶Huchi in ngakmi heutu in nekding leh thilpiak a pia a, a paisanta hi. Jeremiah bel Ahikam tapa Gedaliah kiang ah Mizpah khua ah a hoh a, a kiang a gam a omsun mite lak ah a om teita hi.

⁷Huan, sepaih pawl heutu tengteng gamlak a omte’n, amaute leh a heute uh Babulon kumpipa’n, Ahikam tapa Gedaliah huai gam a mi genthei penpen, Babulon sal a pilouhte a kemsak chih a zak un Mizpah khua ah;

⁸Gedaliah kiang ah a hongpai ua, Nethaniah tapa Ishmael, Kareah Johanan leh Jonathan, Tanhumet tapa Seraiah, Netophath khua a Ephai tate leh Maakat khua a mi tapa Jezaniah leh a heute uh.

⁹Huchi in, Shaphan tapa, Ahikam tapa Gedaliah in amau leh a heute uh kiang ah, “Kaldaite nasep kihta kei un: gam ah om dinden unla, Babulon kumpipa na sem unla, nou ding in a hoihmai ding hi.

¹⁰Kei zaw Mizpah khua ah ka om ding a, Kaldai mi ka kiang a hong dingte ma ah noute sik in ka ding ding: noute’n ahihleh uainte, nipi theite, thaute lakhawm unla na bel uah koih unla, na khopi laksate uah teng un” chi in a kichiam hi.

¹¹Huchi mah bang in Judah mi tengteng, Moab gam a tengte, Ammon mite lak a tengte leh Edom gam a tengte leh gamdang a omte’n Babulon kumpipa’n Judah mi khenkhat a nusia a, a tung uah Shaphan tapa, Ahikam tapa, Gedaliah a koih chih a zak un;

¹²Judah mi tengteng a hawlzakna gam tengteng ua kipan in a hong paikik ua, Judah gam a Mizpah khua ah Gedaliah kiang ah a hongtung ua, uain leh nipi thei a lakhawm uhi.

¹³Huailou leng Kareah tapa Johanan leh sepaih pawlte heutu, gamlak a om tengteng Mizpah khua ah Gedaliah kiang ah,

¹⁴“Ammon mite kumpipa Baalis in na hinna la ding in Nethaniah tapa, Ishmael a sawl chih na za hia?” a chi uhi.

¹⁵Huan, Kareah tapa Johanan in Mizpah khua a Gedaliah kiang ah, “Hon paisak dihve, Nethaniah tapa Ishmael ka vathat mai ding, kuamah in a theikei ding uh: Judah mi na kiang omkhawm tengteng a dalh vek ua, Judah mi omsunte manthatna hih ding in bangdia na hinna la ding ahia?” chi in a simtham in a gen hi.

¹⁶Ahikam tapa Gedaliah in bel Kareah tapa Johanan kiang ah, “Hiai thil na hih ding ahi kei; Ishmael na gendan a dikkei hi” a chi hi.