Read Paite Chin JEREMIAH 41 Bible Online

JEREMIAH 41 - Paite Chin bible

JEREMIAH 41

¹Huan hichi ahi a, kha sagihna ah Elisha tapa Nethaniah tapa Ishmael, kumpi chi a mi, kumpipa upate lak a khat, mi sawm pi in Mizpah khua ah Ahikam tapa Gedaliah kiang ah a hong ua; Mizpah khua ah an a ne khawm uh.

²Huan, Nethaniah tapa Ishmael bel a mipi sawmte toh ading ua, Shaphan tapa Ahikam tapa, Babulon kumpipa’n gam ukpipa dia a bawl Gedaliah namsau in a that uhi.

³A kiang a Judah mi om tengteng, Mizpah khua a Gedaliah kiang a omte leh Kaldai galkap mi om teite Ishmael in a that lai hi.

⁴Gedaliah a thah nung ni nih in hichi a honghi a, kuamah in a theih ma un,

⁵Sekem a kipan, Shiloh a kipan, Samaria a kipan in mi sawmgiat, a khamul uh met a, a puansilhte uh kek a, amau ki at in, tanghou latte leh gimlimte tawi in TOUPA inn ah lan ding in a hong uhi.

⁶Nethaniah tapa Ishmael bel Mizpah khua a kipan in amau dawn ding in a pawtkhia a, lamtawn in a kapkap a: huan, hichi ahi a, amaute a muh in a kiang uah, “Ahikam tapa Gedaliah kiang ah hongpai un” a chi hi.

⁷Huchi in, hichi a honghi a, khopi sung a tun uleh Nethaniah tapa Ishmael leh a mipite’n amau a na that ua, kawkhuk ah a pai uhi.

⁸A lak ua mi sawmte’n bel, “Honthat kei un, gam ah buh, buhman, sathau leh khuaizu tampi ka sel ngal ua” a chi uhi. Huchi in amau a hawi ua, a unaute uh lak ah a that telta kei hi.

⁹Huan, kawkhuk, Ishmael in Gedaliah toh a mi thahte luang a paihna bel kumpipa Asa in Israel kumpipa Baasha a kihtak ziak in a bawl ahi. Nethaniah tapa Ishmael in huai luangte in a dimsak hi.

¹⁰Huchi in, Ishmael in Mizpah khua a mi hing a omsun, kumpipa tanute, Ahikam tapa Gedaliah kiang a ngakmi heutu Nebuzaradan in a kepsak, Mizpah khua a omlai tengteng toh sal in a pivek a; Nethaniah tapa Ishmael in huaite sal dia pi in Ammon mite zuan in a pawt hi.

¹¹Himahleh, Kareah tapa Johanan leh a kiang a om sepaih pawl heutu tengteng in Nethaniah tapa Ishmael thil hoihlou hih tengteng a na zak un mi tengteng a pikhia ua,

¹²Nethaniah tapa Ishmael sual ding in a kuan ua, tui tampi omna mun Gibeon ah a va mu uh.

¹³Huan, hichi ahia, Ishmael kiang ah mi tengteng in Kareah tapa Johanan leh a kiang a sepaih heutu tengteng a vamuh un a na kipak law mahmah uhi.

¹⁴Huchi in Ishmael in Mizpah khua a kipan a sal a a pi tengteng a kihei ua, a kiknawn ua, Kareah tapa Johanan kiang ah a pai diam uhi.

¹⁵Nethaniah tapa Ishmael bel mi giat toh Johanan a kipan a taikhe geigei ua, Ammon mite kiang ah a paita uhi.

¹⁶Huan, Kareah tapa Johanan leh a kiang a sepaih pawl heutu tengteng in, Nethaniah tapa Ishmael in Ahikam tapa Gedaliah a thah nung a Mizpah khua a kipan Nethaniah tapa Ishmael lak a Johanan in a hutkhiaksa mi omsun tengteng, kidou mite, numeite, naupangte, michilgehte, Gibeon a kipan a a pinawnte a pivek hi.

¹⁷Huchi in, a pawt ua, Kaldaite ziak a Aigupta gam a tailut tum in Bethlehem khaw kiang ah Geruth Chimham ah a khawl uhi.

¹⁸Nethaniah tapa Ishmael in, Ahikam tapa Gedaliah, Babulon kumpipa’n huai gam ukpipa dia a bawl a thah ziak in amau a kihta mahmah uhi.