Read Paite Chin JEREMIAH 47 Bible Online

JEREMIAH 47 - Paite Chin bible

JEREMIAH 47

¹Pharo in Gaza a gawt ma a Philistia mite tungtang a zawlnei Jeremiah kiang a TOUPA thu hongtung:

²TOUPA’N hichi in a chi: Ngai un, mal a kipan in tui a hong khang hi, a kuang dim in a luang let ding; gam a tum ding a asung a om tengteng toh, khopi leh asung a tengte leng; mite a kap ding ua, gam a mi tengteng a mau tuaituai ding uh.

³A sakol hat chinte leitot ging in kidou kangtalai ging dopdop in, a kangtalai ging in, pate a lunglel ua, a tate uh enlou zen in.

⁴Philistia mi tengteng lohna ni, Tura leh Sidon a kipan a panpihmi omsunte sattanna ni ziak in, TOUPA’N tuipi gei Kaphthor omlaite a hihse ding.

⁵Gaza mite lu a hong giauta, Askelon a chimitta a, a gam phaizang a teng laite; bang tan kiat ding na hia?

⁶Aw TOUPA namsau, na om kinken ma bang tan ahia? Na pai ah kikhum in; khawl inla om kinken ve.

⁷TOUPA’N Askelon leh tuipi gei tung a gamtang ding a, a honseh a, hih ding a honpiak ngal leh bangchi’n na om kinken thei dia?