Read Paite Chin JEREMIAH 6 Bible Online

JEREMIAH 6 - Paite Chin bible

JEREMIAH 6

¹Benjamin tate aw, Jerusalem sung a kipan na bitna ding un tai mang unla; Tekoa ah pengkul mut unla Beth Hakkerem ah theihsakna suaksak un. Mallam a kipan in siatna a hong kuan hi, hihsiatna thupi mahmah.

²Zion tanu melhoih tak leh nou tak ka hihmang ding.

³Belampute, a belamhonte utoh a kiang a hongtung ding ua, a kim ah a puaninte uh a kaih khum ding ua, amau mun chiat ah a ke ding uh.

⁴Amah dou ding in kisa un, thou unla, sun lai in i sual ding uh, ei ading in khawk hina e! ni a kihektaa, nitaklam limliap a na sauta hi.

⁵Thou unla, zan in i sual mai ding uh! a inn hoihhoih uh hihsia ni.

⁶Sepaihte TOUPA’N hichi in a chi: A singte phuk unla, Jerusalem sualna ding in mualvum bawl un, khopi gawt ding pen hiai ahi, asung ah nuaisiahna ngen ahi.

⁷Tuileh in tui a pawtsak bang mai in a gitlouhna a pawtsak sek, asung ah hiamgamna leh kilohna a om chih zak ahi, ka ma ah natna leh kiliamsaknate a om nilouh hi.

⁸Ka lungsim in a hon tuamsan vengveng ma in aw, Jerusalem, pilvang in, huchilou in zaw luahmi neilou gam dia honbawl in, k’on hihgawp kha ding hi.

⁹Sepaihte TOUPA’N hichi in a chi: Israel omsunte grep bang in lou siang vek unla, grep loumi bang in a hiangte ban tuantuan un.

¹⁰A ngaihkhiak theihna ding un kua ka houpih in, kua ka theisak dia? Ngai in, bil lam zeksumlouh ahi ua, a ngaikhe theikei uh; ngai in, TOUPA thu amau ading in thil simmohhuai ahi a, kipahna mahmah a nei nawn kei uh.

¹¹Huaiziak in TOUPA hehna in ka dim a, kidek ka chimta; kholak a naupang tung ah ka bungkhe dia; tangval omkhawmte tung ah leng, a zi toh kiton in pasal leng lak ahi ding a, upate leh teksiate leng.

¹²A innte uh midang kiang a piak ahi ding a, a loumate uleh a zite utoh; huai gam a tengte tung ah ka khut lik ding ka hi ngal a, chih TOUPA thupawt ahi.

¹³A neupen a kipan a lianpen tan in leng michih huaihamna in a dim ua; zawlneite leh siampute nasan leng, michih a zuautat mahmah uhi.

¹⁴Ka mite liam, awlmohlou tak in, A hoih ve, a hoih ve, a chi ua, a hoih hetkei hi.

¹⁵Thil kihhuai a hih un leng a zum ua hia? Zumlou hial, a zum hetkei uh, a mai uleng a san sam kei: huaiziak in pukte lak ah a puktei ding ua: amaute ka gawt hun chiang in paihkhiak in a om ding uh, TOUPA’N a chi.

¹⁶TOUPA’N hichi in a chi: Lamka thuam ah ding unla, en un, lampi hoih omna lampi luite tawn un, huai ah pai unla, na kha ua ding in khawlna na mu ding uh” amau bel, “Huai ah ka pai kei ding uh” a chi uhi.

¹⁷Huan, nou ading in galvilmite ka sep ding a, “Pengkul ging ngaikhia un” chi in: amau bel, “Ka ngaikhe kei ding uh” a chi uhi.

¹⁸Huaiziak in, “Aw, namte aw, ngaikhia unla, aw, khawmte aw, a tung ua hongtung ding thei un.

¹⁹Aw, leitung, ngaikhia in, ngai in, hiai mite tung ah siatna ka hontun ding: a ngaihtuahna gahte uh; ka thute a ngaihkhiak louh ziak un: ka dante lah a paikhe hithet ua.

²⁰Bangding a Sheba a kipan begaw, gamlapi a kipan kawltute ka kiang hongtung nak ahia? Na haltum kithoihnate uh kipahpihtak ahi kei a, na kithoihnate un a hon kipaksak sam kei hi.

²¹Huaiziak in TOUPA’N hichi in a chi: Hiai mite kiang ah puknate ka koih ding a, huai ah pate a tapate utoh a puk khawm ding ua, inveng leh a lawm leng a mangthang ding uh” chi in.

²²Huan, TOUPA’N hichi in a chi: “Ngai in, mallam gam a kipan mite a hongpai uh, lei mun tawp a kipan nam thupi mahmah a hong kuankhia hi.

²³Thalpeu leh teipi a tawi ua, hiamgam mahmah, zahngaihna himhim neilou ahi uhi, a husa uh tuipi ging honhon bang ahia; sakol tungte ah a tuang ua, michih galkapmi bang a kivan in, aw, Zion tanu, nang a hongsual dek uhi” chi in.

²⁴“A minthanna uh i za ua, i khutte a zawkhinta, numei nauvei lunggimna bangbang lunggimna’n a hon manta hi.

²⁵Gam ah paikhe kei un, lampi ah leng pai sam kei un, huai ah lah melma namsau a om ngal a, kilchih ah launa a om hi.”

²⁶“Aw, ka mi, ka tanu, saiip puan teng inla, vut lak ah tubial in; tapa tangkhat sun bang in sun inla, kap vongvong dih, hihse mi i tung uah a hongtung guih dek ngal ua.

²⁷Ka mite lak a chiamtehmi ding leh ze-etmi ding in k’on bawl a, a omdan uh na theih a, na ze-et theihna ding in.

²⁸Avek un helhat, paupeng mahmah gensiat ching a vialvak, dal leh sik bang ahi uh, hoihloupi in a gamtang uhi.,

²⁹Pum in a zap huhu a, mei ah a suan zulbei a, hihsiangthou tupna a thawn lel ahi, migiloute lah paihmang ahi ngal kei ua.

³⁰Mite’n dangkasik ek hoihlou a chi ding ua, TOUPA amaute a pampaih ziak in” a chi hi.