Read Paite Chin JEREMIAH 50 Bible Online

JEREMIAH 50 - Paite Chin bible

JEREMIAH 50

¹Babulon tungtang, Kaldai mite gam tungtang a zawlnei Jeremiah kam a TOUPA thugen:

²Namchih lak ah gen unla, phuang un, puanzak khai in, phuang un, selkei un, Babulon lak ahita. Bel a zahlak a, Marduk mulkimna in a dim a, milimte a se khinta.

³Mal a kipan amah nam khat in a honsual a, huai in a gam a hihgawp ding a, huai ah kuamah a teng nawn kei ding ua; a taikek ua, mi leh sate leng a mangkhinta uhi.

⁴Huai nite in leh huai hun chiang in Israel tate a hongpai ding ua, amau leh Judah tate toh; kap kawm in a hongpai ding ua, TOUPA a Pathian uh a zong ding uh; chih TOUPA thupawt ahi.

⁵Zion lam nga in a kalsuanna ding uh a dong ding ua, Kisa un, tangtawn thukhun mangngilh nawnlou ding in TOUPA honglen un, a chi ding uh.

⁶Ka mite zaw belam mang ahi ua; amau chingmite’n a pimang ua, mualte ah a paimang sak ua, tangte, mual dungte ah a pai ua, a huang uh a mangngilh khinta uhi.

⁷A mu peuh in a ne zel ua, a melmate un, I gilou kei, TOUPA dikna omna a pipute uh lamet TOUPA hilhial tung a thil a hihkhelh ziak ahi, a chi uhi.

⁸Babulon sung a kipan in taikhia unla, Kaldaite gam a kipan paikhia unla, kelhon lak a keltalte bang in om un.

⁹Ngai dih ua, Babulon hongsual ding in mal gam a kipan nam honpi thupitak kikaikhawm ka tokthou ding a, amah dou ding in a kisa ding ua: huai a kipan in lak ahi ding uh: a thalte uh lah galbawl siamtak vuaksuak ngeilou bang ahi ding uh.

¹⁰Huan, Kaldai loh in a om ding, a lok mite a tai ngial ding uh, chih TOUPA thupawt ahi.

¹¹Kipak mahle uchin, nuamsa mahle uchin, aw ka goutan lok mite aw, lou lak ah bawngla takhialkhial bang leh sakoltal ham ngekngek bang himahle uchin;

¹²Na nu uh a hongzum mahmah ding a, nou hon suangnu a hong zahlak ding hi. Ngai un, namte lak a nuainungpen, gamdai, gamkeu, gamvuak ahi ding.

¹³TOUPA hehna ziak in luahmi a omkei ding a, a sevek zaw ding hi, Babulon hoh peuhmah a mulkimsak ding a, a siatna tengteng ziak in a tek ding uhi.

¹⁴Thalpeu tawimi tengteng aw, Babulon umsuak in kivual unla, kap unla, thalte chil kei un, TOUPA tung ah a khialta uhi.

¹⁵A kimvel in awng unla, amah leh amah a kipeta, a kulhte a pukta a, a bangte a chimta, TOUPA phulakna ahi ngal a, a tung ah phu la unla, a hih bangbang in a tung ah hih un.

¹⁶Babulon a kipan chi thehmi attan unla, buhlak lai a kawite tawimi toh, nuaisiahna namsau lau in amau mite lam a zuan chiat ding ua, amau gam chiat ah a tai ding uh.

¹⁷Israel bel belam dalhzak ahi a; humpinelkaite’n a delhmang ua; Assuria kumpipa’n amah a ne phot a, a tawp in Babulon kumpipa Nebukadnezzar in a guhte a haizanta hi.

¹⁸Huaiziak in sepaihte TOUPA, Israelte Pathian in hichi in a chi: Ngai un, Assuria kumpipa ka gawt bang in Babulon kumpipa leh a gam ka gawt ding.

¹⁹Huan, Israel a tatna ah ka pinawn ding a, Karmel leh Bashan ah a ta ding a, Ephraim tang ah leh Gilead ah amah a ta ding hi.

²⁰Huai nite leh huai hun chiang in Israel thulimlouhnate a zong ding ua, muh ding a omkei ding; Judah thilhihkhelhte leng muh ding a omsam kei ding; omsun ding a ka koihte ngaidam ding ka hi ngal a, chih TOUPA thupawt ahi.

²¹Merathim gam sual un, a gam leh Pekod luah mite mahmah; that unla, hihgam sipsip unla, thu ka honpiak bangbang in hih un, chih TOUPA thupawt ahi.

²²Huai gam ah gal husa a om, siatna thupi mahmah husa toh.

²³Khovel pumpi sek kitam in, nak keknen hina tele: Namte lak ah Babylon kinaksiat nah e!

²⁴Aw Babulon, nang ding in thang na kam a, theilou a awk neita ve; muhkhiak leh mat in na omta, TOUPA na sual ziak in.

²⁵TOUPA’N a galvan bawm a hongta, a hehna vanzatte a lakhia a, TOUPA, sepaihte TOUPA’N Kaldaite gam ah hih ding a nei hi.

²⁶Gamgi tawp pek a kipan in honsual unla, a thil koihkhawmna innte hong vek unla, paikhawm unla, hihse vek un, a bangmah hawi kei un.

²⁷A bawngtal tuaite that vek unla, goh in om uhen. A tung uh gik hinatel e! A ni uh, amaute gawtna ni mahmah a hongtungta hi.

²⁸TOUPA i Pathian phulak, a biakin phulakna ngei Zion a gen ding a Babulon a kipan a taikhia leh taimangte husa ngei:

²⁹Babulon sual ding in thalkap siam, thalpeu zangmi tengteng samkhawm un; a kimvel in buk bawl unla, kuamah suakta kei uhen; A thilhih bangbang in thuk un, a hihsa bang tengteng amah tung ah hih un: TOUPA, Israel Mi Siangthou lah a tou ngam hi.

³⁰Huaiziak in tangvalte a kholakte ah a puk ding ua, galkapmi tengteng huai ni’n a mangthang ding uh chih TOUPA thupawt ahi.

³¹Ngai in, nang mi kisathei, ka hondou ahi, TOUPA, sepaihte TOUPA’N a chi. Na ni a hongtungta, na gawtna ding ni mah.

³²Huan mi kisathei a kisui in a puk ding a, kuamah in a phong kei ding ua, a khopite ah mei ka khah ding a, a kimvel a om tengteng ka kang siangsak vek ding.

³³Sepaihte TOUPA’N hichi in a chi: Israel tate leh Judah tate nuaisiah in a om khawmta ua; sal a amaute pimite tengteng in amau a len chinten ua, a khah nuam kei uhi. Amaute tanpa bel a hat a; a min sepaihte TOUPA ahi.

³⁴Amah amau lam ah a pang a, Babulon a tengte hihbuai in, khovel a muanna a tut theihna ding in.

³⁵Kaldai mite tung ah namsau a leng hi, Babulon a tengte, a heutute uh leh a mipilte uh tung ah leng, chih TOUPA thupawt ahi.

³⁶Mi zuautheite tung ah namsau, mihai a hongsuak ding uh: a galkap mi tung ah namsau, a lunglel khin ding uh.

³⁷A sakolte uh leh kangtalaite uh tung ah namsau, a sung a mi kilak hel tengtengte tung ah leng, numei bang phet a honghi ding uh: a gou thil tung ah namsau lok in a om maimai ding uhi.

³⁸A tuite kangin a keu khin a, milimte gam lah ahi ngal a, milimte lah a hailoh uhi.

³⁹Huaiziak in gamdai gam sahang, ngia toh huai ah a teng ding ua, Ostrik leng huai ah a teng ding uh; luah in a om ngei nawn kei ding; suan tengteng pha in leng luah in a omkei ding hi.

⁴⁰Pathian in Sodom leh Gomorrah leh a khaw invengte a hihsiat bangbang in; huai ah kuamah a tengta kei ding ua, mihing ta kuamah in a veh nawnta kei ding uh, TOUPA thupawt in a chi.

⁴¹Ngai un, mallam gam apan mite a hong ua, mun tawp a kipan nam thupitak leh kumpipa tampi a hong kuan uhi.

⁴²Thalpeu leh tei a tawi ua, hiamgam tak, zahngaihna neilou ahi uh. A husa uh tuipi ging huhu bang ahi a, sakol tung ah a tuang ua, michih galkapmi bang a kivan in, Babulon tanu aw, nang a hongsual ding uhi.

⁴³A husa uh za in Babulon kumpipa khut a zawgawpta a, numei nauveilai natna bang in, natna thupitak in a manta hi.

⁴⁴Ngai un, Jordan gammang a kipan humpinelkai, kahna mun a a hongtou bang in a hong paitou ding a; amah a kipan in amaute ka taimangsak pah ding; a tung a thunei ding ka utut ka sep ding. Kei bang kua a om a! Kuan sep ding. Kei bang kuakua a om a? Kuan ahia hunbi hon sehsak ding? Belamchingmi kua ahia ka ma ading ding?

⁴⁵Huaiziak in Babulon tung ah TOUPA thuhilh, Kaldai mite tung a a thilseh ngaikhia un. Ganhon noute ngei kaihmang in a om ding ua, gankhahna mun a mite a mulkimsak ding.

⁴⁶Babulon lakna husa ah lei a ling ding a, a kahna husa namte lak a zak ahi ding hi.