Read Paite Chin JEREMIAH 43 Bible Online

JEREMIAH 43 - Paite Chin bible

JEREMIAH 43

¹Hichi ahi a, Jerusalem mipi tengteng kiang a TOUPA a Pathian uh thu tengteng TOUPA Pathian in gen ding a a sawlna thu, huai thu tengteng a gen khit in;

²Hoshaiah tapa Azariah leh Kareah tapa Johanan leh mi kiphasak tengteng in, Jeremiah a houpih ua, a kiang ah, “Zuaugen na hi, TOUPA ka Pathian un, ‘Aigupta gam a teng ding in na pai ding uh ahi kei, chi a gen ding in nang a honsawl sam a’:

³Kaldaite khut a matsak a ka om ua honthah theihna ding un leh Babulon sal dia hon pitheihna ding in Neriah tapa Baruk in kou honsual ding a honsawl ei zaw ve” a chi uhi.

⁴Huchi in Kareah tapa Johanan leh sepaih pawl heutu teng leh mipi tengteng in Judah gam a teng ding in TOUPA kam a mangkei uhi.

⁵Huchi in Kareah tapa Johanan leh sepaih pawl heutu tengteng in Judah omsun tengteng, Judah gam a teng ding a hawlzak a a omna namte uh lak a kipan a hongkik;

⁶Pasalte, numeite, naupangte, kumpipa tanute leh michih ngakmi heutu Nebuzaradan in Saphan tapa, Ahikam tapa Gedaliah leh a kiang a a nutsiatte uh zawlnei Jeremiah leh Neriah tapa Baruk leng, a pikhawmvek zawta uhi.

⁷Huchi in Aigupta gam a tungta ua, TOUPA paukam a mang kei ua, huchi in Tahpanhes khua ngei a tung uhi.

⁸Tahpanhes ah Jeremiah kiang ah TOUPA thu a hongtung a,

⁹Suang lianpi la inla, Tahpanhes a Pharo inn lutna chin a teklei lep zutna ah Judah mite mitmuh ngei in phut in.

¹⁰A kiang uah, Sepaihte TOUPA, Israel Pathian in hichi in a chi: Ngai un, ka nasempa Babulon kumpipa Nebukadnezzar ka thukhak ding a, aman hiai ka suang phumguk tung ah a mangtutphah a tung ding; aman a tung uah a kumpi puanin a kai ding hi.

¹¹Huan, a hong ding a, Aigupta gam a honggawt ding, sihna tuam sihna ah, saltanna tuam saltanna ah, namsau tuam namsau ah.

¹²Aigupta mite pathian innte ah meite a khah ding a, a kang ding, sal in a pi ding a; belamchingmi puan a silh bang in Aigupta gam a silh ding, huai a kipan in galmuang in a pawt ding.

¹³Aigupta gam a Beth-shemesh suang khuam sang pipite a chimsak ding a, Aigupta pathian innte mei in a hal ding, a chi, chi in, a chi a.