Read Paite Chin JEREMIAH 49 Bible Online

JEREMIAH 49 - Paite Chin bible

JEREMIAH 49

¹Ammon mite thu, TOUPA’N hichi in a chi: Israel in tate a nei ka hia? Gouluahmi neilou hia? Bang achia ahia a kumpipa’n Gad a tantak a, a mite khopite a a ten uh?

²Huaiziak in, ngai un, nite a hongtung hi, chih TOUPA thupawt ahi. Ammon tate Rabah khua ah kidou husa ging ka kizasak ding, thilsia omkhawm lel a honghi ding hi, a tanute mei in a kang ding a, huchi in Israel in amah neimi a nei thuk ding, TOUPA’N a chi hi.

³Aw Heshbon, mau tuaituai inla, Ai a lok khinta ua; Rabah tate aw, kap un, kap unla, umna sungte ah vial tai un. Kumpipa, siampu leh a mi liante toh sal a pi in a om ding uhi.

⁴Bangdia na guam hoihte suang na hia, aw muanhuailounu a neih hoihhoihte muang a, Kua ahia honsual ding, chichi nakmi?

⁵Ngai in, launa na tung ah ka hontun ding a, na kim a mi tengteng a kipan, chih TOUPA, sepaihte Pathian thupawt ahi: michih delhkhiak na hi vek ding uh, kuamah in taikekpawl a kaikhawm kei ding uh.

⁶Huaikhit chiang in bel Ammon tate omdan ka kiheisak ding, chih TOUPA thupawt ahi.

⁷Edom thu, Sepaihte TOUPA’N hichi in a chi: Teman a pilna om nawn lou ahi maw? Lemthei lemtheihna a mangkhinta ahia? A pilna uh mang khin hia?

⁸Aw Dedan a tengte aw, taikek unla, lehngat unla, tummang vengveng un; amah ka gawt hun chiang in, Esau siatna a tung ah k’on tun ding hi.

⁹Grep loumite na kiang a a hongpai un, maih a neikei ding ua hia? Zan a guta mite’n a deihzah uh a ngah masiah un a a lok zel kei ding ua hia?

¹⁰Esau ka vuaktang sakta a, a guk khuhte ka hongta, a bu thei nawn kei ding. A suante hihsiat ahi ua, a unaute, a invengte toh, a omta kei.

¹¹Na tagahte limsak ken, ken ka hum ding, na meithaite’n kei hon muang uhen.

¹²TOUPA’N hichi in a chi: Nou dawn lou dingte’n leng a dawn mawk uleh, nang gawtlouh hial in na suakta ding ahia? Gawtlouh in na pawt kei ding, na dawn mahmah ding hi.

¹³TOUPA’N keimah kilou in ka kichiamta ngal a, Bozrah lamdang sak chiat, gen siat, hihgawp, hamsethuak ahi ding, a khua tengteng leng a segawp tawntung ding, a chi.

¹⁴TOUPA kiang a kipan thupuan ka zata, namte kiang ah sawltak sawl ahita, Kikaikhawm unla, amah sual unla, kidou din kuan un.

¹⁵Ngai in, mihingte muhsit in namte lak nang k’on neusakta hi.

¹⁶Na kihih mulkimhuaina tak na lungtang kisathei in a hon khemna ahi, aw nang kawl suangkal a, mualvum a tengzel, mu bang in, sangpi ah bu sep mahle chin, huai a kipan in k’on lakhe suk ding, chih TOUPA thupawt ahi.

¹⁷Huchi in, Edom bel lamdangsak chiat a honghi ding a, mi vialvak peuh in lamdang a sa ding ua, a naksiat ziak in a tekkhum ding uh.

¹⁸Sodom leh Gomorrah leh a kim a khopite hihsiat a om mah bang in, kuamah a teng nawn kei ding ua, mihing ta kuamah huai ah a om ngei nawn kei ding uh.

¹⁹Ngai un, Jordan gam gammang a kipan a humpinelkai, gan khahna mun ah a hong tou ding a; amah a kipan amau ka taimang sak pah ding a, a tung a thunei ding in ka utut ka sep ding. Keimah bang kua ahia om? Kuan ahia hunbi honkhiah sak ding? Belamchingmi kua ahia ka ma ading ding pen?

²⁰Huaiziak in Edom tung a TOUPA thuhilh leh Teman mite tung a a thilseh, hih a tuppente ngaikhia un: ganhon nou neute ngei kaihmangin a om ding ua; a tenna uh a hihgawp ding hi.

²¹A puksiatna husa uah lei a ki sing a; a kap husa uh Tuipi san ah leng zak ahi ding.

²²Ngai un, muvanlai bang in a hong lengtou ding a; Bozrah tung ah kha a zak ding: huai ni’n Edom mi hangsante lungtang numei nauvei lungtang banglel ahi ding hi.

²³Damaska thu. Hamath zumta, Arpad toh, thu hoihlou a zata ngal ua, a zulta uh; tuipi kihot om kinken theilou bang in a buai uh.

²⁴Damaska a thazaw, taikek a tuma, linna in a lap a, Lungkhamna leh natna in numei nauvei bang mai in a lenta hi.

²⁵Khopi minthang leh kipahhuai khingta namai e:

²⁶Huchi in huai ni’n a tangval honte kongtual ah a puk ding ua, galdoumi tengteng a mangthang ding uh, chih sepaihte TOUPA thupawt ahi.

²⁷Damaska kulh bang ah mei ka khah ding a, Benhadad kumpipa innte a kang khin ding hi.

²⁸Kedar leh Hazor gamte Babulon kumpipa Nebukadnezzar in a gawtna thu: TOUPA’N hichi in a chi: Thou unla, Kedar sual unla, suahlam tate bawl ek un.

²⁹A puaninte uh, a ganhonte uh a laksak ding ua, a puanzakte uh, a tuium-belsuan tengteng uh, a sangawngsaute uh a paimang pih ding uh, ning chih ah launa a om a, chi in mite’n a kikou khum ding uh.

³⁰Tai kek unla, vak mang vengveng un, tummang vengveng unla, Aw Hazora tengte aw, chih TOUPA thupawt ahi. Babulon kumpipa Nebukadnezzar in nang a hon sawm a, na tung ah hihtup a neita hi.

³¹Thou unla, lungmuangtak a om, amah a khosa, kulh kongkhak leng neilou, kalhna siktawn leng neilou nam sual un, chih TOUPA thupawt ahi.

³²A sangawngsaute uh gal in a la ding ua, a bawnghonpi uh a lok ding uh. Baksam metgiau honte ning chih ah ka dalhsak ding, a siatna ding uh ning chih a kipan in ka hontun ding, chih TOUPA thupawt ahi.

³³Huan, Hazor bel sihna tenna mun ahi ding a, a segawp tawntung ding, huai ah kuamah a teng nawn kei ding uh, mihing tate a omta kei ding uh.

³⁴Judah kumpipa Zedekiah vaihawm pattungna Elam tungtang a TOUPA thu, zawlnei Jeremiah kiang a hongtung:

³⁵Sepaihte TOUPA’N hichi in a chi: Ngai un, Elam thalpeu, a hatna bulpi pen uh, ka kitansak ding;

³⁶Kawlmong li a kipan in huih lite ka hontun ding, Elam tung ah; ka dalhsak ding, kawlmong chih ah, Elam delhkhiak mite phak louh nam a omkei ding uh.

³⁷A melma uh, a hinna uh zongmite ma ah, Elamte ka lunglel sak ding, a tung uah siatna ka hontun ding, ka hehna mahmah tak, chih TOUPA thupawt ahi. Amau ka hihman vek masiah namsau ka delhsak ding hi.

³⁸A kumpipate uleh a heutute uh hihmang in Elam ah ka mangtutphah ka tung ding, chih TOUPA thupawt ahi.

³⁹Himahleh ni nanungte ah hichi ahi ding, Elam omdan ka kiheisak ding, chih TOUPA thupawt ahi hi.