Read Paite Chin JEREMIAH 48 Bible Online

JEREMIAH 48 - Paite Chin bible

JEREMIAH 48

¹Moab tungtang thu: sepaihte TOUPA Pathian in hichi in a chi: Nebo tung a gik hi: hihgawp in a omta: Kiriathaim bel zahlak sak in a omta, laksuan ahi. Misgab bel zahlak leh hihsiat in a omta.

²Moab minthanna a mangta; Heshbon ah a siatna ding gen in, Kisa un, nam a hihna kipan i hihmang ding uh, a chi ua. Aw Madmen khua, nang leng daihsak sipsip na hi ding a, namsau in a hondelh ding.

³Horonaim a kipan a kikou husa, lohna leh siatna thupi mahmah.

⁴Moab a a mang hi, a tate kap ging zak in a om hi,

⁵Luhithte ah kap in a paitou ua, Horonaim sul ah manthatna kikou ging lunglelhhuai a za uh.

⁶Tai mang unla, na hinna uh humbit un, gamdai gam sabiltung bang in om un.

⁷Na nasep leh na sum leh pai na muan ziak in nang leng mat in na om ding hi; Khemosh sal a pi ahi ding a, a siampute leh a heutute toh.

⁸Khaw chih ah hihsemi a hontung ding, khaw khat lel in leng a pel kei ding; phaizang gam leng a mang ding; phaizang hihsiat ahi ding. TOUPA’N a chihsa bang in.

⁹A lenmang theihna ding in Moab kha pia unla, a khuate a segawp ding a, tengmi omlou in.

¹⁰Limsaklou tak a Pathian nna semmi hamsethuak in om henla, sisan a suah ding a a namsau zang nuamlou mi hamsethuak in om hen.

¹¹A tuailai a kipan Moab in nuam a sa a, a uain a bohkhum a, bel dang a teituah leng a tuak kei a, sal a pi in a om ngeisam kei hi, a lim ngeingei a lim gige in, a gim leng a lamdang tuankei.

¹²huaiziak in ngai un, Ni a hongtung hi, a bungkhe ding mi k’on sawl ding a, huan amau a bungkhe ding uh, chih TOUPA thupawt ahi: a belte a vuaksak ding ua, a umte a hihkek ding uh.

¹³Israel inkawte’n a muanpi pen uh Bethel a zahpih bang un Moab in Khemosh a zahpihta ding hi.

¹⁴Pasal hoih leh galdou mi hangsan i hi ua, bangchidan a chi na hi ua?

¹⁵Moab bel hihgawp in a om a, a khopi meikhu in a zam khinta, a tangval hoih teng a pukkhinta chih Kumpipa, a min sepaihte TOUPA thupawt ahi.

¹⁶Moab siatna a hongtung lellel, a thuakna ding a kinoh hi.

¹⁷Nou a kim a miteng in amah sun in a min thei teng in chiang khauh leh chiang thupi a kitanta hi, chi un.

¹⁸Aw nang tanu, Dibon a teng, na thupina paisan inla, dangtak in tuin: Moab lokmin nang a hon sual a, na kulhte a hihseta hi.

¹⁹Aw Aroer a teng nu, kongbul ah ding in, enkhia in, taikekpa, suaktanu dong inla, Bang a maizen a? chi in.

²⁰Moab zahlaksak in a omta, a chim gawpta ngal a, mau tuaituai in kap un, Moab hihsiat ahita, chih Arnon ah phuang un.

²¹Gam tampi tung ah; Holon, Zahjah, Mephaath,

²²leh Dibon, Nebo, Bethdiblathiam,

²³leh Keriathiam, Bethgamul, Bethmenon,

²⁴leh Kerioth, Bozrah leh Moab gam a khua tengteng, a gamla leh a nai ah vaihawmna a hongtungta hi.

²⁵Moab ki attan in a om a, a ban hihtan in a omta, chih TOUPA thupawt ahi.

²⁶Amah khamsak unla; TOUPA tung ah a kiliansak ngal a; huan, Moab bel amah luak ah a kitholh ding a, nuihsan in a omlai ding hi.

²⁷Israel nang ding nuihzabawlna ahita kei maw? Gutate lak ah a tel ahia? Amah tungtang na gen teng in na lu na sinkhum hilou hiam?

²⁸Moab a tengte aw, khopite taisan unla, kawl kikal ah teng un, vakhu, kawhawm geia bu bawlsek bang in om un.

²⁹Moab kisaktheihna ka zata ua, a kisathei ngutve, a kikoih sandan, a kisaktheih dan, a kiotsak dan leh a lungtang ki deihkhop dante.

³⁰A hehna bangmah ahi kei chih ka thei; a kiotsaknate’n bangmah a hihkaw kei, chih TOUPA thupawt ahi.

³¹Huchi in Moab tung ah ka mau tuaituai ding a, ahi, Moab pumpi ading in ka kap ding, Kir hareseth mite sun ahi ding uh.

³²Jazer kap sang a thupi in ka honkah ding a, aw Sibmah grepkung, na hiangte tuipi tung ah a kiphalh a, Jazer tuipi leng a tung hialta a, na nipi thei leh grep gahte hihsemi in a bawm hi.

³³Nuamna leh kipahna a mangkhin hi, theibil leh Moab gam a kipan: uain sukna khuk a ka uain ka beisakta a, kuamah in nuamsa a kikou in a chil nawn kei ding uhi.

³⁴Heshbon leh Elealeh ah a kikou ua, Jahaz tan in aw a suah ua, Zoar a kipan Horonaim tan, Eglath shelishijah tan in leng, Nimrim tui kim a dai ding hi.

³⁵Huailou in Moab mun sangte thillanmi leh a pathiante adia gimlim halmi ka hihmang ding, TOUPA thupawt in a chi.

³⁶Huchi in tamngai bang in ka lungtang Moab ading in a ging a, Kir hareseth mite ding in tumging bang in ka lungtang a ging hi; huaiziak in niang leh tai a thil a muhsate a mangthang khinta hi.

³⁷Lu chiteng metgiau ahi a, khamul chiteng met ahi; khut tengteng at ahi a; kongte ah saiip puan a om chiat hi.

³⁸Moab inn tung tengteng, kongzing leh munchih ah kahna a om a; Moab bel phatuam nawnlou bang in ka hihkham khinta hi, chih TOUPA thupawt ahi.

³⁹Seta namai e! Segawp zou hina tel e: Moab zahlak in a lehngat tave: huchi in Moab bel a kimvel a mite tengteng adin nuihzabawlna leh mulkimhuai a hong hita hi.

⁴⁰TOUPA’N hichi in a chi ahi: Ngai in, mu bang in a leng ding a, Moab tung ah a kha a zak ding.

⁴¹Kerioth lak a hi a, a kulhte a phawng guih a, huai ni’n Moab pasalphate lungtang numei nauvei lungtang bang mai ahi ding.

⁴²Moab a mangthang ding, nam a ching nawn kei ding; TOUPA a nuaisiah zawk ziak in.

⁴³Launa, kawkhuk leh tangte, aw Moab luahmi, na tung ah a tung hi, chih TOUPA thupawt ahi.

⁴⁴Launa taisanmi kawkhuk ah a ke ding, kawkhuk a pawt thang ah a awk ding, a gawtna kum ka hontun ding ngal a, a tung ah, Moab tung ah ngei, chih TOUPA thupawt ahi.

⁴⁵Heshbon lim ah taikekpawl bahgawp in a khawl ding ua, Heshbon a kipan in mei a pawt a, Sihon lak a kipan in meikuang, chiak vengvungmite sip a sam toh Moab baksam a kang khin hi.

⁴⁶Na tung a gik hi, aw Moab! Khemosh mite a mangta ua; na tapate sal a pi in, na tanute sal in a tangta uhi.

⁴⁷Himahleh ni nanung chiang in Moab omdan ka hei ding a, chih TOUPA thupawt ahi. Hichi tan Moab tungthu ahi hi.