Read Paite Chin JEREMIAH 51 Bible Online

JEREMIAH 51 - Paite Chin bible

JEREMIAH 51

¹TOUPA’N hichi in a chi: Ngai dih, Babulon leh Kaldai mite tung ah, hihse ding huihpi ka sawl ding hi;

²Zapsiangmi ka sawl ding, Babulon tung ah, amah zap in a gam a zapsiang ding ua, siatna ni’n um in a sual ding ahi ngal ua.

³Thalpeu zangmi in thalpeu lailou in, sik puanak silh in, ding kei heh, tangval hon khat leng hawilou in, a sepaih tengteng nuai mang un.

⁴Kaldai gam ah thah in a puk ding ua, a kholakte uah sut pailet in a om ding uhi.

⁵Israel leh Judah, a gam uah Israel Mi Siangthou tung ah khelhna in a dim na ua, a Pathian uh sepaihte TOUPA’N a mangngilh kei hi.

⁶Taimang unla, Babulon khaw sung a kipan, michih in amah hinna humbit hen; a thulimlouhna man loh kei un, TOUPA phulak hun ahi ngal a, aman a thuk ngeigngei ding hi.

⁷Babulon bel TOUPA khut a dangkaeng nou, lei pumpi hihkhamna ahi a, namte’n kham in a lung uh a mawl khinta hi.

⁸Babulon bel a puk guih a, a mangta, amah kah ekek un, hihdam theih ding dan ahihleh singnai damdawi nuh chi laksak un.

⁹Babulon hihdam ka tuma, a dam tuan ngal kei a, amah nusia in eimah gam chiat uah pai ni, a mawhna in van a suna, van dum pha a dopkang ahi.

¹⁰TOUPA’N ka dikna a phuangta; kisa un, TOUPA i Pathian thilhih, Zion ah i phuang ding uh.

¹¹Thalte tat-hiam unla, lumte len un, Media kumpipate lungsim TOUPA’N a tokthouta a, a thiltup Babulon hihsiat ahi. Huai TOUPA’Na biakin ziak a phulakna ahi.

¹²Babulon kulh bul ah kidouna puan zakthak un, venna hihhat in, galvilmi koih un, galbuknate bawl unla, Babulon mite tungtang thu ah TOUPA’N a gentak, a ngaihtuah in a hihkhinta hi.

¹³Aw nang, tui tamna mun a tengmi, sum leh pai hau mahmah, na tawpna a tungta, na hinna khau a kitanta hi.

¹⁴Sepaihte TOUPA amah kilou in a chiamta hi, Khaupe bang mai in mihing in k’on dimsak ngeingei ding, nakpi’n a hon otkhum ding uh.

¹⁵A thilhihtheihna in lei a bawl a, A pilna in khovel a ding khesak a, a lemtheihna in van a phalhsak.

¹⁶A aw a suah a, van a tui a ging hawhaw a, kawlmong a kipan meipi a paitou sak a, vuah zukna ding in khua a phesak a, a goubawm a kipan huih a nungsak.

¹⁷Michih a mual ua, theihna lou in, dangkaeng sek michih in a lim sek pen a zumpih ua, a milim sun lah zuau ngen ahi a, amau ah nakna a omkei lai hi.

¹⁸Bangmahlou, khemna nasep lel ahi ua, a gawt hun chiang in a mang ding uh.

¹⁹Jakob tantuan zaw hichibang ahi kei, thil tengteng bul ahi; Israel a gouluah nam ahi a, a min sepaihte TOUPA ahi.

²⁰Nang bel ka galdouna heipi leh vanzat na hi a, nang honzang in namte ka hih zan a, nang zang in lalna gamte ka hihmang hi.

²¹Nang honzang in sakol leh a tung a ka hihzan a, nangmah zang in kangtalai leh a tung a tuang ka hih zan a;

²²Nangmah zang in numei leh pasal ka hihzan a, nangmah zang in putek leh tuailai ka hihzan a, nangmah zang in nungak leh tangval ka hihzan hi.

²³Nangmah zang in belamching leh belamhon ka hihzan a, nangmah zang in lou neimi leh bawngtal kop ka hihzan a, nangmah zang in gam ukpipate leh upate ka hihzan sek ahi.

²⁴Nang mitmuh ngei in Zion tung a a thil hoihlou hih tengteng uh Babulon leh Kaldai mite tung ah ka thuk ding, chih TOUPA thupawt ahi.

²⁵Ngai in, lei pumpi hihsia, aw hihsetu tang lian, nang ka hondou ahi, chih TOUPA thupawt ahi: Na tung ah ka khut ka lik ding a, kawl sang a kipan ka honkhukkhe ding, tangkang mit khinsain k’on bawl ding.

²⁶Nang a kipan suang ning ding leh suangphum ding lakkhiak ahi nawn kei ding; tangtawn in na segawp zaw ding, chih TOUPA thupawt ahi.

²⁷Huai gam ah kidou puanzak tak unla. Namte lak ah pengkul mut un, amah dou ding namte kisa sak unla, Araratte, Minnite, Askenaz gamte, amah sual ding sepaih sep unla, khaupe zuanzang bang mai in sakolte kaikhawm un.

²⁸Amah dou ding namte kisa sak un, Media kumpipate, ukpipate leh upate, a thuneihna gam tengteng toh.

²⁹Huai gam nat thuak in a ling a, Babulon gam, tengmi omlou a hihsiat ding in, Babulon tung a TOUPA thiltup ading gige ahi.

³⁰Babulon galdoumite’n galkap ding ngapta lou in, a kulhpi uah a ton maimah uh, a pasalphatna uh a khing a, numei bang mai a hong hita ua, a tenna munte a kangkhin a, a deidanna siktawn a kitan hi.

³¹Thangkou tai in midang leng a ki tuahpih a, misawl in leng midang a tuak a, Babulon kumpipa kiang a a khopi ning chih ah a manta uh chih hilh ding in.

³²Lui kannate a man ua, phailuangte a hal siang ua, kidoumite leng a lunglelta uh.

³³Sepaihte TOUPA, Israel Pathian in hichi in a chi: Babulon tanu phual sikngil lai bang ahia, sawtlou nung in buhchil hun a tung ah a hongtung ding hi.

³⁴Hon negaita, Babulon kumpipa Nebukadnezzar in, hon haizan a, bel vuak lel in a hon bawlta, gulpi bang in hon nawmvalhta, ka thil limte’n a gilpi a dimsak a, a hon paikhe nawnta hi.

³⁵Kei leh ka sa tung a hiamgam thilhih, Babulon tung ah om hen; ka sisan Kaldai mite tung ah om hen, Jerusalem in a chi ding.

³⁶Huaiziak in TOUPA’N hichi in a chi: Ngai in, nang lam ah ka pang ding a, na phu k’on laksak ding, a tuipi ka kangsak ding a, a tuikhuk leng ka keugaw sak ding.

³⁷Huan, Babulon bel hoihlou paihkhawm lel, sehal tenna mun, lamdang sak chiat leh enghou, tengmi omlou mun a honghi ding.

³⁸A kikou ton ding ua, humpinelkai lunlai bang in, a ngik tuaktuak ding ua, humpinelkai nou bang in.

³⁹A kham mahmah lai un Ankuang ka luisak dia, khothei hetlou in ka khamsak dia, khanglou hetlou ding a a ihmut den theihna ding un, chih TOUPA thupawt ahi.

⁴⁰Ka pikhe ding a, belam goh ding bang in, belamtalte keltalte bang mai in.

⁴¹Shesak lak ahita ve: lei pumpi pahtawi zel mat in a omta ve, namte lak ah Babulon a segawpta ve:

⁴²Babulon tuipiin a tumta, a kihot thupi mahmah in a khuh khinta.

⁴³A khopi a segawpta a, gamkeu, gamdai, mihing tenlouhna mihing ta kuamah phaklouh gam a hongsuakta hi.

⁴⁴Babulon bel ka gawt ding, a valhkhitsa a kam a kipan a suahkhe ding, namte bel a kiang ah a luangkhawm nawn kei ding uh, ahi Babulon kulhpi a chim ding.

⁴⁵Ka mite aw, asung a kipan hongpawt unla, TOUPA hehna lauhuai mahmah a kipan, michih amau ki humbit chiat un.

⁴⁶Na lungtang uh bah kei hen, huai gam a thuthang leng lau kei un; kum khat in thuthang a hongtung ding a, kum dang in thuthang a hongtung nawn ding ahi, kumpipa leh kumpipa kisual in gam ah hiamgamna a om ding.

⁴⁷Huaiziak in, ngai un, nite a hongtung hi. Babulon milim sektawmte tung a vai ka hawm a, a gam pumpi a zumna ni ding; huan, asung ah a mi thahte a puk ding uh.

⁴⁸Huchi in lei leh van leh asung a om tengteng in, Babulon tung a kipak in la a sa ding uh; mallam a kipan simmite a kiang ah a tung ding uh ahi ngal a, chih TOUPA thupawt ahi.

⁴⁹Babulon in Israel mi thahte a puksak bang in Babulon ah gamchih a mi thahte a puk ding uh.

⁵⁰Nou namsau pel mite aw, kuan unla, ding maimai kei un, gamlapi a kipan in TOUPA theigige unla, na lungsim uah Jerusalem lut hen.

⁵¹Gensiatna thu ka zak ziak un ka zum ua, lungdonna in ka mai uh a tuam a, TOUPA inn a mun siangthoute ah pautheihlouh mite a honglutta uhi.

⁵²Huaiziak in ngai un, nite a hongtung hi, chih TOUPA thupawt ahi, a milim sektawmte uh tung a ka vaihawmna ding leh a gam pumpi tung a mi liamte thumna ni ding ngei.

⁵³Babulon bel van sun in sang mahleh, a kulh sangte hihkip mahleh, a tung ah ka kiang a kipan hihsemi a hongtung ding, chih TOUPA thupawt ahi.

⁵⁴Babulon a kipan kah husa leh Kaldai gam a kipan a siatna thupitak husa:

⁵⁵TOUPA’N Babulon a sim a, a husa uh thupitak a hih daihsak hi. A gamtat husa uh tui tampi ging hawhaw bang ahi, a awng zuazua ua.

⁵⁶A tung ah simmi a hongtung, Babulon tung ngei ah pang ni, a mi hatte mat in a om ua, a thalpeute uh a kitan gawpta, TOUPA bel thukna Pathian ahi a, a thuk ngeingei ding.

⁵⁷Huan, a heutute leh a mipilte, a ukpipate leh upate leh mi hatte ka khamsak dia; a lumden ding ua, a khanglou kei ding uh, chih, kumpipa, Sepaihte TOUPA thupawt ahi.

⁵⁸Sepaihte TOUPA’N hichi in a chi: Babulon kumpipa kulh bang sahtakte a chimvek ding a, a kongpi sangte a kang vek ding; a mite’n a thawn in a sem ua, namte’n meihal ading lel in a kihihgim uh a na hi.

⁵⁹Judah kumpipa Zedekiah vaihawm kum lina a Babulon a hohlai a a kiang a hohsam, Seraiah Neriah tapa, Maaseiah tapa kiang a zawlnei Jeremiah thupiak.

⁶⁰Seraiah bel kumpipa inn sung heutupen ahia. Jeremiah in Babulon tung a siatna hongtung ding tengteng, Babulon tungtang a hiai thu gelh tengteng laibu ah a gelh hi.

⁶¹Huan Jeremiah in Seraiah kiang ah, Babulon na tun hun chiang in hiai thu tengteng sim ngeingei inla,

⁶²Aw TOUPA hiai nam tungtang ah kuamah, mi leh sa leh, ten louhna ding suksiata om in, tangtawn a kisegawp zaw ding in thu na genta a, na chi ding.

⁶³Huan, hichi a honghi ding a, hiai laibu na sim khit chiang in suang toh gakkhawm in Euphrates lui ah pailut inla,

⁶⁴Babulon hichibangmai in a tum ding a, a tung a siatna ka hontut ding ziak in a thou nawn kei ding; a bah mahmah ding uh, chi in na gen ding ahi, a chi a. Hichiteng Jeremiah thu ahi.