Read Paite Chin JEREMIAH 46 Bible Online

JEREMIAH 46 - Paite Chin bible

JEREMIAH 46

¹Namte tungtang a zawlnei Jeremiah kiang a TOUPA thu hongtung:

²Aigupta thu, Euphrates luigei a Karkhemish khua a om, Judah kumpipa Jehoiakim, Josiah tapa kum lina a Nebukadnezzar in a bawl ek Aigupta kumpipa Pharo Neko sepaih hon tungtang thu:

³Lum bemte, lum zawlte mansa in om unla, gal nawt un,

⁴Sakol van unla, sakol tuang mite aw, tuang un, dal lukhu khu in ding kip unla, tei tat-hiam in sik puanak silh un.

⁵Bangchidan, a taikekta uh! A dek uh a ngat uh, a galkapmite uh a vuallel uh, baksam leng zen in a tai ua, nunglam nga hetlou in, ning chih ah gal a lang chih TOUPA thupawt ahi.

⁶Mi zuanzang a taimang theikei, galkapmi a pawt tuankei uh, huai a mi Euphrates luigei ah a hawi ua, a puk khinta uh.

⁷Nile lui bang a khang kua ahia? Luipi tui kihot kimvel bang in?

⁸Aigupta Nile lui bang in a khang a luipi tui kihot kimvel bang mai in, ka khang ding a, leitung ka luahsuak ding, khopi leh a luahte ka hihse ding, a chi hi.

⁹Aw sakolte aw, nawk zel unla, aw kangtalai aw, nakpi’n pang un: galdoumite’n ma phu uhenla, Ethiopia mi leh Put mi, lum tawimite, Lud mi thalpeu zang siamte toh.

¹⁰Huai ni ahi, TOUPA, sepaihte TOUPA ni tak, phulak ni, a melmate tung a phu a lak theihna, namsau in a gai ding a, a tai ding, a sisan uh taitak in a dawn ding; sepaihte TOUPA’N mal gam ah Euphrates lui gei ah mi tampi a gou phengphung mai ve.

¹¹Aw, Aigupta tanu siangthou, Gilead ah hohtou inla, sing nai nuh chi vala in, damdawi tampi a thawn in na zangta, nang ading in damna himhim a omkei hi.

¹²Namte’n na zahlakna a za ua, na kah in lei pumpi a dim hi, galhatmi leh galhatmi a kiphu ua, lei ah a puk khawm uh, chi in.

¹³Nebukadnezzar, Babulon kumpipa a hongpai a, Aigupta gam a hong bawl ek ding dan thu TOUPA’N zawlnei Jeremiah kiang a a gen:

¹⁴Aigupta gam ah gen unla, Migdol ah phuang un; Noph leh Tahpanhes ah phuang unla; ding kip in kigalging un; na kim a mi namsau in a gaita ngal a.

¹⁵Bangdia na mi hatte phiatmang a om ahi ua? A ding zou kei ua,TOUPA’N a paihkhiak ziak in.

¹⁶Mi tampi a kisui sak a, ahi, a kiphu puk lemlum ua, Nuaisiahna namsau taisan in kisa un, i kik ding uh, i pianna gam ah i mite kiang ah, a chi uhi.

¹⁷Aigupta kumpipa Pharo pen husa lian lel, a hun sehsa a paimang sak a om, chi in huai ah a kikou uhi.

¹⁸A hin a ka hin sung in chih Kumpipa, a min sepaihte TOUPA thupawt ahi hi, tangte lak a Tabor tang bang in tuipi chin a Karmel tang bang in a hongpai ngei ding.

¹⁹Aw nang, tanu, Aigupta gam a teng, saltang ding in kibawl mai in: Noph khua a segawp dek a, teng ding omlou in a kang mang ding hi.

²⁰Aigupta bel bawngla hoihtak ahi, himahleh mal a kipan nasemmi ding hong kuan in a hongpai hi.

²¹A lak ua sepaih goih laite bel bawngtuai vak thau bang mai ahi ua, a dek uh a ngat ua, a taikek ua, khawllou in, a tung uah a siatna ni uh a tungta, a gawtna hun ding uh:

²²Gulpi kitholh bang mai in husa a nei a, a melmate kiton in a hongpai ua, singphukmite bang in hei toh a hongsual uh.

²³A gam gammang vaksuak zoh louh a hong hihse ding uh, khaukhup sang in a tamzaw ua, simsenglouh ahi uhi.

²⁴Aigupta tanu a zahlak ding, mallam a mi khut a matsak in a om ding.

²⁵Sepaihte TOUPA, Israel Pathian in hichi in a chi: Ngai un, Nou khua a, Ammon leh Pharo; Aigupta leh a pathiante, a kumpipate, Pharo ngei leh amah muangmite ka gawt ding.

²⁶A hinna uh, zong mite khut ah leh Babulon kumpipa Nebukadnezzar leh a nasemmite khut ah ka mansak ding: huai hun chiang in luah in a om ding, nidanglai nite mah bang in, chih TOUPA thupawt ahi.

²⁷Aw Jakob, ka nasempa, lau kenla, aw Israel, lunglel sam ken, Ngai in, gamlapi a kipan nang k’on hunkhe ding a, na suante leng a saltanna gam ua kipan, Jakob a hongkik ding a, muangtak in a om hiathiat ding a, kuamah in a lausak nawn kei ding uh.

²⁸Aw Jakob, ka nasempa, lau ken, k’on ompih ahi, chih TOUPA thupawt ahi: ka hondelh zakna nam tengteng ka beisak ding a, nang zaw k’on beisak hetkei ding: diktak in k’on gawt ding a, gawtlouh in k’on khak kei ding hi.