Read Paite Chin JEREMIAH 52 Bible Online

JEREMIAH 52 - Paite Chin bible

JEREMIAH 52

¹Zedekiah a vaihawm pattung lai in kum sawmnih leh kum khat a upa ahi a; Jerusalem ah kum sawmlehkhat vai a hawm a; a nu min Hamutal ahi a, Libnah khua a Jeremiah tanu ahi.

²Jehoiakim hih bangbang in TOUPA mitmuh in thil gilou a hih hi.

³TOUPA a heh mahmah ziak in Jerusalem leh Judah gam ah a ma a kipan a paihkhiakna khop in thil a hongtungta a; Huchi in Babulon kumpipa tung ah Zedekiah a helta hi.

⁴Huan, a vaihawm kum kua na ah hichi a honghi a, kha sawmna, huai kha ni sawm ni’n Babulon kumpipa Nebukadnezzar leh a sepaih honte Jerusalem dou ding in a hong kuan ua, buk a bawl khumta ua; a kim ah kulh a bawl uhi.

⁵Huchi in kumpipa Zedekiah kum sawm leh khatna tan in khopi um in a omta hi.

⁶Kha lina, huai kha ni kua na ah khopi a kial a hong uang mahmah a, gam mipite ading in nekding a omta kei hi.

⁷Huchi in khopi kulh bang a sun vang ua, kidou mi tengteng a taimang ua, kumpipa huan a bang nih kikal a kongpi a pawtin, zanin khopi a kipan a taikhia ua; Kaldai mite khopi a om ahi uhi.

⁸Himahleh Kaldai sepaihte’n kumpipa a delh ua, Jeriko phaizang ah Zedekiah a pha ua, sepaih honte a kiang a kipan a dalhzak uh.

⁹Huchi in Zedekiah a man ua, Babulon kumpipa kiang ah Hamath gam a Riblah khua ah a paipihta ua; aman a tung ah vai a hawm a.

¹⁰Babulon kumpipa’n Zedekiah tapate a mitmuh ngei in a that a; Riblah ah Judah heutu tengteng leng a that lai hi

¹¹Zedekiah mit a khelkhia a, Babulon ah a paipih hi; a sih ni tanpha in suangkul ah a koih hi.

¹²Huan, Babulon kumpipa Nebukadnezzar kum sawm leh kua na, kha ngana, huai kha ni sawmna ah kumpipa vengpa pawl heutu, Babulon kumpipa ma ading sek, Nebuzaradan Jerusalem ah a honglut hi.

¹³TOUPA inn leh kumpipa inn a hal a, Jerusalem inn tengteng toh, inn thupi chitengte mei in a hal hi.

¹⁴Huan, Kaldai sepaih hon tengteng, kumpipa vengpa pawl heutu kiang a omte’n Jerusalem kulhte a kim in a hihchim vek uh.

¹⁵Huchi in vengpa pawl heutu Nebuzaradan in mipi lak a genthei pawl pente khopi a nutsiatte, Babulon kumpipa kiang a kipesate leh mi khutsiam omsun tengtengte toh sal in a pivekta hi.

¹⁶Himahleh vengpa pawl heutu Nebuzaradan in gam a mi genthei pen khenkhatte grephuan kemmi leh vengmi ding in a nusia hi.

¹⁷TOUPA inn a dalkhuamte leh a kingaknate, dal maiphiatkuang lian TOUPA inn a te Kaldai mite’n a hihtam gawp ua, dal tengteng Babulon ah a la uhi.

¹⁸Belte leng, vutluahte, khawnvak mihsaknate, maiphiatkuangte, sikkeute, dal tuium-belsuan tengteng a zat sekte uh a la vek uh.

¹⁹Noute leng, meivu koihnate, maiphiatkuangte, belte, khawnvak koihnate, sikkeute leh belhbute; dangkaeng a bawl huai dangkasik in vengmi pawl heutu in a la vek hi.

²⁰Khuam nih, dal a bawl bawngtal sawmlehnih, maiphiatna kuang kingakna, kumpipa Solomon in TOUPA inn adia a bawl, hiai tuium-belsuan tengteng dal bel kikim a teh ahi kei hi.

²¹Huan, khuamte khuam khat san dan, tong sawmlehgiat ahi a, tong sawmlehnih in a kimvel zou phet ahi; a sahdan zung za delh ahi a, asung a hawm hi.

²²A tung ah dal lubawk a om a, a lubawk san dan tong nga ahi a, a lubawk kimvel in dalngen a zep leh theibuhfai ahi a; khuam nih in leng hichimah bang in theibuhfai a nei hi.

²³A sik ah theibuhfai sawmkua leh guk a om a, a kim a a zepna theibuhfai tengteng za khat ahi.

²⁴Huan, vengpa pawl heutu in siampu lian Seraiah leh siampu nihna, Zephaniah leh kongkhak ngakmi thumte a man hi:

²⁵Kidou mite tung a heutu dia seh michilgeh leh mi sagih, kumpipa melmu sek mi, khopi a omte leh sepaihheutu gelhmi, gam mite min kempa leh gam mipi lak a mi sawmguk, khopi a na omte khopi a kipan in a pikhia hi.

²⁶Nebuzaradan, vengpa pawl heutu in amau a pia, Babulon kumpipa kiang ah Riblah ah a hontun hi.

²⁷Babulon kumpipa’n Hamath gam a Riblah ah amau a bawl ek a, a that vek hi. Huchi in Judah nam a gam ua kipan in sal a pimang in a omta.

²⁸Hiaite Nebukadnezzar in mipi sal a a pite ahi uh: kum sagihna ah Judah sang thum leh sawmnih leh thum;

²⁹Nebukadnezzar kum sawmlehgiatna ah Jerusalem a kipan in mi za giat leh sawmthum leh nih sal in a pi hi.

³⁰Nebukadnezzar kum sawmnih leh kum thumna ah Nebuzaradan vengtu pawl heutu in mi za sagih leh sawmli leh za guk a pi hi.

³¹Kumpipa saltan kum sawmthum leh sagihna, a kha sawmlehnihna, huai kha ni sawmnih leh nga geih in hichi a honghi a, Babulon kumpipa Evil merodakin a vaihawm kum khatna ah, Judah kumpipa Jehoiakin lutang a dopkang sak a, suangkulh a kipan a pikhia hi.

³²A kiang ah hoihtak in a pau a, Babulon a a kiang a om Kumpipate tutphah sang a sang in mangtutphah a tunsak hi.

³³A suangkulh puansilhte a kikhengsak a, a damsung teng a ma ah a an a ne den hi.

³⁴Huan amah vakna ding a damsung ni tengteng, a sih ni tan in a ni teng tantuan Babulon kumpipa’n a pe gige hi.