Read Paite Chin JEREMIAH 42 Bible Online

JEREMIAH 42 - Paite Chin bible

JEREMIAH 42

¹Huan, sepaih pawl heutute leh Kareah tapa Johanan leh Hoshaiah tapa Jezaniah leh mipi tengteng, a neupen a kipan a a lianpen tan in a hongnai ua, zawlnei Jeremiah kiang ah:

²“Na ma ah ka ngetna uh pom hi henla, hiai omsun mi tengteng ading ngei in na Pathian kiang ah hon thumsak ding in k’on ngen uhi; n’on muh bang ngei in mi tampite lak a kipan tawmchik kia nutsiat in ka omta uhi.

³TOUPA na Pathian in ka paina ding thil uh hon kawkmuh theihna ding in ” a chi uhi.

⁴Huchi in, zawlnei Jeremiah in a kiang uah, “Na thu uh ka za hi, ngai un, na thu uh bangbang in TOUPA na Pathian kiang uah ka ngen ding hi: huan, hichi ahi ding a, TOUPA’N nou a hon dawn peuhmah k’on hilh zel ding: na lak uah bangmah ka im kei ding” a chi hi.

⁵Amau Jeremiah kiang ah, “TOUPA na Pathian in ka kiang ua nang a honsawlna thu tengteng bangzel a ka hihkei uleh ka lak uah TOUPA thu theipa dik leh muanhuai hi hen.

⁶A sia hiam a pha hiam k’on sawlna uh TOUPA ka Pathian uh paukam suak ka mang ngeingei ding uh: TOUPA ka Pathian uh paukam suak ka man uleh kou hoih theihna ding ahi” a chi uhi.

⁷Huchi in, hichi a honghi a, ni sawm nung in TOUPA thu Jeremiah kiang ah a hongtung a.

⁸Huchi in, Kareah tapa Johanan leh a kiang a sepaih heutu om tengteng leh sepaih tengteng, neupen a kipan a lianpen tan in a sam a, a kiang uah,

⁹“TOUPA na Pathian uh, a ma a na ngetna tundia na honsawl napa un hichi in a chi:

¹⁰Hiai gam a na omdet uleh k’on tungding ding a, k’on phelzak kei ding a, k’on phutkip ding a, k’on botkhe kei ding, na tung ua thil hoihlou ka tutte lah ka lungheita ngal a.

¹¹Babulon kumpipa na lau sek uh lau nawn kei un, amah lau kei un chih TOUPA thupawt ahi; a khut a kipan noute hondam ding leh honkhe ding in na kiang uah ka om hi.

¹²Na tung ua zah a ngaih theihna ding in zahngaihna nou ka honphal ding a, na gam mah uah k’on kiksak ding hi.

¹³Himahleh, hiai gam ah i omkei ding uh, chi a TOUPA na Pathian uh aw na man kei ua,

¹⁴Hi hetlou Aigupta gam ah i paizaw ding ua, huai ah kidouna himhim i tuak kei ding a, pengkul ging leng i za kei ding a, an taksap a omsam kei ding, huai ah i teng zaw ding uh, na chih uleh,

¹⁵Aw Judah omsunte aw, TOUPA thu ngai dih ua: sepaihte TOUPA Israel Pathian in hichi in a chi:

¹⁶Aigupta gam a lutding leh huai a teng ding in kihei teitei na hih uleh hichi a honghi ding a, namsau na kihtak ngei un Aigupta gam ah hon pha ding a, kial na kihtak sek un leng Aigupta gam ah nou a hondelh zui ding a, huai ah na si ding uhi.

¹⁷Aigupta gam a teng ding a kihei teiteite tengteng huchibang in a om ding ua, namsau, kial leh hi in na si ding uh, thil hoihlou a tung ua ka tut ding a kipan kuamah a suakta un a bit kei ding uh.

¹⁸“Sepaihte TOUPA, Israelte Pathian in huchi in, a chi ahi: Jerusalem a tengte tung a ka hehna ka sun mah bang in Aigupta gam na lut hun chiang un na tung uah ka hehna ka sung sam ding: hamse thuak leh lamdangsak chiat, mi kamse banna, gensiat na hi ding ua, hiai mun na mu nawn kei ding uh.

¹⁹Aw Judah omsunte aw, TOUPA’N na tungtang uh a genta hi, Aigupta gam ah lut kei un, hiai ni’n nou k’on theichiansak ahi chih thei mahmah un. Na hinna uh,

²⁰TOUPA na Pathian uh kiang ah n’on sawl ua, TOUPA ka Pathian uh kiang ah hon thumsak inla, TOUPA ka Pathian un a chihchih honhilh inla, ka hihzel ding uhi na chi ngal ua.

²¹Tuni in na kiang uah ka phuangta ahi; himahleh na kiang ua a hon sawlna bangmah in TOUPA na Pathian uh paukam lah na mang ngal kei uh.

²²Huaiziak in tunzaw theita un, tenna na lunggulhna mun ngei uah namsau, kial leh hi in na si ngeingei ding uhi” chi in a chi hi.