Read Paite Chin JEREMIAH 44 Bible Online

JEREMIAH 44 - Paite Chin bible

JEREMIAH 44

¹Aigupta gam a Judah om tengteng, Migdol khua, Tahpanhes khua, Noph khua leh Pathros gam a tengte tungtang a Jeremiah kiang a thu hongtung:

²Sepaihte TOUPA, Israel Pathian in hichi in a chi: Jerusalem leh Judah khopite tung a thil hoihlou k’on tutte na muta uh; ngai dih ua, tuin a hong segawpta a, kuamah a teng kei uh;

³Amau nou leh na pipute un pathian dangte a theih ngei nailouh uh na sem ding leh a kiang ua gimlim hal in, kei hon hehsak ding a, a ginatlouhnate uh a hihkhit tak ziak un.

⁴Huchi pipi in na kiang uah nasem zawlnei tengteng phalvak a thou in ka sawl a, a kiang uah, “Aw, hiai thu kihhuai, ka huatlam tak hihkei un” chi in.

⁵Himahleh a ngaikhe tuankei ua, a ginatlouhna uh pathian dangte kiang a gimlim hallouh ding pen a ngeingaih kei uh.

⁶Huaiziak in ka hehna leh ka thangpaihna Judah khopite leh Jerusalem kongzingte ah ka sung a a kuangta a, tuni a a om bang in a sia a, a segawpta hi.

⁷Huaiziak in tuin zaw TOUPA sepaihte Pathian, Israel Pathian in: na lak ua kipan numei pasal, naungekte leh nawi nelaite Judah lak a kipan kuamah hawi lou a gawimang vek ding in bangdia hiai thil hoihlou tak na hinna uh tung a hih na hi ua?

⁸Na vatenna uh Aigupta gam pathiante kiang a gimlim hal in khovel gam tengtengte lak a hamsethuak leh gensiat na hih theihna ding uh leh gawimang na hih theihna ding ua na khut thilhih ngei ua hon hehsak na hi uh.

⁹Na pipute uh gitlouhnate, Judah kumpipate gitlouhnate leh na zite uh gitlouhna, Judah gam leh Jerusalem kongzing a a hihkhitsate uh na mangngilh ta ua hia?

¹⁰Tunitan in leng a kisik tuankei ua, na pipute uh leh noumau ma a ka taklat ka dan leh ka dan bawlte na zuikei ua, na lau sam kei uh.

¹¹Huaiziak in, sepaihte TOUPA, Israel Pathian in hichi in a chi: Ngai un, na siatna ding un Judah tengteng gawimang vek ding in nou k’on matuah ding hi.

¹²Huan, Judah omsun, Aigupta gam a ten tuma kihei teiteite ka man ding a, a chimit vek ding uh; Aigupta gam ah a puk ding ua, namsau leh kialte a hihman in a om ding uh; neupen a kipan a lianpen tan in namsau leh kial in a si ding uh.

¹³Jerusalem ka gawt bangmah in Aigupta gam a tengte namsaute, kialte leh hipite in ka gawt ding ahi ngal a.

¹⁴Huchi in Aigupta gam a teng ding a kuan Judah omsunte Judah gam, a omna ding ua kiknawn a ut mahmahna gam uah kik ding in khat lel leng hihdam in a suakta kei ding uh, a sim a taikhe kia loungal kuamah a kik kei ding uh.

¹⁵Huchi in mi tengteng, a zite un pathian dang kiang a gimlim a hal chih theite leh numei huai a dingte mipi tampi, Aigupta gam a teng mipi tengteng in, Pathros ah Jeremiah a dawng ua, hichi in a chi uh:

¹⁶“TOUPA min a ka kiang ua na thugente zaw k’on ngaihkhiaksak kei ding uh.

¹⁷Kou leh ka pipute uh, ka kumpipate uh leh ka heutute un Judah khopite ah leh Jerusalem kongzingte ah a na hihzel bang un van kumpinu kiang a gimlim halte leh a kiang a dawn ding thillat butkhiakte, ka paukam suak peuhmah bang un ka hih ngeingei ding uh; huchihlai in ka lamzang ua, nek leh dawn ding a tama, siatna himhim ka mu sam ua.

¹⁸Van kumpinu kiang a thil hal leh a kiang a dawn ding thillat butkhiakte ka tawp nungsiah uh bang peuh ka tasamta zaw ua, namsau leh kialte a hihman in ka omta uhi.

¹⁹Huan, numeite’n, Van kumpinu kiang a gimlim ka hal lai uh leh a kiang a dawn ding thillatte ka butkhiak uh?” a chi uhi.

²⁰Huchi in Jeremiah in mipi tengteng, numei pasal amah dawngmite tengteng kiang ah,

²¹“Judah khopite leh Jerusalem kongzingte ah, nou leh na pipute uh, na kumpipate uh leh na heutute uh, leh gam a mipite in gimlim a halte uh TOUPA’N a theigige in a lungsim ah a khum kei maw?

²²Na thil gilou hihziak uleh na thil kihhuai hihte uh ziak in TOUPA’N a thuak ngap nawnta kei hi; huaiziak in, na gam uh tua a om bang in a sia a, lamdang sak chiat, hamse thuak, tengmi omlou, a hong hita hi.

²³Gimlim na hal ua, TOUPA tung ah na gilou ua, TOUPA paukam suakte na mang kei ua, a dan hiam a dan bawl hiamte a thu theihsakte hiam na zuih sam louh ziak un hiai thil hoihlou tua a om bang in na tung uah a hongtung ahi” a chi a.

²⁴Huailou leng Jeremiah in mipi tengteng leh numeite kiang ah, “Aigupta gam a Judah tengteng aw, TOUPA thu za un, sepaihte TOUPA, Israel Pathian in hichi in a chi hi:

²⁵Nou leh na zite un, Van kumpinu kiang a gimlim hal leh dawn ding thillat butkhiakte ka na chiamsa bangzel in ka hih ngeingei ding, chi in na kam un na genta ua, na khut un na pichingsak lai uhi. ‘Na thuchiamte uh hihkip unla, na thu tupte uh tangtung sak vanglak un.’

²⁶huaiziak in, nou Judah, Aigupta gam a tengte aw, TOUPA thu ngaikhia un: Ngai un, TOUPA Pathian a hin a a hin sung chi in Aigupta gam pumpi a teng, Judah mi kua kam mah ah ka min a ging nawn ngeikei ding chi in ka min thupi lou in ka kichiam ahi chih TOUPA thupawt ahi.

²⁷Ngai in, a hoihna ding uh hilou in a siatna ding un amau ka tang thek ahi: huchi in Judah mi, Aigupta gam a omte tengteng, namsau leh kialte a hihman in a om ding uh, a manthat vek matan un.

²⁸Namsau hihman val tawmchik Aigupta gam a kipan a pawt in Judah gam ah a lut ding uh; huan, Judah mi omsunte tengteng, Aigupta gam a teng ding a kuan mite’n kua thu ahia paizaw ding, ka thu hia amau thu, a thei ding uh.

²⁹Huan, hiai nou ading in chiamtehna ahi ding: ka thu na tung uah thil hoihlou lam ding in a pai ngei ding hi chih na theihna ding un hiai mun ah nou ka hon gawt ding ahi chih TOUPA thupawt ahi:

³⁰TOUPA’N hichi in a chi: Ngai un, Pharo Hophra, Aigupta kumpipa bel a melma, a hinna zong mite khut ah ka mangsak ding, Judah kumpipa Zedekiah, a melma, a hinna zawngmi Babulon kumpipa Nebukadnezzar khut a ka piak bangmah in” a chi a.